DEUTERONOMI 1 - Khasi CL Bible (BSI)

Ka jinglamphrang

¹ Ki ktien ha kane ka kitab ki long kito kiba u Moses u la kren ha ki Israel mynba ki don ha ka ri khlaw sha mihngi na ka wah Jordan. Ki ïadon ha ka Them Jordan hajan Suph, hapdeng ka shnong Paran ha kawei ka liang bad ki shnong Tophel, Laban, Haseroth, bad Disahab ha kawei pat ka liang.

² (Ka shim por khatwei sngi ban ïaid na u Lum Sinai sha Kadesh Barnea na shaphang ka ri lum Edom.)

³ Ha ka sngi kaba nyngkong jong u bnai uba khatwei, ha ka snem kaba sawphew hadien ba ki la mih na Ijipt, u Moses u ïathuh ha u paidbah ïa kaei kaei baroh kaba U Trai u la hukum ïa u ban ong ha ki,

⁴ hadien ba U Trai u la jop ïa u Sihon u syiem Amor uba shong ha Heshbon, bad ïa u Og u syiem Bashan, uba synshar ha ki shnong Ashtaroth bad Edrei.

⁵ Dei ha ka por ba ki Israel ki don ha Moab sha mihngi na Jordan ba u Moses u sdang ban batai bad hikai ïa ki hukum U Blei.

⁶ U ong, “Mynba ngi don ha u Lum Sinai, U Trai U Blei jong ngi u ong ha ngi, ‘Phi la ïashong slem eh ha une u lum.

⁷ Lied noh ïa la ka dara bad ïaid shaphrang. Leit sha ri lum Amor bad sha ki jaka kiba markhap bad ka — sha ka Them Jordan, sha ki ri lum bad ri them, sha ka jaka kaba shathie bad sha ka rud duriaw Mediterranian. Leit sha ka ri Kanaan bad nangta sha lyndet ki lum Lebanon haduh ka wahbah Ïuphratis.

⁸ Kane baroh ka long kata ka ri kaba nga U Trai nga la kular ban ai ha ki kpa tymmen jong phi, u Abraham, u Isaak, bad u Jakob, bad ha ki khun ki ksiew jong ki. Khie leit kam kynti ïa ka.’ ”

U Moses u thung ïa ki nongbishar

⁹ U Moses u ong ha uta u paidbah, “Mynba ngi dang don ha u Lum Sinai, nga la ïathuh ha phi, ‘Ka jingkitkhlieh ban ïalam ïa phi ka khia than ïa nga, ngam lah shuh ban kit ïa ka tang marwei.

¹⁰ U Trai U Blei jong phi u la pynroi ïa phi kat ki khlur ha sahit bneng.

¹¹ Ai ba U Trai, U Blei ki kpa tymmen jong phi un nang pynroi shuh shuh ïa phi bun hajar shah bad un pynmanbha ïa phi, kumba u la kular!

¹² Hynrei kumno tang ma nga marwei nga lah ban kit ïa ka jingkitkhlieh kaba khia ha kaba bishar bad rai ïa ki kam ïakajia hapdeng jong phi?

¹³ Jied na kawei kawei ka jait ïa ki briew kiba stad, kiba shemphang, bad kiba rangbah jingmut, bad ngan thung ïa ki kum ki nongbishar ki ban peit halor ïa phi.’

¹⁴ Bad phi ruh phi ïasngewdei ïa kata kaba bha ban leh.

¹⁵ Kumta nga la shim ïa kita ki nongïalam kiba stad bad kiba khraw jingmut ïa kiba phi hi phi la jied na ki jait jong phi, bad nga la buh ïa ki ban peit halor ïa phi. Don na ki, kiba peit ïa ki shihajar ngut, don kiba peit ïa ki shispah ngut, don kiba peit ïa ki sanphew ngut, bad don ruh kiba peit ïa ki shiphew ngut. Nalor kitei, nga la thung ruh ïa kiwei pat ki rangbah synshar hapdeng jong phi.

¹⁶ “Ha ka por ba thung, nga la hikai ïa ki, ‘Sngap bha ïa ki kam ïakajia kiba mih hapdeng ki briew jong phi. Bishar hok ïa kawei pa kawei ka kam, la ka long tang hapdeng ki briew jong phi, ne ka ïadei ruh bad ki nongwei kiba shong basah hapdeng jong phi.

¹⁷ Wat ïashah liang ha ki rai jong phi; bishar ïa uwei pa uwei ha kajuh ka nongrim, kam pher la u long uba kumno kumno. Wat sheptieng ïano ïano, naba ki rai kiba phi ai ki wan na U Blei. Lada kano kano ka kam ïakajia ka eh than ïa phi ban rai, wallam ïa ka sha nga, bad ngan rai ïa ka.’

¹⁸ Ha kajuh ka por ruh, nga la kren ha phi shaphang kiei kiei baroh kiba phi dei ban leh.

Kaba phah nongsyntiat na Kadesh Barnea

¹⁹ “Ngi la leh ïa kaei kaba U Trai U Blei jong ngi u la hukum ïa ngi. Ngi mih na u Lum Sinai bad ngi ïaid lyngba ïa ka ri shyiap kaba ïar bad ba-ima sha ka ri lum Amor. Ynda ngi poi ha Kadesh Barnea,

^20-21 nga ong, ‘Mynta phi la poi ha ri lum Amor, kaba U Trai U Blei jong ngi, U Blei jong ki kpa tymmen jong ngi, u ai ha ngi. Peit ïa ka hangtai. Khie leit kam kynti ïa ka kumba u la hukum. Wat leh tud, bad wat sheptieng.’

