AMOS 1 - Khasi CL Bible (BSI)

¹ Kine ki long ki ktien u Amos, u nongaplangbrot na ka shnong Tekoa. Ar snem shuwa u jumai, mynba u Ussaïah u long u syiem ka Judah, bad u Jeroboam u khun jong u Joash u long u syiem ka Israel, U Blei u la pynpaw ha u Amos ïa kine kiei kiei baroh shaphang ki Israel.

² U Amos u ong, “U Trai u kyrhuh na u lum Seïon; Ka sur jong u ka tied kum u pyrthat na Jerusalem. Ki jaka phlang ki tyrkhong, bad u phlang ha Lum Karmel u ïapstai.”

Ka jingbishar U Blei ïa ki paramarjan Ka Syria

³ U Trai u ong, “Ki briew jong ka Damaskos ki ïai leh pop, bad na ka bynta kane ngan pynshitom da shisha ïa ki; ki la shohbeiñ ïa ki briew ka Gilead da ka kam runar ba khleh bieit.

⁴ Kumta ngan phah ka ding ha ka ïingsyiem ba la tei da u syiem Hasael, bad ngan thang duh ïa ki kut jong u syiem Benhadad.

⁵ Ngan pynkheiñ ïa ki khyrdop nongbah ka Damaskos, bad ngan weng ïa ki nongshong shnong jong ka Them Aben, bad ïa u nongsynshar ka Betheden. Ki briew ka Syria kin shah ring kum ki koidi sha ri Kir.”

Ka Philistia

⁶ U Trai u ong, “Ki briew ka Gasa ki la ïai leh pop, bad na ka bynta kane ngan pynshitom da shisha ïa ki. Ki la ring ïa u paidbah baroh bad die noh ïa ki kum ki mraw ha ki briew ka Edom.

⁷ Kumta ngan phah ka ding ha ki kynroh nongbah ka Gasa, bad kan thang duh ïa ki kut jong ka.

⁸ Ngan weng noh ïa ki nongsynshar jong ki nongbah ka Ashdod bad ka Ashkelon. Ngan pynshitom ïa ka nongbah Ekron, bad ïa baroh ki Philistia kiba dang sah kin ïap.”

Ka Tyros

⁹ U Trai u ong, “Ki briew ka Tyros ki la ïai leh pop, bad na ka bynta kane ngan pynshitom da shisha ïa ki. Ki la ring ïa u paidbah baroh sha ka jinglongmraw ha ka ri ki Edom, bad kim shym bat ïa ka jutang ka jingïalong paralok ba ki la ïateh.

¹⁰ Kumta ngan phah ka ding ha ki kynroh nongbah ka Tyros, bad kan thang duh ïa ki kut jong ka.”

Ka Edom

¹¹ U Trai u ong, “Ki briew ka Edom ki la ïai leh pop, bad na ka bynta kane ngan pynshitom da shisha ïa ki. Ki la beh krad ïa la ki hynmen ki para, ïa ki Israel bad khlem da pyn-i jingisynei ïa ki. Ka jingbitar jong ki kam don pud bad kim shah ba kin ïap.

¹² Kumta ngan phah ka ding ha nongbah Teman, bad kan thang duh ïa ki kut ka Bosrah.”

Ka Ammon

¹³ U Trai u ong, “Ki briew ka Ammon ki la ïai leh pop, bad na ka bynta kane ngan pynshitom da shisha ïa ki. Ha ki thma jong ki ban pynïoh bun ki jaka, ki la puid wat ïa ki kynthei kiba punkhun ha Gilead.

¹⁴ Kumta ngan phah ka ding ha ki kynroh ka nongbah Rabbah, bad kan thang duh ïa ki kut jong ka. Te kan don ki jingkhynwin ha ka sngi ïaleh thma, bad ka jingïaleh kaba jur kum ka 'erlangthari.

¹⁵ U syiem jong ki bad ki rangbah pynïaidkam jong u, kin shah ringmraw.”