DANIEL 10 - Khasi CL Bible (BSI)

Ka jingïohipaw jong u Daniel harud ka wah Tigris

¹ (Ha ka snem kaba lai kaba u Syros u long u patsha jong ka Persia, ïa ka khubor la pynpaw ha u Daniel, ïa uba la khot ruh u Belteshassar. Ka khubor ka long kaba shisha hynrei kaba jwat eh ban sngewthuh. La batai ïa ka ha u ha ka jingïohipaw.)

² Ha kata ka por, nga la ïambriew haduh lai taïew.

³ Ngam shym bam ïa kano kano ka jingbam bang lane kano kano ka doh, lane dih ïa kano kano ka waiñ, lane sad ïa u shñiuh jong nga tad haduh ba ki lai taïew ki la leit noh.

⁴ Ha ka sngi kaba arphew saw jong u bnai uba nyngkong jong ka snem, nga la ïeng harud jong ka wah Tigris kaba khraw.

⁵ Nga la khmih shajrong bad nga la ïohi ïa uwei uba kup ki jaiñ linen bad u panpoh ksiar nylla.

⁶ Ka met jong u ka tyngshaiñ kum u mawlynnai. Ka durkhmat jong u ka thaba kum ka jingthaba ka leilieh, bad ki khmat jong u ki la meh kum ka ding. Ki kti bad ki kjat jong u ki tyngshaiñ kum ka rnong ba la shut phyrnai, bad ka sur jong u ka sawa kum ka jingkyrhuh u paidbah bakhraw.

⁷ Nga la long tang ma nga hi uba la ïohi ïa ka jingïohipaw. Ki rangbah kiba ïadon bad nga kim shym ïohi ei ei, hynrei ki la sngewshyrkhei bad ki la ïamareh bad leit rieh.

⁸ La iehnoh ïa nga marwei hangta, da kaba khmih ïa kane ka jingïohipaw kaba phylla. Ngam donbor shuh, bad ka durkhmat jong nga ka la kylla dur haduh katta katta ba ym don mano mano ba lah ban ithuh ïa nga.

⁹ Haba nga la ïohsngew ïa ka sur jong u, nga la kyllon ha khyndew khlem tipbriew bad nga thiah pyllup hangta.

¹⁰ Nangta ka kti ka la shim ïa nga bad ka la pynkhie joit ïa nga; nga dang khynñiuh hi.

¹¹ U angel u la ong ha nga, “Ko Daniel, U Blei u ieit ïa me. Ïeng joit bad to shahshkor biang biang ïa kaei kaba ngan ong ha me. Ïa nga la phah sha me.” Haba u la lah ong ïa kane, nga la ïeng, nga dang khynñiuh hi.

¹² Nangta u la ong, “Ko Daniel, to wat sheptieng. U Blei u la shahshkor ïa ki jingduwai jong me naduh ka sngi kaba nyngkong ba me la kut jingmut ban pynrit ïa lade khnang ban ïoh ïa ka jingshemphang. Nga la wan ban ai jubab ïa ka jingduwai jong me.

¹³ U angel jong u khun syiem jong ka hima Persia u la ïaleh pyrshah ïa nga haduh arphew wei sngi. Nangta u Mikhael, uwei na ki angel rangbah, u la wan ban ïarap ïa nga, namar nga la shah iehnoh marwei hangta ha Persia.

¹⁴ Nga la wan ban pynsngewthuh ïa me ïa kaei ka ban jia ha ki briew jong me ha ka lawei. Kane ka dei ka jingïohipaw ïa ka lawei.”

¹⁵ Haba u la kren ïa kane, nga la peit sha khyndew, khlem lait kren.

¹⁶ Nangta u angel, uba syriem ïa u briew, u la kner ïa la ka kti bad u la ktah ïa ki rmiang shyntur jong nga. Nga la ong ha u, “Ko rangbah, kane ka jingïohipaw ka pyntlot ïa nga haduh katta katta ba ngam lah ban sangeh ban khynñiuh.

¹⁷ Nga long kum u mraw uba ïeng ha khmat u kynrad jong u. Kumno nga lah ban ïakren bad phi? Ngam donbor lane jingpynhiar mynsiem kaba dang sah ha nga.”

¹⁸ Sa shisien pat u la bat ïa nga, bad nga la kham sngew ïohbor.

¹⁹ U la ong, “U Blei u ieit ïa me, kumta wat ai ba kano kano kan pynkhuslai ïa me lane pynsheptieng ïa me.” Haba u la ong ïa kane, nga la nang kham sngewkhlaiñ shuh shuh bad ong, “Ko rangbah, to ïathuh ha nga ïa kaei kaba phi don ban ong. Phi la pynlong ïa nga ban kham sngewkhlaiñ.”

^20-21 U la ong, “Hato me tip balei ba nga la wan sha me? Ka long ban pynpaw ha me ïa kaei kaba la thoh ha ka Kitab ka Jingshisha. Mynta nga dei ban leit noh pat bad ban ïaleh ïa u angel ïada jong ka Persia. Hadien kata, u angel ïada jong ka Gris un mihpaw. Ym don mano mano ban ïarap ïa nga lait noh u Mikhael, u angel ïada jong ka Israel.