²² “Hynrei phi ïawan sha nga, bad phi ïa-ong, ‘To ngin ïaphah shuwa ïa ki rangbah ban leit syntiat ïa kata ka ri, khnang ba ki lah ban wan ïathuh ha ngi na kano ka lynti kaba biang eh ba ngin leit kiew bad kiba kumno ki jait shnong kiba don hangta.’

²³ “Nga la sngewdei ïa kata ka jingai jingmut; kumta nga la jied khat-ar ngut ki rangbah, uwei na kawei kawei ka jait.

²⁴ Kita ki la ïaleit sha kata ka ri lum haduh Them Eshkol bad ki la syntiat ïa ka.

²⁵ Ki la wanrah khyndiat ki soh ba ki shem hangta, bad ki la ïathuh ruh ba kata ka ri ïa kaba U Trai U Blei jong ngi u ai ha ngi ka long kaba seisoh bha.

²⁶ “Hynrei phi la ïaleh pyrshah ïa ka hukum U Trai U Blei jong phi, bad phim treh ban leit rung sha kata ka ri.

²⁷ Phi la ïakren khñium para ma phi: ‘U Trai u isih ïa ngi. U la wan ïalam ïa ngi na Ijipt tang ban aiti ïa ngi ha kine ki Amor, ba kin ïoh pynïap ïa ngi.

²⁸ Ngin ïaleit lei shata? Ngi te ngi sheptieng. Kito ki rangbah kiba ngi la phah ki ïathuh ïa ngi ba ki briew hangta ki kham khlaiñ bad kham jrong ban ïa ngi, bad ba ki shong ha ki nongbah kiba ki kynroh jong ki, ki kynjoh ïa ka suiñbneng. Ki la ïohi ruh hangta ïa ki ramhah.’

²⁹ “Hynrei nga la ong, ‘Wat tieng ïa kita ki briew.

³⁰ U Trai U Blei jong phi un ïalam ïa phi, bad un ïaleh na ka bynta jong phi, kumba phi la ïohi ïa u ba u leh ha Ijipt

³¹ bad ha ka ri shyiap. Phi la ïohi kumno u la bah ïa phi khlem jingmynsaw baroh shi lynter lynti haduh kane ka jaka, kumba u kpa u bah ïa la u khun.’

³² Pynban haba nga la kren haduh katta ruh, phim shym shaniah ha U Trai,

³³ wat la u leit ha shuwa jong phi borabor ban wad ka jaka ba phin sher dara. Ban kdew lynti ïa phi, u ïaid ha shuwa jong phi ha u rishot ding mynmiet bad ha u rishot lyoh mynsngi.

U Trai u pynshitom ïa ki Israel

³⁴ “U Trai u la ïohsngew ïa ki jingkhñium jong phi bad u la bitar lep, bad kumta da kaba sngewkhia u ong,

³⁵ ‘Na kane ka pateng bymman, yn ym don uwei ruh u ban ïoh leit rung ha kata ka ri kaba seisoh ba nga la kular ban ai ha ki kpa tymmen jong phi,

³⁶ lait tang u Kaleb u khun jong u Jephunneh. U te u ïaineh ha nga, kumta ngan ai ha u bad ha ki khun ki ksiew jong u ïa kata ka ri ïa kaba u la leit syntiat.’

³⁷ Dei namar jong phi keiñ ba U Trai u la bitar ïa nga ruh, bad u ong, ‘Wat me ruh, Moses, men ym ïohrung ha kata ka ri.

³⁸ Hynrei pynshlur ïa u nongïarap jong me, u Joshua u khun jong u Nun. Ma u, un sa ïalam ïa ki Israel ban kam kynti ïa kata ka ri.’

³⁹ “Nangta U Trai u ong ha ngi baroh, ‘Ki khun ki kti jong phi, kiba dang lung palat ban tip ïa kaba bha na kaba sniew, kin rung sha kata ka ri — ki khun ki kti kiba phi ong kin shah kurup ha ki nongshun jong phi. Ngan ai ïa ka ri ha ki, ban kin ïohkynti ïa ka.

⁴⁰ Hynrei ma phi te, phi dei ban leit phai biang sha ka ri shyiap sha ka phang jong ka Duriaw Basaw.’

⁴¹ “Te phi la jubab, ‘Moses, ngi la leh pop pyrshah ïa U Trai. Hynrei mynta ngin leit tur, kumba U Trai U Blei jong ngi u la hukum ïa ngi.’ Nangta uwei pa uwei na phi u khreh ban ïaleh thma, u da tharai ba ka long kaba jem ban leit hiarthma ïa kata ka ri.

⁴² “Hynrei U Trai u la ong ha nga, ‘Maham ïa ki ban ym leit tur, naba ngan ym long ryngkat bad ki, bad ki nongshun jong ki kin sa jop ïa ki.’

⁴³ Nga la ïathuh ha phi ïa kaba U Trai u la kren, hynrei phim patiaw satia; phi la ïaleh pyrshah pynban ïa u, bad da ka mynsiem kaba sngewmeng phi la leit kiew sha kata ka ri lum.

⁴⁴ Nangta ki Amor kiba shong ha kita ki lum ki la wan tur pyrshah ïa phi kumba beh u ngap. Ki la beh ïa phi shaduh Hormah, bad ki la jop ïa phi hangta ha ri lum Edom.

⁴⁵ Kumta phi la lynñiar ha U Trai ba un ïarap ïa phi, hynrei um shym sngap ne shahshkor ïa phi.

Ki snem ha ka ri shyiap

⁴⁶ “Kumta, hadien ba ngi la sah slem ha Kadesh,