AMOS 4 - Khasi CL Bible (BSI)

¹ To shahshkor ïa kane, phi ki kynthei ka Samaria, kiba nang sngaid kum ki masi ba la bsa bha jong ka Bashan, kiba lehbeiñ ïa kiba tlot, kiba banbeiñ ïa kiba duk, bad kiba dawa ba ki tnga jong phi kin pynbiang ïa phi da ka kyiad!

² Kumba U Trai Nongsynshar u long uba khuid, u la kular, “Ki sngi kin poi haba kin ring noh ïa phi da ki bnoh; kawei pa kawei na phi kan long kum ka dohkha ba la bnoh.

³ Phin sa shah ring sha ka jaka bapei ha ka kynroh ba hajan tam, bad yn sa bret ïa phi shabar.”

Ka jingbymlah ki Israel ban shemphang

⁴ U Trai Nongsynshar u ong, “Ko ki paid Israel, khie leit sha ka jaka bakhuid ka Bethel bad leh pop, lada phi hap ban leh kumta! Khie leit sha Gilgal bad to leh pop da ka jingkhlaiñbor jong phi baroh! Ïaid shaphrang bad wallam ïa ki mrad ban kñia na ka step sha ka step, bad wallam ïa kawei-na-kaba-shiphew jong phi man la ka sngi kaba lai.

⁵ Ïaid shaphrang bad rah ïa u kpu jong phi kum ka jingainguh sha U Blei, bad to sngewsarong shaphang ki jingainguh ba tam ba phi wallam! Kane ka long ka rukom ïa kaei kaei kaba phi ieit ban leh.

⁶ “Dei ma nga uba la wallam ïa ka jingïapthngan ha ki nongbah jong phi baroh, pynban phim shym la wan phai pat sha nga.

⁷ Nga la khang ïa u slap haba ki jingthung ki dang donkam eh ïa u. Nga la pynhap slap ha kawei ka nongbah, hynrei ym ha kawei pat. U slap u la hap ha kawei ka lyngkha hynrei kawei pat ka lyngkha ka la tyrkhong.

⁸ Ha ka jingtlot namar ka jingsliang, ki briew jong kiba bun ki nongbah ki la leit sha ka nongbah kaba ki kyrmen ban ïoh um, hynrei kim ïoh ka umdih ka ban biang. Katta ruh phim shym la wan phai pat sha nga.

⁹ “Nga la phah ïa ka lyer khluit ban pyntyrkhong ïa ki jingthung jong phi. Ki puit ki la bam duh ïa baroh ki kper bad bri sohwaiñ jong phi, ki dieng Dumbur bad ki dieng Olib jong phi. Katta ruh phim shym la wan phai pat sha nga.

¹⁰ “Nga la phah ïa ka khlam ha phi kum kata kaba nga la phah ha Ijipt. Nga la pynïap ïa ki samla shynrang jong phi ha ka thma bad nga la knieh noh ïa ki kulai jong phi. Nga la pyndap ïa ki thliew khmut jong phi da ka jingiwtung ki metïap ha ki jaka shong dara jong phi. Katta ruh phim shym la wan phai pat sha nga.

¹¹ “Nga la pynjot katto katne na phi kumba nga la pynjot ïa ka Sodom bad ka Gomorrah. Kito na phi kiba la lait im ki long kum ka dieng barhem ba la sei na ka ding. Katta ruh phim shym la wan phai pat sha nga,” ong U Trai.

¹² “Kumta te, ko ki paid Israel, ngan pynshitom ïa phi. Bad namar ba ngan leh ïa kane, to pynkhreh ban mad ïa ka jingbishar jong nga!”

¹³ U Blei u long uta uba la thaw ïa ki lumbah bad uba pynlong ïa ki lyer. U pynpaw ïa la ki jingmut ha u briew; u pynkylla ïa ka sngi sha ka miet. U ïaid ha kiba kynjang jong ka pyrthei. Kane ka long ka kyrteng jong u: U Trai U Blei Badonbor Baroh!