AMOS 9 - Khasi CL Bible (BSI)

Ki jingbishar U Trai

¹ Nga la ïohi ïa U Trai ba u ïeng harud ka duwan. U la ai ka hukum: “Tied tyngeh ïa ki khlieh rishot jong ka Templ haduh ba ka shyngkub baroh kawei kan da khih. Pynpait ïa ki bad ai ba kin hap halor ki khlieh jong ki briew. Ngan pynïap ha ka thma ïa ki briew kiba dang sah. Yn ym don u ban ïohphet; wat uwei ruh un ym lait im.

² Wat lada ki tih ïa ka lynti jong ki shapoh ka pyrthei kiba ïap, ngan kem ïa ki. Wat lada ki kiew sha bneng, ngan patan ïa ki shapoh.

³ Lada ki rieh ha khlieh u lum Karmel, ngan wad ïa ki bad kem ïa ki. Lada ki rieh na nga ha trai duriaw, ngan hukum ïa ki mrad duriaw bakynsha ban dait ïa ki.

⁴ Lada ki shah ringmraw ha ki nongshun jong ki, ngan hukum ïa ki ba kin pynïap. Nga la kut jingmut ban pynjot ïa ki, ym ban ïarap ïa ki.”

⁵ U Trai Nongsynshar Badonbor Baroh u ktah ïa ka pyrthei, bad ka khynñiuh baroh kiba shong ha ka ki ïambriew, ka pyrthei baroh kawei ka kiew ka hiar kum ka wah Nile.

⁶ U Trai u tei ïa ka ïing jong u ha ki bneng, bad halor ka khyndew u buh ka jingtei jong ka sahit bneng. U khot ïa ki um ka duriaw bad u theh ïa ki ha sla pyrthei. Ka kyrteng jong u ka long U Trai!

⁷ U Trai u ong, “Ko ki paid Israel, nga da pyrkhat ïa ki briew ka Sudan kumba nga leh ïa phi. Nga la wallam ïa ki nong Philistia na Krit bad ïa ki nong Syria na Kir, kumba nga la wallam ïa phi na Ijipt.

⁸ Ma nga, U Trai Nongsynshar, nga khmih ïa kane ka hima Israel kaba pop, bad ngan pynjot ïa ka na sla khyndew. Hynrei ngan ym pynjot ïa baroh ki khun ki ksiew u Jakob.

⁹ “Ngan ai ka hukum, bad ngan kyrsih ïa ki paid Israel kum ïa u kew. Ngan kyrsih ïa ki hapdeng ki jaitbynriew ban weng ïa kita baroh ki bymdondor.

¹⁰ Ïa ki nongpop napdeng ki briew jong nga yn pynïap ha ka thma — ïa kito baroh kiba ong ‘U Blei un ym shah ïa kano kano ka jingma ban wan hajan jong ngi.’ ”

Ka jingpynïeng pat ïa ki Israel

¹¹ U Trai u ong, “Ka sngi ka la poi haba ngan pynïeng pat ïa ka hima u Dabid kaba long kum ka ïing kaba la khyllem ha ki jingjot. Ngan shna pynbha ïa ki kynroh jong ka bad ngan pynïeng pat ïa ka. Ngan tei pat ïa ka bad ngan pynlong ïa ka kumba ka la ju long mynshuwa.

¹² Bad kumta ki briew ka Israel kin ïohknieh ïa kaei kaba dang sah jong ka ri Edom bad ïa ki jaitbynriew baroh kiba shisien ki long ki jong nga,” ong U Trai, u ban pynlong ïa kane ban jia.

¹³ “Ki sngi ki la poi,” ong U Trai, “haba u kew un san stet ban ïa kaba lah ban ot, bad ki sohwaiñ kin san stet ban ïa ka waiñ ba lah ban shna. Ki lumbah kin jaw da ka waiñ kaba thiang, bad ki lumrit kin tuid da ka.

¹⁴ Ngan wan ïalam pat ïa ki briew jong nga sha la ka ri. Kin sa tei pat ïa ki shnong ba la jot bad kin shong hangta; kin thung ki bri sohwaiñ bad kin dih ïa ka waiñ; kin thung jingthung ha ki kper, bad kin bam na kaei kaba mih.

¹⁵ Ngan thung ïa ki briew jong nga ha ka ri ba nga la ai ïa ki, bad yn ym jynrat shuh ïa ki,” U Trai U Blei jong phi u la kren.