DANIEL 4 - Khasi CL Bible (BSI)

Ka jingphohsniew kaba ar jong u Nebukhadnessar

¹ U syiem Nebukhadnessar u la phah ïa ka khubor harum sha ki briew jong baroh ki jaitbynriew, ki jait ki kynja, bad ki ktien ki thylliej ha ka pyrthei: “Khublei!

² To shahshkor ïa ka jingïathuh jong nga ïa ki jingphylla bad ki kambah kiba U Blei Bahakhlieh Tam Eh u la pyn-i ha nga.

³ “Katno kiba khraw ki long ki jingphylla jong U Blei kiba u pyn-i ha ngi! Katno kiba khrawbor ki long ki kambah kiba u leh! U Blei u long u syiem junom; un synshar ha ki por baroh.

⁴ “Nga la shongsuk ha la ka ïing syiem, da kaba lehkmen ïa ka jingmanbha bakhraw.

⁵ Hynrei nga la ïoh ka jingphohsniew kaba pynsheptieng bad nga la ïohi ki jingïohipaw kiba shyrkhei mynba nga dang ïohthiah.

⁶ Nga la hukum ban wallam sha nga ïa baroh ki nongai jingmut jong u syiem ha Babilon khnang ba ki lah ban ïathuh ha nga kaei ka jingmut jong ka jingphohsniew.

⁷ Te la wallam shapoh ïa baroh ki nongbatai kupar, ki nongleh myntor, ki nongleh byrtong, bad ki nongpeit kti, bad nga la ïathuh ha ki ïa ka jingphohsniew jong nga, hynrei kim lah ban batai ïa ka ha nga.

⁸ Te u Daniel u la wan shapoh. (La khot ruh ïa u, u Belteshassar, ha ka kyrteng u blei jong nga.) U mynsiem jong ki blei bakhuid u don hapoh jong u, kumta nga la ïathuh ha u ïa kaei kaba nga la phohsniew. Nga la ong ha u:

⁹ Ko Belteshassar, u rangbah jong ki nongbatai kupar, nga tip ba u mynsiem jong ki blei bakhuid u don hapoh jong me, bad ba me shemphang ïa ki jingmaïan baroh. Kane ka long ka jingphohsniew jong nga. To ïathuh ïa nga kaei ka jingmut jong ka.

¹⁰ “Mynba nga dang ïohthiah, nga la ïoh ka jingïohipaw ïa u dieng bakhraw ha ka pdeng jong ka pyrthei.

¹¹ U la nang san nang san tad haduh ba u la kynjoh ïa ka sahit bneng bad ba lah ban ïohi da baroh kiba don ha ka pyrthei.

¹² Ki sla jong u ki long kiba itynnat, bad la pynshlei ïa u da ki soh — kiba kyrhai na ka bynta ka pyrthei baroh kawei ban bam. Ki mradkhlaw ki pynjahthait ha ka syrngiew jong u, ki sim ki shna ïa ki skum ha ki tnat jong u, bad baroh ki jait jingthaw ba-im ki la bam ïa u soh jong u.

¹³ “Katba nga dang pyrkhat shaphang ka jingïohipaw, nga la ïohi ïa u angel uba wan hiar na bneng, uba la kloi bad uba peitngor.

¹⁴ U la pynbna ha ka sur bajam, ‘Pom ïa u dieng bad khet noh ïa ki tnat jong u; sloit ïa ki sla jong u bad pynsaphriang ïa ki soh jong u. Beh noh ïa ki mrad napoh jong u bad ïa ki sim na ki tnat jong u.

¹⁵ Hynrei to ieh ïa ka dyngkhong jong u ha khyndew lem bad ka syrwiang nar bad rnong sawdong jong u. Iehnoh ïa u hangta ha pyntha bad u phlang. “ ‘Mynta ai ba ka umjer kan hap halor une u briew, bad shah ïa u ban im bad ki mrad bad ki jingthung.

¹⁶ Haduh hynñiew snem un ym don ka bor pyrkhat briew, hynrei ka jingpyrkhat kum u mrad.

¹⁷ Kane ka dei ka jingrai jong ki angel kiba la kloi bad kiba peitngor. Kumta te, shah ba ki briew baroh ha kylleng ban tip ba U Blei Bahakhlieh Tam Eh u don ka bor halor jong ki hima ki briew bad ba u lah ban ai ïa ki ha uno uno uba u jied — wat ha ki bym da paw eh na ki briew.’

¹⁸ “Kane ka long ka jingphohsniew kaba nga la ïoh,” ong u syiem Nebukhadnessar. “Mynta, ko Belteshassar, ïathuh ïa nga kaei ka jingmut jong ka. Ym don man mano na ki nongai jingmut na ka ïingsyiem jong nga kiba lah ban ïathuh ha nga, hynrei me lah, namar ba u mynsiem jong ki blei bakhuid u don hapoh jong me.”

U Daniel u batai ïa ka jingphohsniew

¹⁹ Ha kane, u Daniel, ïa uba la khot ruh u Belteshassar, u la sngewsheptieng katta katta ba um lah ban ong ei ei. U syiem u la ong ha u, “Ko Belteshassar, wat ai ba ka jingphohsniew bad ka khubor jong ka kin pynsheptieng ïa me.” U Belteshassar u la phai ktien, “Ko Syiem Kynrad, nga kwah ba ka jingphohsniew bad ka jingbatai ïa ka kan dei ïa ki nongshun jong phi bad ym ïa phi.

²⁰ U dieng, uba jrong katta katta uba la kynjoh ïa ka sahit bneng, uba lah ban ïohi da baroh kiba don ha ka pyrthei.

