DANIEL 3 - Khasi CL Bible (BSI)

U Nebukhadnessar u hukum ïa uwei pa uwei ban mane ïa ka durbriew ksiar

¹ U syiem Nebukhadnessar u la phah thaw ka durbriew ksiar, arphew hynñiew mitar ka kynjang bad jan lai mitar ka pyngkiang, bad u la phah pynïeng ïa ka ha ka pyntha Dura ha ka probins jong ka Babilon.

² Te u syiem u la ai hukum ïa baroh ki rangbah synshar jong u ban ïawanlang — ki khun syiem shynrang, ki lat, ki lat kiba kham hapoh, ki kommisshonor, ki nongbat tyngka, ki nongbishar, ki majistor, bad kiwei pat ki rangbah synshar jong ki jylla. Ki la dei ban wan sha ka jingpynkyntang ïa ka durbriew kaba u syiem Nebukhadnessar u la phah pynïeng.

³ Haba kine ki rangbah synshar baroh ki la ïalumlang na ka bynta ka jingpynkyntang bad ba ki la ïeng ha khmat jong ka durbriew,

⁴ u sangot u la pynbna ha ka sur bajam, “Ko ki briew jong ki ri baroh, ki jaitbynriew bad ki jait ktien!

⁵ Phin ïohsngew ïa ka jingriew ki turoi, ba la bud da ka jingput ïa ki tangmuri, ki jingtem ksai, ki marynthing, bad ki duitara; bad nangta sa baroh kiwei pat ki tiar put tiar tem kin ïasoh lang. Tang mar ïasdang ka jingput jingtem, phi dei ban dem ngon bad mane ïa ka durbriew ksiar kaba u syiem Nebukhadnessar u la phah pynïeng.

⁶ Ïa uno uno u bym dem ngon bad mane yn bret kloi lan ha ka lawar ding baklang.”

⁷ Bad kumta, mar syn ïohsngew ïa ka jingsawa ki tiar put tiar tem, ki briew jong baroh ki ri, ki jaitbynriew, bad ki jait ktien ki la ïadem ngon bad mane ïa ka durbriew ksiar kaba u Syiem Nebukhadnessar u la phah pynïeng.

Ki lai ngut ki paralok jong u Daniel ki la shah pharep ba ki long ki bymkohnguh

⁸ Ka dei ha kata ba katto katne ki nong Babilonia ki la shim kabu ban kren pyrshah ïa ki Jiw.

⁹ Ki la ong ha u syiem Nebukhadnessar, “Ai ba u Syiem Kynrad un im junom!

¹⁰ U Syiem Kynrad u la pynmih ka hukum ba tang mar ïasdang ka jingput jingtem, uwei pa uwei u dei ban dem ngon bad mane ïa ka durbriew ksiar,

¹¹ bad ba ïa uno uno u bym dem ngon bad mane dei ban bret ha ka lawar ding baklang.

¹² La don katto katne ngut ki Jiw ïa kiba phi la buh ban khmih ïa ka probins jong ka Babilon — u Shadrakh, u Meshakh, bad u Abednego — ki bym shym kohnguh ïa ki hukum u Syiem Kynrad. Kim shym mane ïa u blei jong phi lane dem ngon sha ka durbriew kaba phi la phah pynïeng.”

¹³ Hangta hi, u syiem u la bitar shla bad u la hukum ban wallam ïa ki lai ngut ki rangbah sha u.

¹⁴ U la ong ha ki, “Ko Shadrakh, Meshakh, bad Abednego, hato ka long kaba shisha ba phi kyntait ban mane ïa u blei jong nga bad ban dem ngon sha ka durbriew kaba nga la phah pynïeng?

¹⁵ Te mynta, tang mar shu ïohsngew ïa ka sur jong ki turoi, ki tangmuri, ki jingtem ksai, ki marynthing, ki duitara, bad baroh kiwei pat ki tiar put tiar tem, to dem ngon bad mane ïa ka durbriew. Lada phim leh kumta, yn bret kloi lan ïa phi ha ka lawar ding baklang. Hato phi pyrkhat ba don uno uno u blei uba lah ban pyllait im ïa phi?”

¹⁶ U Shadrakh, u Meshakh, bad u Abednego ki la jubab, “Ko Syiem Kynrad, ngin ym pyrshang ban ïasaid da ïa lade.

