DANIEL 5 - Khasi CL Bible (BSI)

Ka jingkhawai jong u Belshassar

¹ Ha kawei ka miet u syiem Belshassar u la khot sngewbha shihajar ngut ki rangbah donburom sha ka jingkhawai kaba khraw, bad ki la ïadih waiñ lang.

² Katba ki dang ïadih, u Belshassar u la ai hukum ban wallam ha ki khuri ksiar bad rupa bad ha ki pliang kiba u Nebukhadnessar u kpa jong u, u la rah noh na ka Templ kaba ha Jerusalem. U syiem u la phah shim ïa ki khnang ba ma u, ki rangbah donburom jong u, ki tnga jong u, bad ki tnga kliar jong u ki lah ban dih na ki.

³ Shisyndon ïa ki khuri ksiar bad rupa la wallam shapoh, bad ma ki baroh ki la ïadih waiñ na ki

⁴ bad ki la ïaroh ïa ki blei kiba la thaw da ka ksiar, ka rupa, ka rnong, ka nar, ka dieng bad u maw.

⁵ Kynsan kynsan la mihpaw ka kti briew bad ka la sdang ban thoh ha ka kynroh ba la astor jong ka ïingsyiem, ha kaba ka jingshai na ki sharak ka shai phyrnai eh. Bad u syiem u la ïohi ïa ka kti katba ka dang thoh.

⁶ U la kylla lieh blaid blaid bad u la sheptieng katta katta ba ki khohsiew jong u ki la sdang ban khynñiuh.

⁷ U la pyrta ïano ïano ban wallam shapoh ïa ki nongleh myntor, ki nongleh byrtong, bad ki nongpeit kti. Haba ki la ïawan shapoh, u syiem u la ong ha ki, “Ïa uno uno uba lah ban pule ïa kane ka jingthoh bad ïathuh ïa nga ïa ka jingmut jong ka yn pynphong ha ki jaiñkup syiem kiba sawbthuh, un deng u kynjri ksiar ka jingpyndonburom sawdong ka ryndang jong u, bad un long uba lai ha ka bor hapoh ka hima.”

⁸ Ki nongai jingmut jong u syiem ki la ïawan sha khmat, hynrei ym don uwei ruh na ki uba lah ban pule ïa ka jingthoh lane ïathuh ha u syiem aïu ka kit jingmut.

⁹ Ha ka jingjynjar jingmut u syiem Belshassar u la nang kham lieh blaid blaid, bad ki rangbah donburom jong u kim tip shuh kumno yn leh.

¹⁰ Ka kmie jong u syiem ka la ïohsngew ïa ka jingsawa ba la pynmih da u syiem bad ki rangbah donburom jong u bad ka la rung sha ka kamra jingkhawai. Ka la ong, “To u syiem un im junom! Sngewbha wat da khih khuslai than bad wat da lieh blaid blaid.

¹¹ U don u briew ha ka hima jong phi uba don ïa u mynsiem jong ki blei bakhuid hapoh jong u. Mynba u kpa jong phi u long syiem, une u briew u la pyn-i ka jingmut kaba bha, ka jingtip, bad ka jingstad kum ka jingstad jong ki blei. Bad u syiem Nebukhadnessar, u kpa jong phi, u la pynlong ïa u, u khlieh duh jong ki nongbatai kupar, ki nongleh myntor, ki nongleh byrtong, bad ki nongpeit kti.

¹² U la don ka jinglah kaba kham pher bad u long uba stad bad uba tbit ha kaba batai ïa ki jingphohsniew, uba ai jubab ïa ki jingkyntip, bad batai ïa ki jingmaïan; kumta to phah khot ïa une u briew, u Daniel, ïa uba u syiem u la ai kyrteng u Belteshassar, bad un ïathuh ïa phi aïu kane baroh ka kit jingmut.”

U Daniel u batai ïa ka jingthoh

¹³ Ïa u Daniel la wallam shisyndon shapoh sha ka jaka ba don u syiem, bad u syiem u la ong ha u, “Hato me dei u Daniel, uto u Jiw uba shah ringmraw ïa uba u kpa jong nga u syiem u la wallam hangne na Judah?

¹⁴ Nga la ïohsngew ba u mynsiem jong ki blei bakhuid u don hapoh jong me bad ba me long uba tbit bad me don ka jingtip bad ka jingstad.

¹⁵ Ïa ki nongai jingmut bad ki nongleh myntor la wallam shapoh ban pule ïa kane ka jingthoh bad ban ïathuh ha nga aïu ka kit jingmut, hynrei kim shym lah ban shem ïa ka jingmut.

