DANIEL 7 - Khasi CL Bible (BSI)

U DANIEL U BATAI ÏA KI JINGÏOHIPAW JONG U ( 7:1—12:13 ) Ka jingïohipaw jong u Daniel ïa ki saw tylli ki mradkhlaw

¹ Ha ka snem kaba nyngkong kaba u Belshassar u long u syiem ka Babilonia, nga la phohsniew bad nga la ïohi ka jingïohipaw ha ka por mynmiet. Nga la thoh ïa ka jingphohsniew, bad kane ka dei ka jingbuh jingkynmaw ïa kaei kaba nga la ïohi ha kata ka miet:

² Ki lyer ki beh kyrthep na ki liang baroh bad ki shoh ïa ka sla ka duriaw-bah.

³ Saw tylli ki mradkhlaw bakhraw eh ki la mih shajrong na ka duriaw-bah, uwei uwei u ïapher na kiwei pat.

⁴ Uba nyngkong u syriem kum u sing, hynrei u don ki thapniang kum u pukni. Katba nga dang khmih la pynkdiah ïa ki thapniang. Ïa u mradkhlaw la rah shajrong bad la pynlong ïa u ban ïeng kum u briew. Bad nangta la ai ha u ka jingmut jingpyrkhat kum u briew.

⁵ U mradkhlaw uba ar u syriem kum ka dngiem kaba ïeng ha ki kjat-dien jong ka. Ka la bat lai tylli ki shyieng krung hapdeng ki bniat jong ka, bad ka sur ka la ong ha ka, “Khie leit, bam shibun ka doh katba pha lah!”

⁶ Mynba nga dang ap khmih, sa uwei pat u mradkhlaw u la mihpaw. U syriem kum u 'labasa, hynrei ha ka met jong u la don saw tylli ki thapniang, kum ki thapniang jong ka sim, bad u don saw tylli ki khlieh. U don ka dur kum uba don ka bor.

⁷ Katba nga dang ap khmih, u mradkhlaw uba saw u la mihpaw. U la long uba khrawbor, uba ingiew bad uba ishyrkhei. Da ki bniat nar bakhraw jong u, u khñiot pynlwet ïa ki ba u la ïoh, bad nangta u la kyrdem halor jong ki. Ym kum kita kiwei pat ki mradkhlaw, u la don shiphew tylli ki reng.

⁸ Katba nga dang khmih ïa ki reng, nga la ïohi ïa ka reng kaba rit, kaba mih napdeng kiwei pat. Ka la tar ïa ki lai tylli ki reng kiba la don lypa hangta. Kane ka reng ka la don ki khmat briew bad ka shyntur kaba kob sarong.

Ka jingïohipaw ïa uta uba la im junom

⁹ Mynba nga dang khmih, la buh ïa ki khet ha la ki jaka. Uta uba la im junom u la shong halor kawei na ki khet. Ki jaiñ jong u ki la long kiba lieh kum ka ïor, bad u shñiuh jong u, u long kum u 'saiwul nylla. Ïa ka khet jong u, la buh halor ki shalyntem ding, kaba la klang da ka ding,

¹⁰ bad ïa ka wahduid da ka ding la theh noh na ka. La don bun hajar ngut ki briew hangta kiba shakri ïa u, bad da ki million ngut ki briew ki la ïeng ha khmat jong u. Ka ïingbishar ka la sdang ïa ka jingïalang jong ka, bad ïa ki kitab la plied.

¹¹ Mynba nga dang khmih, nga dang lah ban ïohsngew ïa ka reng barit ba ka kren sarong eh bad kob. Katba nga dang ap khmih, la pynïap ïa u mradkhlaw uba saw, bad ïa ka met jong u la bret sha ki thylliej ding bad ka pynjot.

¹² Kiwei pat ki mradkhlaw ki la shah knieh noh ka bor jong ki, hynrei la shah ïa ki ban im shipor.

¹³ Ha kane ka jingïohipaw ha ka por mynmiet, nga la ïohi ïa kaei kaba i kum u briew. U la wan sha nga, ba la ker sawdong da u lyoh, bad u la leit sha uta uba la im junom bad la ai sngewbha ha u.

