DANIEL 8 - Khasi CL Bible (BSI)

Ka jingïohipaw jong u Daniel ïa u khunlangbrot bad u 'langsohmoh

¹ Ha ka snem kaba lai ba u Belshassar u long syiem, nga la ïohi ïa ka jingïohipaw kaba ar.

² Ha ka jingïohipaw nga la shem kynsan ïa lade ha ka nongbah Susa ba la ker kynroh ha ka probins jong ka Elam. Nga la ïeng harud ka wah Ulai,

³ bad hangta harud jong ka wah nga la ïohi ïa u langbrot uba la don ar tylli ki reng bajrong, kawei na ki kaba kham jrong bad kham thymmai bad ïa kawei pat.

⁴ Nga la khmih ïa u langbrot ba u tynrah da ki reng jong u sha sepngi, shatei, bad shathie. Ym don uno uno u mrad uba lah ban pynsangeh ïa u lane lait phet na ka bor jong u. U la leh katba u sngewbha bad u la nang sngewmeng.

⁵ Katba nga dang lyngngoh aïu kane ka mut, u 'langsohmoh u la wan mareh na shaphang sepngi, u da mareh stet eh ba ki kjat jong u kim shym kynduh khyndew. U la don tang kawei ka reng hapdeng ki khmat jong u.

⁶ U la wan sha u langbrot, uba nga la ïohi ba u ïeng harud jong ka wah, bad u la mareh sha u da ka bor jong u baroh.

⁷ Nga la khmih ïa u ba u tur ïaleh ïa u langbrot. U la bitar eh katta katta ba u la tynrah ïa u bad pynkheiñ ïa ki ar tylli ki reng. U langbrot um don jingkhlaiñ shuh ban ïada. La bret ïa u sha khyndew bad u la shah kyrdem, bad ym don mano mano ba lah ban pyllait im ïa u.

⁸ U 'langsohmoh u la nang sngewmeng, hynrei ha ka jingdap rynïeng ka bor jong u, ka reng jong u ka la kheiñ. Ha ka jaka jong ka la wan mih saw tylli ki reng, kawei kawei ka phai sha ki liang baïapher.

⁹ Na kawei na kine ki saw tylli ki reng la mih kawei ka reng barit, kaba ka bor jong ka, ka ïar shaphang shathie bad sha mihngi bad sha ka Ri ka Jingkular.

¹⁰ Ka la san khlaiñ eh ban tur ïaleh ïa ka kynhun shipai jong ka bneng, ïa ki khlur hi, bad ka la bret katto katne na ki sha khyndew bad ka la ïuh halor jong ki.

¹¹ Ka la kyntait ban kohnguh wat ïa U Khun syiem jong ka kynhun shipai ba kynja bneng, ka la pynsangeh ïa ki jingkñia ba man ka sngi ba la ai sha u, bad ka la pyntngit ïa ka Templ.

¹² Ki briew ki la leh pop hangta ha ka jaka ban ai ki jingkñia kiba dei man la ka sngi, bad ïa ka niam bashisha la bret sha khyndew. Ka reng ka la jop ha kiei kiei baroh kiba ka la leh.

¹³ Nangta nga la ïohsngew ïa uwei u angel uba kylli ïa uwei pat, “Haduh katno kine kiei kiei kiba la ïohi ha ka jingïohipaw kin ïailong? Haduh katno ka pop ba-ijli kan bujli ïa ki jingkñia ba man ka sngi? Haduh katno ïa ka kynhun shipai ba kynja bneng bad ïa ka Templ yn kyrdem?”

¹⁴ Nga la ïohsngew ïa uta uwei pat u angel ba u jubab, “Kan ïailong haduh shi hajar shispah sanphew sngi, ha kaba ïa ki jingkñia janmiet bad mynstep yn ym ai. Hadien kata yn sa pynbha pat ïa ka Templ.”

U angel Gabriel u batai ïa ka jingïohipaw

¹⁵ Nga la pyrshang ban sngewthuh aïu ka jingïohipaw ka kit jingmut, haba kynsan uwei u la wan ïeng ha khmat jong nga.

¹⁶ Nga la ïohsngew ïa ka sur kaba pyrta na shiliang ka wah Ulai, “Ko Gabriel, to batai ïa u ïa ka jingmut jong kaei kaba u la ïohi.”

¹⁷ U Gabriel u la wan bad u la ïeng hajan jong nga, bad nga la sheptieng katta katta ba nga kyllon ha khyndew. U la ong ha nga, “Ko khun u briew, to shemphang ïa ka jingmut. Ka jingïohipaw ka ïadei bad ka jingkut jong ka pyrthei.”

¹⁸ Mynba u dang kren, nga la kyllon ha madan khlem tipbriew. Hynrei u la bat ïa nga, u la khyllie pynïeng ïa nga,

¹⁹ bad u la ong, “Nga pyn-i ha me ïa kaei kaba mih na ka jingbitar U Blei kan long. Ka jingïohipaw ka kdew ïa ka por jong ka jingkut.

²⁰ “U langbrot uba me ïohi uba la don ar tylli ki reng u ïeng na ka bynta ki hima jong ka Media bad Persia.

²¹ U 'langsohmoh u ïeng na ka bynta ka hima Gris, bad ka reng kaba paw bha hapdeng ki khmat jong u ka dei u syiem banyngkong.

²² Ki saw tylli ki reng kiba la wan mih shalor haba la pynkheiñ noh ïa ka reng kaba nyngkong ki ïeng na ka bynta ki saw tylli ki hima sha kiba kata ka hima yn pynïabynta bad kin ym long kiba khlaiñ kum ka hima kaba nyngkong.

²³ “Haba ka jingkut jong kito ki hima ka la jan bad ki la long bymman katta katta ba ki la dei ban shah pynshitom, yn don u syiem uba mutlop, uba runar eh, bad uba dap da ka jingshukor.

²⁴ Un long uba khlaiñ — hynrei ym da ka bor jong u hi. Un pynlong ka jingpynjot bashyrkhei bad un jop ha kiei kiei baroh kiba u leh. Un wallam ka jingjot halor ki rangbah kiba donbor bad halor ki briew jong U Blei hi.

²⁵ Namar ba u long uba sianti, un jop ha ki rukom shukor jong u. Un sngewsarong ïa lade bad pynjot ïa shibun briew khlem ka jingmaham. Un len wat ïa U Syiem bakhraw jong baroh, hynrei ïa u yn pynjot khlem da pyndonkam ïa kano kano ka bor ba kynja briew.

²⁶ Kane ka jingïohipaw shaphang ki jingkñia ha ka por janmiet bad mynstep ïa kaba la batai ha me kan urlong shisha. Hynrei buhrieh ïa ka mynta, namar kan shim por shibun ha shuwa ban kan urlong shisha.”

²⁷ Nga la noh mynsiem bad shitom bun bun sngi. Hadien kata nga la khie bad leit pat sha ka kam kaba u syiem u la ai ha nga, hynrei nga la shaïong da ka jingïohipaw bad ngam lah ban shemphang ïa ka.