DANIEL 9 - Khasi CL Bible (BSI)

U Daniel u duwai na ka bynta ki briew jong u

¹ U Darius u nong Mid, uba long u khun jong u Serksis, u la synshar ïa ka hima Babilonia.

² Ha ka snem kaba nyngkong jong ka jingsynshar jong u, nga la pule bniah ïa ki kitab bakyntang bad pyrkhat shaphang ki hynñiewphew snem kiba ka Jerusalem kan don ha ki jingpra, kat kum kaei kaba U Trai u la lah ïathuh ha u Jeremaïah u nongïathuhlypa.

³ Bad nga la duwai jur ha U Trai U Blei, da kaba ïasaid bad u, da kaba shahjingit, da kaba phong ki jaiñ khain, bad da kaba shong ha u dpei.

⁴ Nga la duwai ha U Trai U Blei jong nga bad nga la phla ïa ki pop jong ki briew jong nga. Nga la ong, “A Trai U Blei, me long uba khraw, bad ngi pyndonburom ïa me. Me long uba bat ïa la ka jutang bad me pyn-i ka jingieit baneh ïa kito kiba ieit ïa me bad leh ïa kaei kaba me hukum.

⁵ “Ngi la leh pop, ngi la long kiba sniew, ngi la leh bakla. Ngi la kyntait ïa kaei kaba me la hukum ïa ngi ban leh bad ngi la phai noh na kaei kaba me la pyn-i ha ngi ba ka long kaba dei.

⁶ Ngim shym la shahshkor ïa ki nongïathuhlypa, ki shakri jong me, kiba la kren ha ka kyrteng jong me sha ki syiem jong ngi, ki nongsynshar jong ngi, ki kpa tymmen jong ngi, bad ka jaitbynriew jong ngi baroh kawei.

⁷ Ma me ko Trai, me leh borabor ïa kaba dei, hynrei borabor ngi la wallam ka jingjahburom ha lade hi. Kane ka long kaba shisha ïa baroh na ngi kiba shong basah ha Judia bad ha Jerusalem bad jong baroh ki khun Israel ïa kiba me la pynsakma ha ki ri kiba jan bad kiba jngai namar ki la long ki bymïaineh ha me.

⁸ Ki syiem jong ngi, ki nongsynshar jong ngi, bad ki kpa tymmen jong ngi ki la pynlehrain bad ki la leh pop pyrshah ïa me a Trai.

⁹ Me long uba dap da ka jingisynei bad uba map, wat la ngi la ïeng ïaleh pyrshah ïa me.

¹⁰ Ngim shym la shahshkor ïa me, A Trai U Blei jong ngi, mynba me la ong ïa ngi ban im kat kum ki aiñ kiba me la ai ha ngi lyngba ki nongïathuhlypa ki shakri jong me.

¹¹ Ki Israel baroh ki la pynkheiñ ïa ki aiñ jong me bad ki kyntait ban shahshkor ïa kaei kaba me la ong. Ngi la leh pop pyrshah ïa me, bad kumta me la wallam ha ngi ïa ki jingtim kiba la thoh ha Ka Aiñ u Moses, u shakri jong me.

¹² Me la leh ïa kaei kaba me la ong ba men leh ha ngi bad ha ki nongsynshar jong ngi. Me la pynshitom ïa ka Jerusalem kham jur ban ïa kano kano kawei pat ka nongbah ha ka pyrthei,

¹³ da kaba ai ha ngi ïa baroh ki jingpynshitom kiba la batai ha ka Aiñ jong u Moses. Hynrei wat mynta, A Trai U Blei jong ngi, ngim shym la pyrshang ban pynsngewbha ïa me da kaba phai noh na ki pop jong ngi lane da kaba bud ïa ka jingshisha jong me.

¹⁴ Ma me, A Trai U Blei jong ngi, me la pynkhreh ban pynshitom ïa ngi, bad me la leh kumta, namar borabor me ju ïai leh ïa kaei kaba dei, bad ngim shym la pynshahshkor ïa me.

¹⁵ “A Trai U Blei jong ngi, me la pyn-i ïa ka bor jong me da kaba wallam noh ïa ki briew jong me na ri Ijipt, bad ïa ka bor jong me la ïai kynmaw. Ngi la leh pop; ngi la leh bakla.

