AMOS 7 - Khasi CL Bible (BSI)

Ka jingïohipaw ïa ki puit

¹ Nga la ïoh ka jingïohipaw na U Trai Nongsynshar. Ha ka nga la ïohi ïa u ba u pynmih shi kynhun ki puit tang hadien ba la ot noh ïa u skum uba long ka bynta u syiem bad u phlang u la sdang ban mih biang.

² Ha ka jingïohipaw jong nga, nga la ïohi ïa ki puit ba ki bam duh ïa baroh kaei kaei kaba jyrngam ha ka ri, bad nangta nga la ong, “A Trai Nongsynshar, to map ïa ki briew jong me! Kumno ki lah ban lait im? Ki long kiba rit bad kiba tlot katta katta!”

³ U Trai u kylla noh la ka jingmut bad u ong, “Kaei kaba phi la ïohi kan ym jia.”

Ka jingïohipaw ïa ka ding

⁴ Nga la ïoh kawei pat ka jingïohipaw na U Trai Nongsynshar. Ha ka, nga la ïohi ïa u ba u dang pynkhreh ban pynshitom ïa ki briew jong u da ka ding. Ka ding ka la thang lut ïa ka duriaw-bah bakhraw hapoh ka sla pyrthei, bad ka la sdang ban bam duh ïa ka khyndew.

⁵ Nangta nga ong, “A Trai Nongsynshar, to keiñ noh! Kumno ki briew jong me ki lah ban lait im? Ki long kiba rit bad kiba tlot katta katta!”

⁶ U Trai u kylla biang la ka jingmut bad u la ong, “Kane ruh kan ym jia.”

Ka jingïohipaw ïa u Sawar

⁷ Nga la ïoh kawei pat ka jingïohipaw na U Trai. Ha ka, nga ïohi ïa u ba u dang ïeng marsyndah ka kynroh ïa kaba la tei da ka jingïarap u sawar, bad la don u sawar ha ka kti jong u.

⁸ U la kylli ïa nga, “Amos, me ïohi aïu?” “U Sawar,” nga la jubab. Nangta u ong, “Nga pyndonkam ïa u ban pyn-i ba ki briew jong nga ki long kum ka kynroh ka bym biang sawar. Ngan ym kylla shuh la ka jingmut shaphang kaba pynshitom ïa ki.

⁹ Ïa ki jaka ha kiba ki khun ki ksiew u Isaak ki mane Blei yn sa pynjot noh. Ïa ki jaka kyntang jong ki Israel yn sa iehnoh ha ki jingjot. Ngan wallam ïa ka longïing syiem jong u syiem Jeroboam sha ka jingkut.”

U Amos bad u Amasaïah

¹⁰ Amasaïah, u lyngdoh ka Bethel, u la phah ka khubor sha u Jeroboam u syiem ka Israel: “U Amos u la ïasylla pyrshah ïa phi hapdeng ki briew. Ki jingkren jong u kin pynjot ïa ka ri.

¹¹ Kane ka long kaei kaba u ong, ‘U Jeroboam un ïap ha ka thma, bad ki briew ka Israel kin shah ringmraw na la ka ri.’ ”

¹² Nangta u Amasaïah u ong ha u Amos, “Kata ka la biang, ko nongïathuhlypa, khie leit noh sha Judah bad leh ïa ka kam ïalap jong me hangta, bad sa ïathuhlypa de hangta. Ai ba kin siew ïa me na ka bynta kata.

¹³ Wat ïathuhlypa shuh hangne ha Bethel. Kane ka dei ka jaka mane Blei jong u syiem, ka Templ jong ka hima.”

¹⁴ U Amos u jubab, “Ngam dei kum uta u jait nongïathuhlypa, uba ïathuhlypa na ka bynta ban ïoh jingsiew. Nga dei u nongri jingri, bad nga sumar ïa ki dieng Dumbur.

¹⁵ Hynrei U Trai u la shim ïa nga na ka kam kum u nongaplangbrot bad u la hukum ïa nga ban wan bad ïathuhlypa ha ki briew jong u ki Israel.

¹⁶ Kumta mynta, to shahshkor ïa kaei kaba U Trai u ong. Me bthah ïa nga ban sangeh kaba ïathuhlypa, ban sangeh kaba kren lamwir pyrshah ïa ki briew ka Israel.

¹⁷ Bad kumta, ko Amasaïah, U Trai u ong ïa me, ‘Ka tnga jong me kan long ka nuti ha ki lynti bah, bad ïa ki khun jong me yn sa pynïap ha ka thma. Ïa ka khyndew jong me yn phiah bad sam ha kiwei pat; bad me ïa lade men ïap ha ka ri bymngeit blei. Bad ki paid Israel da shisha kin shah ringmraw na la ka ri.’ ”