AMOS 5 - Khasi CL Bible (BSI)

Ka jingkhot sha ka jingkylla-kaba-mut

¹ To shahshkor, ko ki paid Israel, ïa kane ka jingrwai leit ontep kaba nga rwai ha phi:

² Ka theisotti Israel ka la kyllon; Kan ym khie pat lano lano! Ka shah iehnoh ha ka khyndew Bad ym don uwei ruh u ban khyllie ïa ka.

³ U Trai Nongsynshar u ong, “Ka nongbah ha Israel ka phah noh shihajar ngut ki shipai, hynrei tang shispah ngut ki wan phai; kawei pat ka nongbah ka phah shispah ngut, hynrei tang shiphew ngut ki wan phai pat.”

⁴ U Trai u ong kumne ha ki paid Israel, “Wan sha nga, bad phin ïoh im.

⁵ Wat leit sha Beersheba ban mane Blei. Wat pyrshang ban wad ïa nga ha Bethel — ka Bethel kan ym long ei ei. Wat leit sha Gilgal — ïa ki briew jong ka la tim ba kin shah ringmraw.”

⁶ Phet sha U Trai, bad phin ïoh im. Lada phim leit, un bam duh kum ka ding ha ki paid Israel. Ka ding kan thang duh ïa ki briew ka Bethel, bad yn ym don mano mano ban pynlip ïa ka.

⁷ Phi long kiba la tim, phi kiba pynkyllaiñ ïa ka jingbishar hok bad kiba shukor ïa ki briew ban pynduh ïa ki hok jong ki!

⁸ U Trai u la thaw ïa ki khlur, ki Pleïades bad Orion, u pynkylla ïa ka jingdum sha ka jingshai mynsngi, bad ïa ka sngi sha ka miet. U khot na ka bynta ki um jong ka duriaw bad theh ïa ki ha sla khyndew. Ka kyrteng jong u ka dei U Trai.

⁹ U wallam jingjot ha kiba khlaiñ bad ïa ki Kut baskhem jong ki.

¹⁰ Phi ki briew phi isih ïa uta uba pyrshah ïa ka jingbymhok bad kren ïa ka jingshisha baroh ha ka ïingbishar.

¹¹ Phi la banbeiñ ïa kiba duk bad la shim jubor na ki ïa u kew jong ki. Bad kumta phin ym ïoh sah ha ki ïing maw ba-itynnat ba phi la tei lane dih waiñ na ki bri sohwaiñ kiba itynnat ba phi la thung.

¹² Nga tip haduh katno ki pop jong phi ki long kiba sngewshyrkhei bad katno kiba bun ki kam runar phi la leh. Phi pynshitom beiñ ïa ki briew kiba bha, phi bamsap, phi khang noh ïa kiba duk ban ïoh ïa ka jingbishar hok ha ki ïingbishar.

¹³ Bad kumta, kaba sngap jar ha kum kita ki por kiba sniew ka long kaba sian ban leh.

¹⁴ Pynlong ïa ka jingthmu jong phi ban leh ïa kaei kaba bha, bad ym ïa kaei kaba sniew, khnang ba phin ïoh im. Te U Trai, U Blei Badonbor Baroh, da shisha un don ryngkat bad phi, kumba phi kam ba u long.

¹⁵ Isih ïa kaei kaba sniew, ieit ïa kaei kaba bha, bad peit ba ka jingbishar hok ka ïeng ha ki ïingbishar. Lehse U Trai, un isynei ïa ki briew jong kane ka hima kiba dang pynsah ban im.

¹⁶ Bad kumta U Trai Nongsynshar Badonbor Baroh, u ong, “Kan don ka jinglynñiar bad ki jingïam sngewsih ha ki lynti bah jong ka nongbah. Wat ïa ki nongrep yn khot ban ïam na ka bynta kiba ïap lem bad kito ïa kiba lah da siew ban ïambriew.

¹⁷ Yn don ka jinglynñiar ha ki bri sohwaiñ baroh. Baroh kane kan jia namar ba nga wan ban pynshitom ïa phi.” U Trai u la kren.

¹⁸ Katno kaba sngewshyrkhei kan long ïa phi kiba angnud ïa ka sngi U Trai! Kaei kaba bha ba kata ka sngi kan long ïa phi? Na ka bynta jong phi kan long tang ka sngi jong ka jingdum, bad ym jong ka jingshai.

¹⁹ Kan long kum haba u briew u phet ïap na u sing bad u ïakynduh ïa ka dngiem! lane kum haba u briew u wan sha la ïing bad buh ïa la ka kti ha ka kynroh — tang ban shah puh ha u bseiñ!

²⁰ Ka sngi U Trai kan wallam ïa ka jingdum, bad ym ïa ka jingshai; kan long ka sngi ka jingdum tliw tliw, khlem kano kano ka jingphyrnai.

²¹ U Trai u ong, “Nga isih ïa ki Jingkhawai Niam jong phi; ngam lah shah ïa ki!

²² Haba phi wallam sha nga ïa ki jingainguh thang bad ki jingainguh bam jong phi, ngan ym pdiang ïa ki; ngan ym pdiang ïa ki jingri ba phi la pynsngaid ban wallam sha nga kum ki jingainguh.

²³ Keiñ noh kaba rwai da ka sur bajam; ngam kwah ban sngap ïa ki duitara jong phi.

²⁴ Pynban, ai ba ka jingbishar hok kan tuid kum ka wahduid, bad ka jinglehhok kum ka wah ka bym ju rngad.

²⁵ “Ko ki paid Israel, ngam shym la dawa ïa ki jingkñia bad ki jingainguh ha kito ki sawphew snem ha kaba nga la ïalam ïa phi lyngba ka ri shyiap.

²⁶ Hynrei mynta, namar ba phi la mane ïa ki durblei jong u Sakkuth, u blei syiem jong phi, bad ïa u Kaiwan, u blei khlur jong phi, phin hap ban kit ïa kito ki durblei

²⁷ haba ngan ïalam ïa phi sha ka jinglongmraw sha ka ri sha lyndet ka Damaskos,” ong U Trai, uba ka kyrteng jong u ka long U Blei Badonbor Baroh.