AMOS 2 - Khasi CL Bible (BSI)

Ka Moab

¹ U Trai u ong, “Ki briew jong ka Moab ki la ïai leh pop, bad na ka bynta kane ngan pynshitom da shisha ïa ki. Kim shym burom ïa ki shyieng u syiem Edom da kaba thang haduh ba kin da kylla dpei.

² Ngan phah ka ding ha ka ri Moab bad kan thang duh ïa ki kut ka Kerioth. Ki briew ka Moab kin ïap hapdeng ka jingkhynwin jong ka thma katba ki shipai ki dang khynwin bad ki turoi ki dang sawa.

³ Ngan pynïap ïa u nongsynshar ka Moab bad ïa ki nongïalam baroh jong ka ri.”

Ka Judah

⁴ U Trai u ong, “Ki briew jong ka Judah ki la ïai leh pop, bad na ka bynta kane ngan pynshitom da shisha ïa ki. Ki la ñiewbeiñ ïa ki jinghikai jong nga bad kim shym la sumar ïa ki hukum jong nga. Ki la shah ïalam bakla da kijuh ki blei thala ba ki kpa tymmen jong ki, ki shakri.

⁵ Kumta ngan phah ka ding ha Judah bad kan thang duh ïa ki kut ka Jerusalem.”

Ka jingbishar U Blei ïa ka Israel

⁶ U Trai u ong, “Ki paid Israel ki la ïai leh pop, bad na ka bynta kane ngan pynshitom da shisha ïa ki. Ki die sha ka jinglongmraw ïa ki briew kiba hok ki bym lah siew pat ïa ki ram jong ki, ki briew kiba duk ki bym lah siew pat wat ïa ka dor shi jur ki juti.

⁷ Ki kyrdem ïa kiba tlot bad ki bymdonbor bad ki khynñiat sharud lynti ïa kiba duk. U briew bad u kpa jong u ki ïathiah shongkha ïa kajuh ka kynthei mraw, bad kumta ki pyntngit ïa ka kyrteng kaba khuid jong nga.

⁸ Ha man ka jaka mane blei ki rangbah ki thiah ha ki jaiñ ïa kaba ki la shim na kiba duk kiba la buh bynda na ka bynta ki ram. Ha ka templ U Blei jong ki, ki dih ïa ka waiñ ba ki la shim na kito kiba ki shah pisa.

⁹ “Bad pynban, ko ki briew jong nga, dei na ka bynta jong phi ba nga la pynjot khoit ïa ki Amor, ki rangbah kiba jrong kat ki dieng Kedar bad kiba eh kum ki dieng Sning.

¹⁰ Nga la wan ïalam ruh ïa phi na ka ri Ijipt, nga la ïalam ïa phi sawphew snem lyngba ka ri shyiap bad nga la ai ïa phi ïa ka ri ki Amor ba phin ïohkynti.

¹¹ Nga la jied katto katne na ki khun shynrang jong phi ban long ki nongïathuhlypa, bad katto katne na ki samla shynrang jong phi ban long ki Nasir. Hato kane kam long kaba shisha, ko ki paid Israel? Ma nga, U Trai nga la kren.

¹² Hynrei phi la pynlong ïa ki Nasir ban dih waiñ, bad phi la hukum ïa ki nongïathuhlypa ban ym kren ïa ka khubor jong nga.

¹³ Bad mynta, ngan ïuh ïa phi ha madan bad phin ud kum ka kali ba la pynkit khia da u kew.

¹⁴ Wat ki nongmareh stet kin ym lait im, ki rangbah kiba khlaiñ kin duh ïa la ka bor, bad ki shipai kin ym lah wat ban pyllait ïa la ka jong ka jingim.

¹⁵ Ki nongsiatkhnam kin ym lah ïeng ha la ki jaka ïeng, ki nongmareh kiba stet kin ym lah lait, bad ki nongshong kulai kin ym lah ban pyllait ïa la ka jong ka jingim.

¹⁶ Ha kata ka sngi wat ki shipai bashlur tam kin pynhap ïa la ki tiar ïapom bad kin mareh.” U Trai u la kren.