DANIEL 1 - Khasi CL Bible (BSI)

Ka Jingïathuhkhana shaphang u Daniel bad ki paralok jong u ( 1:1—6:28 ) Ki samla shynrang ha ka ïingbishar jong u Nebukhadnessar

¹ Ha ka snem kaba lai ba u Jehoïakim u long u syiem ka Judah, u Nebukhadnessar u syiem ka Babilonia u la tur ïaleh ïa ka Jerusalem bad kerkut ïa ka nongbah.

² U Trai u la shah ïa u ban kem ïa u Syiem Jehoïakim bad kurup katto katne ki jingkynshew jong ka Templ. U la shim pat katto katne ngut ki koidi lem bad u sha ka templ jong ki blei jong u ha Babilon, bad u la buh ïa ka jingkynshew ba la ïoh kurup ha ki jaka kynshew ka templ.

³ U syiem u la hukum ïa u Ashpenas, u rangbah synshar bahakhlieh duh jong u, ban jied napdeng ki nong Israel kiba la shah ringmraw ïa ki katto katne ngut ki samla shynrang na ka longïing syiem bad na ki longïing ki riewkhraw.

⁴ Ki dei ban long kiba bhabriew, kiba nep jingmut, kiba la ïoh jinghikai bha, kiba stet ban nang, bad kiba lait na ka jinganna, ba kumta kin lah ban long kiba bit ban shakri ha ka ïingbishar jong u syiem. U Ashpenas u dei ban hikai ïa ki ban pule bad ban thoh ïa ka ktien ki nong Babilonia.

⁵ U syiem u la ai ruh ki hukum ba man la ka sngi la dei ban ai ïa ki da kajuh ka jingbam bad ka waiñ kum ïa ki dkhot jong ka ïingbishar syiem. Hadien lai snem jong kane ka jingai jinghikai ki dei ban wan mih ha khmat u syiem.

⁶ Napdeng kito kiba la shah jied ki long u Daniel, u Hananaïah, u Mishael, bad u Asaraïah; baroh na ki, ki dei na ka jait Judah.

⁷ U rangbah synshar bahakhlieh duh u la ai kyrteng thymmai ïa ki: u Belteshassar, u Shadrakh, u Meshakh, bad u Abednego.

⁸ U Daniel u la kut jingmut ban ym shah ïa lade ban long u bymkhuid kat kum ka jinglehniam da kaba bam ïa ka jingbam bad dih ïa ka waiñ jong ka ïingbishar syiem, kumta u la kyrpad ïa u Ashkenas ban ïarap ïa u,

⁹ bad U Blei u la pynlong ïa u Ashkenas ban pyrkhat sngewlem ïa u Daniel.

¹⁰ U Ashpenas pat u la sheptieng ïa u syiem, kumta u la ong ha u Daniel, “U syiem u la rai ïa kaei kaba phin bam bad dih, bad lada mem i kum uba bit kum kiwei pat ki samla shynrang, u lah ban pynïap ïa nga.”

¹¹ Kumta u Daniel u la leit sha u nongap phira uba u Ashpenas u la buh ban khmih ïa u bad ïa ki lai ngut ki paralok jong u.

¹² “To tynjuh ïa ngi shiphew sngi,” u la ong. “Ai ha ngi ki jhur ban bam bad ka um ban dih.

¹³ Te sa ïanujor ïa ngi bad ki samla shynrang kiba bam ïa ka jingbam jong ka ïingbishar syiem, bad pynshong nongrim ïa ka rai ka jong phi ha ka jingïohi kumno ngi long.”

¹⁴ U la mynjur ban shah ïa ki ban pyrshang ïa ka na ka bynta shiphew sngi.

¹⁵ Haba ka por ka la kut, ki la kham i khiah krat bad kham khlaiñ ban ïa kito baroh kiba la bam ïa ka jingbam syiem.

¹⁶ Kumta naduh kata u nongap phira u la shah ïa ki ban bteng ban bam da ki jhur ha ka jaka jong kaei kaba u syiem u la pynbiang.

¹⁷ U Blei u la ai ha ki saw ngut ki samla shynrang ïa ka jingtip bad ka jingtbit ha ka thoh ka tar bad ha ka saiñpyrkhat. Nalor kane, u la ai ha u Daniel ka jingtbit ban batai ïa ki jingïohipaw bad ïa ki jingphohsniew.

¹⁸ Ha kaba kut jong ki lai snem kiba la buh da u syiem, u Ashpenas u la ïalam ïa baroh ki samla shynrang sha u Nebukhadnessar.

¹⁹ U syiem u la ïakren bad ki baroh, bad u Daniel, u Hananaïah, u Mishael, bad u Asaraïah ki la pynhun shibun ïa u ban ïa uno uno uwei pat. Kumta ki la kylla long ki dkhot jong ka ïingbishar jong u syiem.

²⁰ Kam pher kaei ka jingkylli ba u syiem u la kylli, lane kano ka jingeh kaba u pynpaw, kine ki saw ngut ki la kham tip shiphew shah ban ïa uno uno u nongbatai kupar lane u nongleh myntor ha ka hima jong u baroh kawei.

²¹ U Daniel u la don ha ka ïingbishar syiem haduh ba u Syros u patsha jong ka Persia u la jop ïa ka Babilonia.