DANIEL 2 - Khasi CL Bible (BSI)

Ka jingphohsniew jong u Nebukhadnessar

¹ Ha ka snem kaba ar ba u Nebukhadnessar u long syiem, u la ïoh ka jingphohsniew. Ka la pynkhuslai shibun eh ïa u kat haduh ba um shym ïohthiah,

² kumta u la phah khot ïa ki nongbatai kupar, ki nongleh myntor, ki nongkheiñ ksuid bad ki nongleh byrtong ban ïawan bad batai ïa ka jingphohsniew ha u. Haba ki la ïawan bad ïeng ha khmat u syiem,

³ u la ong ha ki, “Nga la khuslai shaphang ka jingphohsniew kaba nga la ïoh. Nga kwah ban tip kaei ka jingmut jong ka.”

⁴ Ki la jubab ïa u syiem ha ka ktien Aramaik, “To u Syiem Kynrad un im junom! To ïathuh ha ngi ïa ka jingphohsniew jong phi, bad ngin batai ïa ka ha phi.”

⁵ U syiem u la ong ha ki, “Nga la kut jingmut ba phi dei ban ïathuh ïa nga ïa ka jingphohsniew bad nangta ïathuh ïa nga kaei ka jingmut jong ka. Lada phim lah, ngan phah tar ïa ka kti ka kjat jong phi kawei na kawei pat bad ngan pynlong ïa ki ïing jong phi ka kynton ki jingjot.

⁶ Hynrei lada phi lah ban ïathuh ha nga ïa baroh ar, ka jingphohsniew bad ïa ka jingmut jong ka, ngan ainong ïa phi da ki jingai sngewbha bad ka jingpyndonburom kaba khraw. Te mynta, ïathuh ha nga ïa ka jingphohsniew bad kaei ka jingmut jong ka.”

⁷ Ki la jubab biang ïa u syiem, “Lada u Syiem Kynrad un shu ïathuh ïa ngi ïa ka jingphohsniew, ngin batai ïa ka.”

⁸ Ha kata, u syiem u la kren jam, “Kumba nga la pyrkhat! Phi pyrshang ban ïoh por, namar phi ïohi ba nga la kut jingmut

⁹ ban ai ha phi baroh ïa kajuh ka jingpynshitom lada phim ïathuh ha nga ïa ka jingphohsniew. Phi la ïamynjur para ma phi ban ïathuh ïa nga ki jinglamler namar ba phi kyrmen ba ha ka por babiang kiei kiei kin kylla. Ïathuh ïa nga ïa ka jingphohsniew, bad nangta ngan tip ba phi lah ruh ban ïathuh ha nga kaei ka jingmut jong ka.”

¹⁰ Ki nongai jingmut ki la jubab, “Ym don mano mano ha sla pyrthei kiba lah ban ïathuh ïa u Syiem Kynrad ïa kaei kaba phi kwah ban tip. Ym don u syiem, ym don wat uba khraw tam bad uba donbor tam, uba la pynlong kum kane ka jingdawa na ki nongbatai kupar, ki nongleh myntor bad ki nongleh byrtong.

¹¹ Kaei kaba u Syiem Kynrad u pan ka long kaba eh haduh katta katta ba ym don mano mano ba lah ban leh ïa kata lait tang ki blei, bad kim shong kim sah hapdeng ki bynriew.”

¹² Ha kata, u syiem u la bitar shla bad u la hukum ban pynïap khoit ïa baroh ki nongai jingmut ïa u syiem ha Babilon.

¹³ Kumta la pynmih ïa ka hukum na ka bynta jong ki baroh ban shah pynïap, kynthup ïa u Daniel bad ki paralok jong u.

U Blei u pyn-i ïa u Daniel aïu ka jingphohsniew ka kit jingmut

¹⁴ Nangta u Daniel u la leit sha u Ariokh, u rangbah ai hukum jong ka kynhun ai jingïada jong u syiem, uba la ïoh hukum ban pyndep ïa ka jingpynïap. Da kaba jied biang biang ïa ki kyntien jong u,

¹⁵ u la kylli ïa u Ariokh balei ba u syiem u la pynmih kum kane ka hukum kaba eh. Kumta u Ariokh u la ïathuh ïa u Daniel ïa kaei kaba la lah jia.

¹⁶ U Daniel shisyndon u la leit bad u la ïoh por da ka jingai jingbit jong u syiem, khnang ba u lah ban ïathuh ïa u syiem aïu ka jingphohsniew ka kit jingmut.

