DANIEL 6 - Khasi CL Bible (BSI)

U Daniel hapoh ka krem ki sing

¹ U Darius u la rai ban thung shispah arphew ngut ki lat ban bat kam ha kylleng ka hima jong u.

² Shuh shuh u la thung ïa u Daniel bad ar ngut kiwei pat ban khmih ïa ki lat bad ban khmih halor ki jingkwah jong u syiem.

³ Tang katto katne por, u Daniel u la pyn-i ba u lah ban treikam kham bha ban ïa kiwei pat ki nongpynïaidkam lane ki lat. Namar ba u long uba kham paw, u syiem u la pyrkhat ban buh ïa u ban khmih ïa ka hima baroh kawei.

⁴ Te kiwei pat ki nongpynïaid bad ki lat ki la ïapyrshang ban shem kaei kaei kaba bakla bad ka rukom kaba u Daniel u pynïaid ïa ka hima, hynrei kim lah, namar ba u Daniel u long uba lah ban shaniah, bad um shym leh kano kano kaba bakla lane ka jingbymhok.

⁵ Ki la ïa-ong para ma ki, “Ngin ym shem kano kano da kaba ngi lah ban kynnoh ïa u Daniel lymda dei kaei kaei kaba ïasoh bad ka niam jong u.”

⁶ Kumta ki la leit ban jngoh ïa u syiem bad ki la ong, “Ko syiem Darius, ai ba u Syiem Kynrad un im junom!

⁷ Baroh ma ngi kiba pynïaid ïa ka hima jong phi — ki nongpynïaidkam, ki lat, ki lat kiba kham hapoh, bad kiwei pat ki rangbah pynïaidkam — ki la ïamynjur ba u Syiem Kynrad u dei ban pynmih ka hukum ban pyntreikam pyrkhing ïa ka. To ai ki hukum ba haduh laiphew sngi yn ym shah ïano ïano ban kyrpad ei ei na uno uno u blei lane na uno uno u briew lait noh tang na u Syiem Kynrad. Ïa uno uno uba pynkheiñ ïa kane ka hukum dei ban bret shapoh ka thliew kaba la dap da ki sing.

⁸ Kumta ai ba u Syiem Kynrad un pynmih ïa kane ka hukum bad soi ïa ka, bad kan treikam, ka aiñ jong ki Mid bad ki Persia, ka bym lah ban pynkylla.”

⁹ Bad kumta u syiem Darius u la soi ïa ka hukum.

¹⁰ Haba u Daniel u la tip ba ïa ka hukum la lah soi, u la leit sha ïing. Ha ka kamra kaba haneng jong ka ïing jong u la don ki jingkhangïit kiba phai sha Jerusalem. Hangta, kumba u la ju ïai leh, u la dem khohsiew ha ki jingkhangïit ba la plie bad u duwai sha U Blei lai sien shi sngi.

¹¹ Haba ki nongshun jong u Daniel ki la khmih ïa u ba u duwai sha U Blei,

¹² baroh na ki, ki la ïaleit lang sha u syiem ban mudui ïa u Daniel. Ki la ong, “Ko Syiem Kynrad, phi la soi ïa ka hukum ba na ka bynta ki laiphew sngi kiba bud ïa uno uno uba kyrpad ïa kano kano na uno uno u blei lane na uno uno u briew lait tang na phi, yn bret ïa u hapoh ka thliew ba-dap da ki sing.” U syiem u la jubab, “Ho-oid, ka hukum kaba pyrkhing, ka aiñ jong ki Mid bad ki Persia, ka bym lah ban pynkylla.”

¹³ Nangta ki la ong ha u syiem, “U Daniel, uwei na kiba shah ringmraw na Judah, um shym burom ïa u Syiem Kynrad lane kohnguh ïa ka hukum kaba phi la pynmih. U la duwai tista lai sien shi sngi.”

¹⁴ Haba u syiem u la ïohsngew ïa kane, u la sngewsih eh bad u la leh ïa kaba bha tam ban shem lad ban pyllait im ïa u Daniel. U la ïai pyrshang haduh ban da sep sngi.

¹⁵ Nangta ki rangbah ki la wan biang sha u syiem bad ki la ong ha u, “U Syiem Kynrad u tip ba kat kum ki aiñ jong ki Mid bad ki Persia ym don kano kano ka hukum kaba u syiem u la ai ïa kaba lah ban pynkylla.”

¹⁶ Kumta u syiem u la ai ki hukum ban kem ïa u Daniel bad ban bret ïa u shapoh ka thliew kaba dap da ki sing. U la ong ha u Daniel, “Ai ba U Blei jong me, ïa uba me shakri hok katta katta, un pyllait im ïa me.”

¹⁷ Ïa u maw la buh halor ka jaka rung shapoh ka thliew, bad u syiem u la buh ïa ka muhor syiem jong u bad ka jong ki rangbah donburom jong u halor jong u maw, khnang ba yn ym don mano mano ba lah ban pyllait im ïa u Daniel.

¹⁸ Nangta u syiem u la leit phai pat sha ka ïingsyiem bad u la pynlut ïa ka miet khlem ïohthiah, khlem bam lane khlem kano kano ka jingpynsngewbha.

¹⁹ Dang step phyrngab u syiem u la khie bad u la pynkloi sha ka thliew.

²⁰ Haba u la poi hangta, u la khot jam da ka jingkhmih lynti, “Ko Daniel, u shakri jong U Blei uba im! Hato U Blei uba me shakri hok katta katta u la lah mo ban pyllait im ïa me na ki sing?”

²¹ U Daniel u la jubab, “Ai ba u Syiem Kynrad un im junom!

²² U Blei u la phah ïa u angel jong u ban set ïa ki shyntur jong ki sing khnang ba kin ym pynmynsaw ïa nga. U la leh ïa kane namar u tip ba nga la long uba lui lui bad namar ba ngam shym la leh kano kano kaba bakla ïa phi, ko Syiem Kynrad.”

²³ U syiem u la kmen shikatdei bad u la ai hukum ba yn tan noh ïa u Daniel na ka thliew. Kumta ki la tan ïa u shajrong bad ki la ïohi ba um shym la mynsaw ei ei, namar u la shaniah ha U Blei.

²⁴ Nangta u syiem u la ai ki hukum ban kem ïa baroh ki rangbah kiba la lah mudui ïa u Daniel, bad la bret ïa ki, lem bad ki tnga jong ki bad ki khun jong ki, shapoh ka thliew kaba dap da ki sing. Ha shuwa ban kin poi sha tbian jong ka thliew, ki sing ki la kynrup ïa ki bad pynkheiñ ïa ki shyieng jong ki baroh.

²⁵ Nangta u syiem Darius u la thoh sha ki briew jong ki jaitbynriew baroh, ki jait ki kynja, bad ki ktien ki thylliej ha ka pyrthei: Khublei!

²⁶ Nga hukum ba ha kylleng ka hima jong nga uwei pa uwei u dei ban sheptieng bad burom ïa U Blei jong u Daniel. “U long U Blei uba im bad un synshar junom. Ïa ka hima jong u yn ym pynjot lano lano ruh, bad ka bor jong u kan ym poi lano lano ruh sha ka jingkut.

²⁷ U pynim bad u pyllait im; u leh ïa ki jingphylla bad ki kambah ha bneng bad ha pyrthei. U la pynim ïa u Daniel na kaba shah pynïap ha ki sing.”

²⁸ U Daniel u la manbha ha ka por ba u Darius u synshar bad ha ka jingsynshar jong u Syros u nong Persia.