DANIEL 11 - Khasi CL Bible (BSI)

¹ Mynta u kitkhlieh ban ïarap bad ïada ïa nga.

² Bad kaei kaba ngan ïathuh ïa me ka long kaba shisha.” U angel u la ong, “Sa lai ngut ki syiem kin synshar halor ka Persia, yn bud sa uba saw, u ban kham riewspah ban ïa baroh kiwei pat. Haba u la khlaiñbor bha bad riewspah eh un kob ïa ka hima Gris.

Ki Hima Ijipt bad Syria

³ “Nangta u syiem bashlur un mihpaw. Un synshar halor ka hima bakhraw bad un leh ïa kaei kaei kaba u kwah.

⁴ Hynrei haba u la khlaiñbor bha, ka hima jong u kan pait bad yn phiah ha ki saw bynta. Ki syiem ki bym shym hiarpateng na u kin synshar ha ka jaka jong u, hynrei kin ym don ïa ka bor kaba u la don.

⁵ “U syiem ka Ijipt un long uba khlaiñ. Hynrei, uwei na ki nongïalam shipai jong u un kham khraw bad un synshar ïa ka hima kaba kham khraw.

⁶ Hadien bun tylli ki snem u syiem ka Ijipt un pynlong ka jingïateh lok bad u syiem ka Syria bad un ai shongkurim ïa ka khun jong u. Hynrei ka jingïateh lok kan ym neh; bad ïa ka, ïa u tnga jong ka, ïa i khun jong ka bad ïa ki shakri kiba la ïaleit bad ka yn pynïap baroh.

⁷ Shen hadien kata, uwei na ki ba-ha-ïing jong ka un long syiem. Un tur ïaleh ïa ka kynhun shipai jong u syiem Syria, un rung shapoh ki kut jong ki, bad jop ïa ki.

⁸ Un rah pat sha Ijipt ïa ki dur jong ki blei jong ki bad ïa ki tiar ksiar bad rupa kiba la pynkyntang sha kito ki blei. Hadien bun bun snem ka jingsuk

⁹ u syiem ka Syria un hiarthma ïa ka Ijipt, hynrei un shah pynbor ban kynran.

¹⁰ “Ki khun shynrang jong u syiem ka Syria kin pynkhreh ïa ka thma bad ki ïalum ka kynhun shipai bakhraw. Kawei na ki kan sar kum ka jingshlei um bad kan tur ïaleh ïa ka kut jong u nongshun.

¹¹ U syiem Ijipt ha la ka jingbitar un leit sha ka thma pyrshah ïa u syiem ka Syria bad kem ïa ka kynhun shipai bakhraw jong u.

¹² Un sngewsarong ïa la ka jingjop bad ïa ki shipai kiba bun kiba u la lah pynïap, hynrei un ym neh sah ban jop.

¹³ “U syiem ka Syria un leit phai pat bad lum ka kynhun shipai kaba kham khraw ban ïa kaba u la don mynshuwa. Haba ka por babiang ka poi, un wan phai bad ka kynhun shipai kaba khraw bad kaba la kieng atiar bha.

¹⁴ Te shibun ki briew kin ïeng ïaleh pyrshah ïa u syiem ka Ijipt. Bad katto katne ki rangbah thombor na ka jaitbynriew jong me, ko Daniel, kin ïeng ïaleh pyrshah namar ka jingïohipaw kaba ki la lah ïohi, hynrei kin sa shahjop.

¹⁵ Kumta u syiem ka Syria un kerkut ïa ka nongbah ba la ker kynroh bad kurup ïa ka. Ki shipai jong ka Ijipt kin ym ïaleh shuh; wat kiba tbit tam na ki kin ym don ka jingkhlaiñ kaba biang.

¹⁶ U nonghiarthma Syria un leh ïa ki kat kaba u sngewbha, khlem kano kano ka jingïapyrshah. Un ïeng ha ka Ri ka Jingkular bad un ïoh ïa ka baroh ha ka bor jong u.