¹⁷ Nangta u Daniel u la leit sha ïing bad u la ïathuh ïa ki paralok jong u — u Hananaïah, u Mishael, bad u Asaraïah — ïa kaei kaba la jia.

¹⁸ U la ong ïa ki ban duwai ha U Blei ka bneng na ka bynta ka jingisynei bad ban kyrpad ïa u ban batai ïa ka jingmaïan ha ki khnang ba kin ym shah pynïap lem bad kiwei pat ki nongai jingmut ha Babilon.

¹⁹ Te ha kata kajuh ka miet ïa ka jingmaïan la pynpaw ha u Daniel ha ka jingïohipaw, bad u la ïaroh ïa U Blei ka bneng:

²⁰ “U Blei u long uba stad bad uba donbor! to ïaroh ïa u junom la junom.

²¹ U bat synshar ïa ki por bad ki aïom; u pynlong bad u weng ïa ki syiem; long ma u, uba ai ka jingstad bad ka jingshemphang.

²² U pynpaw ïa kiei kiei kiba jylliew bad kiba rieh; u tip kaei kaba la buhrieh ha ka jingdum, bad ïa u hi la ker sawdong da ka jingshai.

²³ Nga ïaroh ïa me bad pyndonburom ïa me, A U Blei ki kpa tymmen jong nga. Me la ai ha nga ka jingstad bad ka jingkhlaiñ; me la jubab ïa ka jingduwai jong nga bad me la pyn-i ha ngi kaei ba ngin ïathuh ha u syiem.”

U Daniel u ïathuh ha u Syiem ïa ka jingphohsniew bad batai ïa ka

²⁴ Kumta u Daniel u la leit sha u Ariokh, ïa uba u syiem u la lah hukum ban pynïap ïa ki nongai jingmut ïa u syiem. U la ong ha u, “Wat pynïap ïa ki. Ïalam ïa nga sha u syiem, bad ngan ïathuh ha u aïu ka jingphohsniew jong u ka kit jingmut.”

²⁵ Kumta hi u Ariokh u la ïalam ïa u Daniel sha u syiem Nebukhadnessar bad u la ïathuh ha u syiem, “Nga la shem uwei na ki Jiw kiba la shah ringmraw, uba lah ban ïathuh ha u Syiem Kynrad ïa ka jingmut jong ka jingphohsniew jong phi.”

²⁶ U syiem u la ong ha u Daniel (ïa uba la khot ruh u Belteshassar), “Hato me lah ban ïathuh ha nga ïa kaei kaba nga phohsniew bad aïu ka kit jingmut?”

²⁷ U Daniel u la jubab, “Ko Syiem Kynrad, ym don uno uno u nongleh byrtong, u nongleh myntor, u nongbatai kupar, lane u nongkhmih khlur uba lah ban ïathuh ha phi ïa kata.

²⁸ Hynrei don U Blei ha bneng, uba pynpaw ïa ki jingmaïan. U la pyntip ïa u Syiem Kynrad kaei ka ban jia ha ka lawei. Mynta ngan ïathuh ha phi ïa ka jingphohsniew, ka jingïohipaw kaba phi lah ïoh mynba phi dang ïohthiah.

²⁹ “Mynba u Syiem Kynrad u dang ïohthiah, phi la phohsniew shaphang ka lawei; bad U Blei uba pynpaw ïa ki jingmaïan, u la pyn-i ha phi kaei ka ban sa jia.

³⁰ Mynta, ïa kane ka jingmaïan la pynpaw ha nga, ym namar ba nga kham stad ban ïa uno uno uwei pat, hynrei khnang ba u Syiem Kynrad u lah ban ïoh tip ïa ka jingmut jong ka jingphohsniew jong phi bad shemphang ïa ki jingpyrkhat kiba la wan ha phi.

³¹ “Ko Syiem Kynrad, ha ka jingïohipaw jong phi, phi la ïohi ba la ïeng ha khmat jong phi ka durbriew bakhraw, kaba phyrnai bad thaba, bad kaba ishyrkhei ban khmih.

³² Ïa ka khlieh jong ka la shna da ka ksiar banylla tam; ïa ka shadem bad ki kti jong ka la shna da ka rupa; ïa ka syngkai bad ka skhep jong ka da ka rnong;

³³ ïa ki khohwah jong ka da ka nar; bad ïa ki kjat jong ka shi bynta da ka nar bad shi bynta da ka dewbyrtha.

³⁴ Katba phi dang khmih ïa ka, u maw uba khraw u la lait na ka synrang khlem don mano mano ba ktah ïa u, u la shoh ïa ka kjat nar bad dewbyrtha jong ka durbriew, bad u la pynkhynñiuh ïa ki.