²¹ Ki sla jong u ki la long kiba itynnat, bad u la don kyrhai ki soh ha u ban bsa ïa ka pyrthei baroh kawei. Ki mradkhlaw ki la pynjahthait hapoh jong u, bad ki sim ki la thaw ïa ki skum jong ki ha ki tnat jong u.

²² “Ko Syiem Kynrad, phi long u dieng, uba jrong bad uba khlaiñ. Phi la long khraw haduh katta kat ban kynjoh ïa ka sahit bneng, bad ka bor jong phi ka ïar halor ka pyrthei baroh kawei.

²³ Katba u Syiem Kynrad u dang peit, u angel u la wan hiar na bneng bad u la ong, ‘Pom ïa u dieng bad pynjot ïa u, hynrei iehnoh ïa ka dyngkhong ha ka khyndew. Teh da u syrwiang nar bad rnong sawdong jong ka, bad iehnoh hangta ha ka pyntha lem bad u phlang. Ai ba ka umjer kan hap halor jong une u briew, bad shah ïa u ban im hangta bad ki mrad na ka bynta hynñiew snem.’

²⁴ “Kane, te, ka long kaei ba ka mut, ko Syiem Kynrad, bad kane ka long kaei kaba U Blei Bahakhlieh Tam Eh u la pynbna ba kan jia ha phi.

²⁵ Yn beh noh ïa phi na ka imlang ka sahlang u bynriew bad phin shong phin sah bad ki mradkhlaw. Hynñiew snem phin bam phlang kum u masi dab, bad thiah ha bym don jingkah ei ei, ha kaba ka umjer kan hap halor jong phi. Te phin pdiang ba U Blei Bahakhlieh Tam Eh u bat synshar ïa baroh ki hima ki briew, bad ba u lah ban ai ïa ki ha uno uno uba u jied.

²⁶ U angel u la ai hukum ban iehnoh ïa ka dyngkhong ha ka khyndew. Kane ka mut ba phin sa long syiem pat haba phi pdiang ba U Blei u synshar ïa ka pyrthei baroh kawei.

²⁷ Kumta te, ko Syiem Kynrad, to bud ïa ka jingai jingmut jong nga. Sangeh ban leh pop, to leh ïa kaba dei, bad to sngewsynei ïa kiba duk. Te phin ïailong uba manbha.”

²⁸ Kane baroh ka la jia ïa u syiem Nebukhadnessar.

²⁹ Tang khat-ar bnai hadien, katba u dang ïaid halor ka tnum jong ka ïingsyiem jong u ha Babilon,

³⁰ u la ong, “Ha khmih katno khraw ka Babilon ka long! Nga la tei ïa ka kum ka nongbah jong nga ban pyn-i ïa ka bor bad ka jingkhlaiñ jong nga, ka burom jong nga bad ka jinglong syiem jong nga.”

³¹ Ha shuwa ba ki kyntien kin mih shabar na ka shyntur jong u, ka sur ka la kren na bneng, “Ko syiem Nebukhadnessar, to shahshkor ïa kaei kaba nga ong! Ïa ka bor ba kynja syiem jong me la shim noh mynta na me.

³² Ïa me yn beh noh na ka imlang ka sahlang u bynriew, men shong men sah bad ki mradkhlaw, bad bam phlang kum u masi dab haduh hynñiew snem. Nangta men pdiang ba U Blei Bahakhlieh Tam Eh u don ka bor halor baroh ki hima ki briew bad ba u lah ban ai ïa ki ha uno uno uba u jied.”

³³ Ki kyntien ki wan urlong shisha mar kumta hi. Ïa u Nebukhadnessar la beh noh na ka imlang ka sahlang u bynriew bad u la bam phlang kum u masi dab. Ka umjer ka la hap halor ka met jong u, bad u shñiuh jong u, u la san jrong kum ki sner jong ki pukni bad ki tyrsim jong u ki jrong kum ki tnaw jong ki sim.

U Nebukhadnessar u ïaroh ïa U Blei

³⁴ “Haba ki hynñiew snem ki la leit,” la ong u syiem, “Nga la khmih shajrong sha sahit bneng, bad ka jingtipbriew jong nga ka la wan phai. Nga la ïaroh ïa U Blei Bahakhlieh Tam Eh bad nga la ai ka jingpyndonburom bad ka burom ïa uta uba im junom. “Un synshar junom, bad ka hima jong u kan neh ha ki por baroh.

³⁵ U la khmih halor ki briew jong ka pyrthei kum bym long ei ei; ki angel ha bneng bad ki briew ha ka pyrthei ki don hapoh ka jingsynshar jong u. Ym don mano mano ba lah ban pyrshah ïa ka mon jong u lane kylli jingkylli ïa kaei kaba u leh.

³⁶ “Haba ka jingtipbriew jong nga ka la wan phai, ïa ka burom jong nga, ka jinglong syiem jong nga, bad ka burom jong ka hima jong nga la ai pat ha nga. Ki rangbah synshar jong nga bad ki rangbah donburom jong nga ki la pdiang sngewbha ïa nga, bad la ai pat ha nga ïa ka bor ba kynja syiem, bad wat ka jingpyndonburom kaba kham khraw ban ïa kaba mynshuwa.

³⁷ “Bad mynta, ma nga, u Nebukhadnessar, nga ïaroh, nga pyndon burom, bad nga ai burom ïa U Syiem jong ka Bneng. Kaei kaei baroh kaba u leh ka long kaba dei bad kaba hok, bad u lah ban pynhiar ïa uno uno uba leh sarong.”