¹⁷ “U syiem ka Syria un pynkhreh ka jinghiarthma, da kaba pyndonkam ïa ka kynhun shipai jong u baroh kawei. Nangta, khnang ban pynjot ïa ka hima jong u nongshun, un pynlong ka jingïateh lok bad u bad tyrwa ha u ban shongkurim ïa ka khun jong u; hynrei ka jingthmu jong u kan ym jop.

¹⁸ Hadien kata un tur ïaleh ïa ki hima kiba harud duriaw bad u jop ïa kiba bun na ki. Hynrei u nongïalam nongwei un jop ïa u bad un pynkut ïa ka jinglehmeng jong u; da shisha un pynphai pat ïa ka jinglehmeng jong u syiem ka Syria sha u.

¹⁹ U syiem un wan phai pat sha ki kut ki jong ka ri jong u hi, hynrei un shahjop, bad kata kan long ka jingkut jong u.

²⁰ “Yn bud ïa u da uwei pat u syiem, u ban phah ïa u rangbah pynïaidkam ban banbeiñ ïa ki briew da ki khajna na ka bynta ban pynroi ïa ka spah jong ka hima jong u. Tang khyndiat por ïa uta u syiem yn pynïap, hynrei ym ha kaba paw bad ym ha ka thma.”

U syiem basniew jong ka Syria

²¹ U angel u la bteng ban batai: “U syiem uba bud jong ka Syria un long u briew uba sniew u bym don ka hok ban long syiem, hynrei un wan khlem khmih lynti bad un knieh ïa ka bor da ka buit shukor.

²² Ïa uno uno uba pyrshah ïa u, wat u Rangbah Lyngdoh jong U Blei, un shah sar noh bad shah pynduh.

²³ Da kaba pynlong ki jingïateh lok, un shukor ïa kiwei ki hima, bad un nang khlaiñ bad nang khlaiñ, wat la u synshar tang ïa ka hima kaba rit.

²⁴ Un hiarthma khlem ka jingmaham ïa ka probins jong ka ri bariewspah bad un leh ïa kiei kiei kiba ym don na ki kpa tymmen jong u kiba la ju leh. Nangta un pynïabynta hapdeng ki nongbud jong u ïa ki mar ki mata bad ïa ki jingdon jingem kiba u la kurup ha ka thma. Un pynlong ki jingthmu ban tur ïaleh ïa ki kut, hynrei ka por jong u kan kut noh shen.

²⁵ “Un pynmih da ka jingshlur ïa ka kynhun shipai bakhraw ban tur ïaleh ïa u syiem ka Ijipt, u ban pynkhreh ban ïaleh pyrshah da ka kynhun shipai babun bad bakhrawbor. Hynrei ïa u syiem ka Ijipt yn shukor bad un ym jop.

²⁶ Ki nongai jingmut bajan eh jong u kin pynjot ïa u. Ïa kiba bun ki shipai jong u yn pynïap, bad ïa ka kynhun shipai jong u yn pyndam noh.

²⁷ Nangta ki ar ngut ki syiem kin ïashong lang ban ïabam ha kajuh ka miej, hynrei ki jingthmu jong ki, kin long kiba sniew, bad kin ïa-lamler uwei ïa uwei pat. Kin ym ïoh ïa kaei kaba ki kwah, namar ka por na ka bynta kata kam pat poi.

²⁸ U syiem ka Syria un leit phai sha ïing lem bad ki jinglute kiba u la ïoh kurup, u la kut jingmut ban pynjot ïa ka niam jong ki briew jong U Blei. Un leh kat kaba u sngewbha bad nangta un leit phai sha la ka ri.

²⁹ “Hadien katto katne un hiarthma pat ïa ka Ijipt, hynrei ha kane ka por kiei kiei kin kylla long da kumwei pat.

³⁰ Ki nong Rom kin wan ha ki liengbah bad kin pyrshah ïa u, bad un sa sheptieng. “Te un leit phai pat ha ka jingbitar shla bad un pyrshang ban pynjot ïa ka niam jong ki briew jong U Blei. Un bud ïa ka jingai jingmut jong kito kiba la iehnoh ïa kata ka niam.

