AMOS 8 - Khasi CL Bible (BSI)

Ka jingïohipaw ïa shi shang ki soh

¹ Nga la ïoh kawei pat ka jingïohipaw na U Trai Nongsynshar. Ha ka, nga la ïohi shi shang ki soh.

² U Trai u kylli, “Ko Amos, me ïohi aïu?” “Shi shang ki soh,” nga la jubab. Nangta U Trai u la ong ha nga, “Kaba kut ka la wan ha ki briew jong nga ki Israel. Ngan ym kylla shuh la ka jingmut shaphang kaba pynshitom ïa ki.

³ Ha kata ka sngi, ki jingrwai ha ka ïingsyiem kin kylla long ki jinglynñiar ka jingïambriew. Ki metïap kin don kylleng sawdong. Kin sa shah bret noh ha ka jingjar jar.”

Ka jingtim ïa ki Israel

⁴ To shahshkor ïa kane, phi kiba ïuhroit ïa kiba kyrduh bad kiba pyrshang ban pynjot ïa kiba duk ha ka ri.

⁵ Phi ong ha lade, “Ngim lah ap slem ïa ki sngi bakhuid ba kin kut noh khnang ba ngi lah ban die ïa u kew jong ngi. Lano ka sngi Sabbaton kan kut, khnang ba ngin ïoh sdang ban die biang? Nangta ngi lah ban oh dor rem, pyndonkam da ki jingthew bymhok, bad pynbakla ïa ki tarajur ban thok ïa ki nongthied jong ngi.

⁶ Ngi lah ban die ïa u kew u bymdondor ha ka dor kaba heh. Ngin shem ïa u briew uba duk u bym lah siew ïa ki ram jong u, wat ym ïa ka dor jong shi jur ki juti, bad ngin thied ïa u kum u mraw.”

⁷ U Trai, U Blei ki Israel, u la smai, “Ngan ym klet lano lano ïa ki kam sniew jong ki.

⁸ Bad kumta ka khyndew kan khynñiuh, bad uwei pa uwei ha ka ri un long ha ka jinglanot. Ka ri baroh kawei kan khynñiuh; kan kiew bad kan hiar kum ka wah Nile.

⁹ Ka por ka poi haba ngan pynlong ïa ka sngi ba kan sep noh hamar shiteng sngi, bad ïa ka pyrthei ban dum ha ka por mynsngi. Ma nga, U Trai Nongsynshar, nga la kren.

¹⁰ Ngan pynkylla ïa ki Jingkhawai Niam jong phi sha ki jingtep briew bad ngan pynkylla ïa ki jingrwai kmen jong phi sha ki jingïam sngewsih. Ngan pynlong ïa phi ba phin khi lyndum ïa la ka khlieh bad phin phong ka jaiñ khain, bad phin long kum ki kmie ki kpa kiba ïambriew na ka bynta u khun ba tang marwei jong ki. Kata ka sngi kan long kaba kthang haduh kaba kut.

¹¹ “Ka por ka poi ha kaba ngan phah ïa ka jingïapthngan ha ka ri. Ki briew kin thngan, hynrei ym ïa u kpu; kin sliang, hynrei ym ïa ka um. Kin thngan bad kin sliang ïa ka khubor na U Trai. Ma nga, U Trai Nongsynshar, nga la kren.

¹² Ki briew kin ïaid sakma na ka Duriaw Baïap sha ka Mediterranian bad nangta shuh shuh na shatei shaduh mihngi. Kin ïakhmih kylleng kylleng ïa ka khubor na U Trai, hynrei kin ym shem ïa ka.

¹³ Ha kata ka sngi, wat ki samla shynrang bad kynthei kiba koit bakhiah kin kyllon na ka jingsliang.

¹⁴ Kito kiba smai ha ki bleithaw jong ka Samaria, kiba ong, ‘Da u blei jong ki Dan,’ lane, ‘Da u blei jong ki Beersheba,’ — kito ki briew kin kyllon, bad kin ym khie pat.”