³⁵ Kumta hi ka nar, ka dewbyrtha, ka rnong, ka rupa bad ka ksiar ki la khyllem bad ki la long kum u pui pui ha ka jaka shoh kew ha ka por lyiur. Ka lyer ka la kit noh ïa u, khlem da pynsah dien ei ei. Hynrei u maw u la san ban long u lumbah uba tap ïa ka pyrthei baroh kawei.

³⁶ “Kane ka la long ka jingphohsniew. Mynta ngan ïathuh ha u Syiem Kynrad aïu ka kit jingmut.

³⁷ Ko Syiem Kynrad, phi long uba khraw tam na ki syiem baroh. U Blei ka bneng u la pynlong ïa phi u patsha bad u la ai ha phi ka bor, ka jingkhlaiñ, bad ka burom.

³⁸ U la pynlong ïa phi u nongsynshar ïa baroh ka pyrthei bashongbriew bad u nongsynshar ïa baroh ki mrad bad ki sim. Phi long ka khlieh kaba da ka ksiar.

³⁹ Hadien jong phi kan don sa kawei ka hima, ka bym da khraw kum ka jong phi, bad hadien kata sa kaba lai, ka hima kaba da ka rnong, ka ban synshar ïa ka pyrthei baroh kawei.

⁴⁰ Bad nangta kan don ka hima kaba saw, kaba eh kum ka nar, kaba pynkhynñiuh bad pynpait ïa kaei kaei baroh. Bad kumba ka nar ka pynkhynñiuh ïa kaei kaei baroh, kan pynkhynñiuh bad pynlwet ïa baroh ki hima kiba mynshuwa.

⁴¹ Phi la ïohi ruh ba ki kjat bad ki shympriah kjat ki long shi bynta da ka dewbyrtha bad shi bynta da ka nar. Kane ka mut ba kan long ka hima kaba la pynïakhlad. Kan don kaei kaei kaba eh kum ka nar, namar la don ka nar kaba la khleh bad ka dewbyrtha.

⁴² Ki shympriah kjat — shi bynta da ka nar bad shi bynta da ka dewbyrtha — ki mut ba shi bynta jong ka hima kan long kaba khlaiñ bad shi bynta jong ka kaba tlot.

⁴³ Phi la ïohi ruh ba ïa ka nar la khleh bad ka dewbyrtha. Kane ka mut ba ki nongsynshar jong kata ka hima kin pyrshang ban pynïatylli ïa ki longïing jong ki da ka jingïashongkha khleh, hynrei kin ym lah, kumba ka nar kam lah ban ïakhleh bad ka dewbyrtha.

⁴⁴ Ha ka por jong kito ki nongsynshar U Blei ka bneng un seng ka hima ka ban ym kut junom. Yn ym lah ban jop ïa ka, hynrei kan pynjot thiaw ïa baroh kito ki hima, bad nangta kan neh junom.

⁴⁵ Phi la ïohi kumno u maw u la lait na ka synrang khlem don mano mano ba ktah ïa u bad kumno u la shoh ïa ka durbriew kaba la shna da ka nar, ka rnong, ka dewbyrtha, ka rupa bad ka ksiar. U Blei uba khraw u ïathuh ïa u Syiem Kynrad kaei ka ban sa jia ha ka lawei. Nga la ïathuh thik ïa kaei kaba phi la phohsniew bad nga la ai ha phi ïa ka jingmut bashisha.”

U syiem u ainong ïa u Daniel

⁴⁶ U syiem Nebukhadnessar u la dem khrup ha khyndew bad u la ai hukum na ka bynta ki jingkñia bad ki jingainguh kiba dei ban ai ïa u Daniel.

⁴⁷ U syiem u la ong, “U Blei jong me u long uba khraw tam na ki blei baroh, U Trai halor ki syiem, bad uta uba pynpaw ïa ki jingmaïan. Nga tip ïa kane namar me la lah ban batai ïa kane ka jingmaïan.”

⁴⁸ Te u la ai ha u Daniel ka kyrdan kaba halor, u la ai sngewbha ïa u da ki jingai kiba kynsai tam, u la buh ïa u ban khmih ïa ka probins jong ka Babilon, bad u la pynlong ïa u, u khlieh jong baroh ki nongai jingmut ïa u syiem.

⁴⁹ Ha ka jingkyrpad jong u Daniel, u syiem u la buh ïa u Shadrakh, u Meshakh, bad u Abednego ban khmih ïa ka jingpynïaid kam jong ka probins jong ka Babilon; hynrei u Daniel u la don ha ka ïingbishar jong u syiem.