¹⁶ Mynta nga la ïohsngew ba me lah ban shem ïa ki jingmut barieh bad batai ïa ki jingmaïan. Lada me lah ban pule ïa kane ka jingthoh bad ïathuh ïa nga aïu ka kit jingmut, yn pynkup ïa me ha ki jaiñkup syiem ba sawbthuh, yn pyndeng ha me ïa u kynjri ksiar jong ka jingpyndonburom sawdong ka ryndang jong me, bad men long uba lai ha ka bor hapoh ka hima.”

¹⁷ U Daniel u la jubab, “Buh ïa ki jingai sngewbha jong phi na ka bynta ïa lade lane ai ïa ki hano hano ha uwei pat. Ngan pule na ka bynta u Syiem Kynrad ïa kaei kaba la thoh bad ïathuh ha phi ïa ka jingmut jong ka.

¹⁸ “U Blei Bahakhlieh Tam Eh u la pynlong ïa u Nebukhadnessar, u kpa jong me, u syiem uba khraw bad ai ha u ka burom bad ka jinglong syiem.

¹⁹ U la long uba khraw katta katta ba ki briew jong ki hima baroh, ki jait ki kynja, bad ki ktien ki thylliej ki la sheptieng ïa u bad khynñiuh. Lada u la kwah ban pynïap ïano ïano u leh kumta; lada u kwah ban ri pynim ïano ïano, u leh kumta. U pyndonburom lane pynjahburom ïa uno uno, uba u kwah.

²⁰ Hynrei namar ba u la long uba sarong, uba eh ryndang, bad uba runar, la weng noh ïa u na ka khet syiem bad u la duh noh ïa ka jaka badonburom jong u.

²¹ La beh noh ïa u na ka imlang ka sahlang u bynriew, bad ka jingmut jingpyrkhat jong u ka la long kum u mrad. U la shong la sah bad ki kada khlaw, u la bam phlang kum u masi dab bad u la thiah ha ka jaka bym don jingkah khlem kano kano ka ban ïada ïa u na ka umjer. Ha kaba khatduh u la pdiang ba U Blei Bahakhlieh Tam Eh u synshar ïa baroh ki hima ki briew bad u lah ban ai ïa ki ha uno uno uba u jied.

²² “Hynrei ma phi, u khun jong u, phim shym la pynrit ïa lade, wat la phi la tip ïa kane baroh.

²³ Phi la leh pyrshah ïa U Trai jong ka bneng bad phi la wallam shapoh ïa ki khuri bad ïa ki pliang kiba la shim na ka Templ jong u. Ma phi, ki rangbah donburom jong phi, ki tnga jong phi, bad ki tnga kliar jong phi ki la dih waiñ na ki bad ki la ïaroh ïa ki blei kiba la shna da ka ksiar, ka rupa, ka rnong, ka nar, ka dieng, bad u maw — ki blei ki bym lah ban ïohi lane ïohsngew bad ba kim lah ban tip ei ei. Hynrei phim shym la pyndonburom ïa U Blei uba rai la phin im ne phin ïap bad uba synshar ïa kaei kaei baroh kaba phi leh.

²⁴ Dei kata keiñ balei U Blei u la phah ïa ka kti ban thoh ïa kine ki kyntien.

²⁵ “Kane ka long kaei kaba la thoh: ‘Ka dak jingkheiñ, ka dak jingkheiñ, ka jingthew, ki jingbynta.’

²⁶ Bad kane ka dei ka jingmut jong ka: Ka dak jingkheiñ, U Blei u la kheiñ ïa ki sngi jong ka hima jong phi bad u la wallam ïa ka sha ka jingkut;

²⁷ Ka jingthew, ïa phi la thew ha ki tarajur bad la shem ba phi duna palat;

²⁸ Ki jingbynta, Ïa ka hima jong phi la pynbynta bad la ai ha ki Mid bad ki Persia.”

²⁹ Mar kumta hi u Belshassar u la ai hukum ïa ki shakri jong u ban pynphong ïa u Daniel ha ka jaiñkup syiem kaba sawbthuh bad ban pyndeng u kynjri ksiar ka jingpyndonburom sawdong ka ryndang jong u. Bad u la pynlong ïa u, uba lai ha ka bor hapoh ka hima.

³⁰ Ha kata kajuh ka miet ïa u Belshassar, u syiem ka Babilonia, la pynïap;

³¹ bad u Darius u nong Mid, uba ha kata ka por u don hynriewphew ar snem ka rta, u la knieh ïa ka bor syiem.