¹⁶ Me la ïada ïa ngi ha kaba mynshuwa, kumta te to wat bitar shuh ïa ka Jerusalem. Ka long ka nongbah jong me, u lum bakyntang jong me. Baroh ki briew ha ki ri ba-marjan ki khmih beiñ ïa ka Jerusalem bad ïa ki briew jong me namar ki pop jong ngi bad ka jingbymman ba ki kpa tymmen jong ngi ki la leh.

¹⁷ A Blei, to shahshkor ïa ka jingduwai bad ka jingkyrpad jong nga. To pynbha pat ïa ka Templ jong me, ïa kaba la pynjot; to pynbha ïa ka khnang ba uwei pa uwei baroh un tip ba me long U Blei.

¹⁸ To shahshkor ïa ngi, A Blei; to khmih sha ngi, bad peit ïa ka jingjynjar kaba ngi don bad ïa ka jingshah shitom jong ka nongbah kaba kit ïa ka kyrteng jong me. Ngi duwai ha me namar ba me long uba dap da ka jingisynei, ym namar ba ngi la leh ïa kaba dei.

¹⁹ A Trai, to sngew ïa ngi. A Trai, to map ïa ngi. A Trai, to shahshkor ïa ngi, bad to trei! Khnang ba uwei uwei baroh un tip ba me long U Blei, wat ym pynslem! Kane ka nongbah bad kine ki briew ki long ki jong me.”

U Gabriel u batai ïa ka jingïathuhlypa

²⁰ Nga la bteng ban duwai, da kaba phla ïa ki pop jong nga bad ïa ki pop jong ki briew jong nga ki Israel, bad da kaba ïasaid bad U Trai U Blei jong nga ban pynbha pat ïa ka Templ bakhuid jong u,

²¹ Mynba nga dang duwai, u Gabriel, uba nga la lah ïohi ha ka jingïohipaw mynshuwa, u la wan her sha tbian sha ka jaka ha kaba nga don. Ka la long ha ka por ban ai ïa ka jingkñia janmiet.

²² U la batai, “Ko Daniel, nga la wan hangne ban ïarap ïa me ban shemphang ïa ka jingïathuhlypa.

²³ Mynba me la sdang ban ïasaid bad U Blei, u la jubab ïa me. U ieit ïa me, bad kumta nga la wan ban ïathuh ïa ka jubab ha me. Mynta to pynshahshkor katba nga dang batai ïa ka jingïohipaw.

²⁴ “Hynñiew sien ki hynñiewphew snem ki long ka jingjlan jong ka por ba U Blei u la buh na ka bynta ban pyllait im ïa ki briew jong me bad ïa ka nongbah bakhuid jong me na ka pop bad ka jingsniew. Ïa ka pop yn map bad yn seng ïa ka jingbishar hok bymjukut, khnang ba ka jingïohipaw bad ka jingïathuhlypa kin wan urlong shisha, bad ïa ka Templ bakhuid yn pynkyntang biang.

²⁵ Kynmaw ïa kane bad to shemphang ïa ka: Naduh ka por ba la ai ïa ka hukum ban tei pat ïa ka Jerusalem, tad haduh ba wan u nongïalam ba la jied da U Blei, ki hynñiew sien ki hynñiew snem kin leit noh. Ïa ka Jerusalem yn tei pat lem bad ki lynti bah bad ki jingïada bakhlaiñ, bad kan ïeng haduh hynñiew sien ki hynriewphew ar snem, hynrei kane kan long ka por ki jingjynjar.

²⁶ Bad ha kaba kut jong kata ka por ïa u nongïalam ba la jied jong U Blei yn pynïap khlem bishar hok. Ïa ka nongbah bad ïa ka Templ yn pynjot da ka kynhun shipai kaba hiarthma jong u nongsynshar badonbor. Kaba kut kan wan kum ka jingshlei um, ka da wallam ïa ka thma bad ïa ka jingpynjot kaba U Blei u la lah pynkhreh.

²⁷ Uta u nongsynshar un don ka jingïateh kular kaba skhem bad kiba bun ki briew haduh hynñiew snem, bad haba shiteng na kane ka por ka la leit, un pynkut ïa ki jingkñia bad ki jingainguh. Ïa ka Jingshyrkhei Ba-ijli yn buh ha ka jaka bajrong tam jong ka Templ bad kan sah hangta tad haduh ba uta uba buh ïa ka hangta u ïashem ïa kaba kut kaba U Blei u la lah pynkhreh na ka bynta jong u.”