AMOS 3 - Khasi CL Bible (BSI)

¹ Ko ki paid Israel, to sngew ïa kane ka khubor kaba U Trai u la kren shaphang jong phi, ka jaitbynriew baroh kawei kaba u la wan ïalam na ka ri Ijipt;

² “Na baroh ki jaitbynriew ha ka pyrthei, phi long tang kawei kaba nga la ithuh bad sumar. Kata ka long kaei kaba la pynlong ïa ki pop jong phi kiba shyrkhei, bad kata ka long balei ba nga dei ban pynshitom ïa phi na ka bynta jong phi.”

Ka kam u nongïathuhlypa

³ Hato ar ngut ki briew ki ju sdang ïaleit jingleit lang khlem da pynkhreh ban ïakynduh?

⁴ Hato u sing u ju kyrhuh ha khlaw lymda u la lap ei ei ban kynrup? Hato u sing samla u ju byrngem ha la krem lymda u la ïohkem ei ei?

⁵ Hato ka sim kan shu ngat ha ka jingriam lymda la pynap jingriam ïa ka? Hato ka shangkhawiah ka ju bsiat hi lymda ngat ei ei ha ka?

⁶ Hato ka turoi thma ka ju sawa ha ka nongbah khlem da pynlong ïa ki briew ban sheptieng? Hato ka jingjynjar ka ju ngat ha ka nongbah lymda U Trai u phah ïa ka?

⁷ U Trai Nongsynshar um ju leh ei ei khlem da pynpaw ïa ka jingthmu jong u ha la ki shakri, ki nongïathuhlypa.

⁸ Haba u sing u kyrhuh, uei uba lah ban lait na ka jingtieng? Haba U Trai Nongsynshar u kren, uei uba lah ban lait khlem pynbna ïa ka khubor jong u?

Ka jingrai pynrem ïa ka Samaria

⁹ To pynbna ha kito kiba shong ha ki ïingsyiem ha Ijipt bad Ashdod: “Ïalumlang ha ki lum sawdong ka Samaria, bad peit ïa ka jingkhynwin kaba khraw bad ka jingbymman ba la leh hangta.”

¹⁰ U Trai u ong, “Kine ki briew ki pyndap ïa la ki ïing paki dulan da kiei kiei kiba la shim da ki kam runar bad ki kam lehbor. Kim tip satia wat kumno ban lehhok.

¹¹ Bad kumta, u nongshun un kerkut ïa ka ri, un pyntwa ïa ki jingker jong ki, bad un lute ïa ki ïing paki dulan jong ki.”

¹² U Trai u ong, “Kumba u nongaplangbrot u shem pat sa tang ar tylli ki kjat, ne ka shkor jong ka langbrot ba u sing u la bam, kumta ruh yn pyllait im tang khyndiat ïa ki briew ka Samaria, kiba mynta ki shong shaniah ha ki jingthiah baremdor.

¹³ “To shahshkor mynta, bad maham ïa ki khun ki ksiew u Jakob,” ong U Trai Nongsynshar Badonbor Baroh,

¹⁴ “Ha ka sngi ba nga pynshitom ïa ki paid Israel na ka bynta ki pop jong ki, ngan pynjot ïa ki duwan ka Bethel. Ïa ki dong jong kawei pa kawei ka duwan yn pom noh bad kin hap ha madan.

¹⁵ Ngan pynjot ïa ki ïingshong tlang bad ki ïingshong lyiur. Ki ïing ba la pynitynnat da ki bniat hati kin kyllon ha ka jingjot; man la kawei pa kawei ka ïing bah kan jot thiaw.”