³¹ Katto katne na ki shipai jong u kin pyntngit ïa ka Templ. Kin pynsangeh ïa ki jingkñia ba man ka sngi bad kin pynïeng ïa ka Jingshyrkhei Ba-ijli.

³² Da ka buit shukor u syiem un ïoh ïa ka jingkyrshan jong kito kiba la iehnoh ïa la ka niam, hynrei kito kiba bud ïa U Blei kin ïaleh pyrshah.

³³ Ki nongïalam bastad jong ki briew kin ïasam ïa ka jingstad jong ki bad kiwei pat ki briew babun. Hynrei shipor katto katne na ki kin shah pynïap ha ka thma lane shah thang ïap, bad katto katne kin shah lute bad shah pynlong koidi.

³⁴ Katba dang don ka jingpynïap, ki briew jong U Blei kin ïoh khyndiat ka jingïarap, wat la kiba bun kiba ïasoh bad ki kin leh kumta na ka bynta ki daw shimet.

³⁵ Katto katne na kito ki nongïalam bastad kin shah pynïap, hynrei kaba mih na kane ka long ba yn pynkhuid ïa ki briew. Kane kan ïailong tad haduh ba kaba kut kan wan, ka por kaba U Blei u la buh.

³⁶ “U syiem ka Syria un leh kat kaba u sngewbha. Un kob ba u long kham khraw ban ïa uno uno u blei, kham halor wat ïa U Blei Bahakhlieh Tam Eh. Un lah ban leh ïa kane tad haduh ha ka por haba U Blei un pynshitom ïa u. U Blei un leh thik ïa kaei kaba u la thmu.

³⁷ U syiem un ym suidñiew ïa u blei ba ki kpa tymmen jong u ki la shakri, bad ruh ïa u blei ba ki kynthei ki ieit. Ha ka jingshisha un ym suidñiew ïa uno uno u blei, namar un pyrkhat ba u kham khraw ban ïa uno uno na ki.

³⁸ Pynban, un pyndonburom ïa u blei uba ïada ïa ki kut. Un ai ka ksiar, ka rupa, ki mawlynnai, bad kiwei kiwei ki jingai babha sha u blei uba ki kpa tymmen jong u kim shym la ju mane.

³⁹ Ban ïada ïa la ki kut, un pyndonkam ïa ki briew kiba mane ïa u blei nongwei. Un ai ka jingpyndonburom kaba khraw ïa kito kiba pdiang ïa u kum u nongsynshar, un buh ïa ki ha ki jaka treikam ba-halor, bad un ai ka jaka ïa ki kum ka bainong.

⁴⁰ “Haba ka kynta kaba khatduh jong u syiem ka Syria ka la jan wan artat, u syiem ka Ijipt un tur ïaleh ïa u, bad u syiem ka Syria un ïaleh pyrshah da la ka bor baroh, da kaba pyndonkam ïa ki kali ïapom, ki kulai, bad ki liengbah kiba bun. Un hiarthma ïa kiba bun ki ri, kum ka jingshlei ki um.

⁴¹ Un hiarthma wat ïa ka Ri ka Jingkular bad un pynïap da ki phew hajar, hynrei ki ri Edom, Moab, bad kaei kaba la iehnoh jong ka Ammon kin lait.

⁴² Haba u hiarthma ïa kito ki ri baroh, wat ïa ka Ijipt ruh yn ym ieh.

⁴³ Un shim noh ïa ki jingkynshew ksiar bad rupa ba la buhrieh jong ka Ijipt bad ïa kiwei kiwei ki jingdon jingem jong ka kiba la ñiewkordor eh. Un hiarthma ïa ka Libya bad ka Sudan.

⁴⁴ Te ka khubor kaba wan na mihngi bad na shatei kan pynsheptieng ïa u, bad un ïaleh da jingbitar shla, da kaba pynïap shibun ngut ki briew.

⁴⁵ Un pynïeng ruh ïa ki ïingjaiñ syiem kiba heh hapdeng ki duriaw bad ki lumbah ha kaba ka Templ ka ïeng. Hynrei un ïap, khlem don mano mano hangta ban ïarap ïa u.”