¹⁴ La ai ha u ka iktiar, ka jingpyndonburom, bad ka bor ba kynja syiem, khnang ba ki briew jong ki jaitbynriew baroh, ki jait ki kynja, bad ki ktien ki thylliej kin shakri ïa u. Ka iktiar jong u kan neh junom, bad ka hima jong u kan ym kut shuh.

La batai ïa ki jingïohipaw

¹⁵ Ki jingïohipaw ki la pynsheptieng ïa nga, bad la pynwit shikatdei eh ïa nga.

¹⁶ Nga la leit sha uwei na kito kiba ïeng hangta bad nga la kylli na u ban batai ïa ka baroh. Te u la ïathuh ha nga ïa ka jingmut.

¹⁷ U la ong, “Kine ki saw tylli ki mradkhlaw kiba khraw eh ki long ki saw tylli ki hima ki ban sa mih ha ka pyrthei.

¹⁸ Bad ki briew jong U Blei Bahakhlieh Tam Eh kin ïohpdiang ïa ka bor ba kynja syiem bad ban bat ïa ka junom la junom.”

¹⁹ Nangta nga la kwah ban tip kham bun shaphang jong u mradkhlaw uba saw, u bym long kum kiwei pat — u mradkhlaw bakynsha uba khñiot pynlwet ïa kiba u la ïoh da ki tnaw rnong bad da ki bniat nar bad nangta u kyrdem halor jong ki.

²⁰ Bad nga la kwah ban tip shaphang ki shiphew tylli ki reng halor ka khlieh jong u bad ïa ka reng kaba la mih hadien bad kaba la pynhap ïa ki lai tylli ki reng. Ka la don ki khmat bad ka shyntur bad ka da kob sarong. Ka la kham ishyrkhei ban ïa kiwei pat.

²¹ Mynba nga dang khmih, kata ka reng ka pynlong thma bad ki briew jong U Blei bad ka la jop ïa ki.

²² Nangta uta uba la im junom u la wan bad u la pynbna ïa ka jingbishar ha ka liang jong ki briew jong U Blei Bahakhlieh Tam Eh. Ka por ka la poi na ka bynta ki briew jong U Blei ban pdiang ïa ka bor kaba kynja syiem.

²³ Kane ka dei ka jingbatai kaba la ai ha nga: “U mradkhlaw uba saw u dei ka hima kaba saw ka ban don ha ka pyrthei bad kan long kaba pher na kiwei pat ki hima. Kan pynlwet ïa ka pyrthei baroh kawei bad kan kyrdem ïa ka.

²⁴ Ki shiphew tylli ki reng ki long ki shiphew ngut ki syiem ki ban synshar ïa kata ka hima. Nangta sa uwei pat u syiem un mihpaw; un long uba pher bak lbak ïa kiba mynshuwa bad un pynkhyllem ïa ki lai ngut ki syiem.

²⁵ Un kren pyrshah ïa U Blei Bahakhlieh Tam Eh bad banbeiñ ïa ki briew jong U Blei. Un pyrshang ban pynkylla ïa ki aiñ niam bad ïa ki Jingkhawai Niam jong ki, bad ki briew jong U Blei kin long hapoh ka bor jong u haduh lai snem shiteng.

²⁶ Nangta ka ïingbishar ba kynja bneng kan shong bishar, kan knieh noh ïa ka bor jong u bad pynjot thiaw ïa u.

²⁷ Ïa ka bor bad ka jingkhraw jong baroh ki hima ha ka pyrthei yn ai ha ki briew jong U Blei Bahakhlieh Tam Eh. Ka bor ba kynja syiem jong ki kan ym kut shuh bad ki nongsynshar baroh ha ka pyrthei kin shakri bad kohnguh ïa ki.”

²⁸ Kane ka dei kaba kut jong ka jingïathuh. Nga la sheptieng haduh katta katta ba nga la kylla lieh blaid blaid, bad ba nga la set ïa kaei kaei baroh ha lade.