¹⁷ Lada U Blei uba ngi shakri u lah ban pyllait im ïa ngi na ka lawar ding baklang bad na ka bor jong phi, te un leh.

¹⁸ Hynrei wat lada um leh, to u Syiem Kynrad un tip skhem ba ngin ym mane ïa u blei jong phi, bad ngin ym dem ngon sha ka durbriew ksiar kaba phi la phah pynïeng.”

Ïa ki lai ngut ki paralok jong u Daniel la rai pynïap

¹⁹ Te u Nebukhadnessar u la bitar, bad ka durkhmat jong u ka la kiew sawlep da ka jingbitar ïa u Shadrakh, u Meshakh, bad u Abednego. Kumta u la hukum ïa ki rangbah jong u ban pynkhluit ïa ka lawar ding hynñiew shah ban ïa kaba mynshuwa.

²⁰ Bad u la hukum ïa ki briew kiba khlaiñ tam ha ka kynhun shipai jong u ban khum ïa ki lai ngut ki rangbah bad ban bret ïa ki ha ka lawar ding baklang.

²¹ Kumta ki la khum ïa ki, ki da phong jaiñ pura — ki sopti-poh, ka jaiñkup jynsur, ki tupia, bad baroh — bad ki la bret ïa ki ha ka lawar ding baklang.

²² Mynta namar ba u syiem u la ai ki hukum bapyrkhing na ka bynta ban pynlong ïa ka lawar ding kaba khluit haduh katta katta, ki thylliej ding ki la thang ïa ki nongap phira kiba ïalam ïa ki rangbah sha ka lawar ding.

²³ Te u Shadrakh, u Meshakh, bad u Abednego, kiba dang shah khum, ki la hap sha ka pdeng jong ka ding baklang.

²⁴ Kynsan kynsan u Nebukhadnessar u la rynsied da kaba ïeng ha ka jinglyngngoh. U la kylli ïa ki rangbah synshar, “Hato ym dei ba ngi la khum lai ngut ki rangbah bad bret ïa ki ha ka lawar ding baklang?” Ki la jubab, “Ho-oid, ngi la leh kumta, ko Syiem Kynrad.”

²⁵ “Te balei ba nga ïohi saw ngut ki rangbah kiba ïaid ha ka ding?” u la kylli. “Ïa ki ym shym la khum, bad kim shym pyn-i kano kano ka dak jong ka jingmynsaw — bad uba saw u i kum u angel.”

La pyllait noh ïa ki lai ngut ki rangbah bad la kyntiew kam

²⁶ Kumta u Nebukhadnessar u la leit kiew sha ka jingkhang jong ka lawar ding baklang bad u la pyrta, “Ko Shadrakh! Ko Meshakh! Ko Abednego! Ko shakri jong U Blei Bahakhlieh Tam Eh! To mihnoh shabar!” Bad kumta hi ki la wan mih shabar.

²⁷ Baroh ki khun syiem shynrang, ki lat, ki lat kiba kham hapoh, bad kiwei pat ki rangbah synshar jong u syiem ki la ïalumlang ban khmih ïa ki lai ngut ki rangbah, ki bym shym la pynmynsaw da ka ding. U shñiuh jong ki u khlem ing, ki jaiñ jong ki, ki khlem ing, bad ym shym la don kano kano ka jingsma tdem ha ki.

²⁸ U syiem u la ong, “To ïaroh ïa U Blei jong u Shadrakh, u Meshakh, bad u Abednego! U la phah ïa u angel jong u bad pyllait im ïa kine ki rangbah kiba la shakri bad shaniah ha u. Kim shym la kohnguh ïa ka hukum jong nga bad ki la kheiñduh ïa la ka jingim ban ïa kaba dem ngon bad mane ïa uno uno u blei lait tang u jong ki hi.

²⁹ “Te mynta nga hukum ba lada uno uno na kano kano ka hima, ka jaitbynriew, lane ka ktien uba kren khlem burom ïa U Blei jong u Shadrakh, u Meshakh, bad u Abednego, dei ban tar ïa u na ka kti bad kjat, bad ïa ka ïing jong u dei ban pynlong ka kynton ki jingpra. Ym don uno uno u blei uba lah ban pyllait im kumne.”

³⁰ Bad u syiem u la pynkiew kyrdan ïa u Shadrakh, u Meshakh, bad u Abednego sha ki kyrdan ba kham halor ha ka probins jong ka Babilon.