AMOS 6 - Khasi CL Bible (BSI)

Ka jingpynjot ïa ki Israel

¹ Katno kaba sngewshyrkhei kan long ïa phi kiba shongsuk ha Seïon, bad ïa phi kiba sngewshngain ha Samaria — phi ki briew kiba khraw jong kane ka jaitbynriew Israel kaba khraw, phi sha kaba ki briew ki ju leit ban ïoh jingïarap!

² Khie leit bad khmih ïa ka nongbah Kalneh. Nangta ïai leit sha ka nongbah bakhraw ka Hamath bad leit hiar sha Gath, ka nongbah ki Philistia. Hato ki kham bha ma ki ban ïa ki hima jong ka Judah bad Israel? Hato ka ri jong ki ka kham heh ban ïa ka jong phi?

³ Phi kyntait ban pdiang ba ka sngi jong ka jingjot ka wan, hynrei kaei ba phi leh ka long tang ban pynjan ïa kata ka sngi.

⁴ Katno kaba sngewshyrkhei kan long ïa phi kiba thiah halor ki jingthiah baremdor, kiba ïakhawai da ki khun masi bad khunlangbrot!

⁵ Phi sngewtynnat ban thaw ïa ki jingrwai, kumba u Dabid u la thaw, bad tem ïa ki ha ki duitara.

⁶ Phi dih waiñ na ki khuri ba-dap, bad phi pyndonkam da ki jingsleh kiba kynsai tam, hynrei phim shym ïam sngewsih halor ka jingshah pynjot ki Israel.

⁷ Kumta phin long kiba nyngkong ban leit sha ka jinglongmraw. Ki jingkhawai bad ki jingïadih ïabam sngewbha jong phi kin kut noh.

⁸ U Trai Nongsynshar Badonbor Baroh u la ai kane ka jingmaham bakyntang: “Nga isih ïa ka jingsarong ki briew ka Israel; nga ñiewbeiñ ïa ki ïing paki dulan jong ki. Ngan ai ïa ka nongbah bakhraw bad baroh kiba don ha ka, ha u nongshun.”

⁹ Lada shiphew ngut ki dang sah ha kawei ka ïing, kin ïap.

¹⁰ U ba-ha-ïing jong u briew uba ïap, uta uba dei khmih ïa ka jingleit ontep, un sei shabar ïa ka metïap na ka ïing. Uba ha ïing un khot ïa uno uno ba dang sah hapoh ïing, “Dang don mano mano bad phi hangto?” Ka sur kan jubab, “Em!” nangta u ba-ha-ïing un sa ong, “Sngap jar! Ngi dei ban sumar wat ban ym ong ei ei ïa ka kyrteng U Trai.”

¹¹ Haba U Trai u ai ïa ka hukum, ki ïing kiba rit bad kiba heh kin shah pynpra lyngkhot lyngkhai.

¹² Hato ki kulai ki ju mareh halor ki mawsiang? Hato ki briew ki ju lur ïa ka duriaw da ki masi dab? Pynban phi la pynkylla ïa ka jingbishar hok sha ka bih, bad ïa kaba dei sha ka bymdei.

¹³ Phi kob shaphang kaba ïoh kurup ïa ka shnong Lodebar. Phi kob, “Ngi la long kiba khlaiñ bha ban ïohknieh ïa ka Karnaim.”

¹⁴ U Trai U Blei Badonbor Baroh da lade u ong, “Ko ki paid Israel, ngan phah ïa ka kynhun shipai nongwei ban knieh ïa ka ri jong phi. Kan banbeiñ ïa phi naduh ka Khim Hamath bashaphang shatei haduh ka wahduid Arabah bashaphang shathie.”