3 ÏOANNIS 1 - Khasi CL Bible (BSI)

¹ Na u Nongsharai Balang — Ha u Gaïos ba-ieit jong nga, ïa uba nga ieit da shisha.

² Ko paralok ba-ieit jong nga, nga duwai ba kiei kiei baroh kin ïaid beit na ka bynta jong me bad ba men don ha ka jingkoit jingkhiah bha — kumba nga tip ba me khlaiñ ha ka mynsiem.

³ Nga la sngewkmen bha haba katto katne ngut ki parabangeit ki la wan poi bad ïathuh ïa nga kumno me la ïaineh ha ka jingshisha — kumba me ju im borabor ha ka jingshisha.

⁴ Kam don kano kano kaba kham pynkmen ïa nga ban ïa kaba ïohsngew ba ki khun jong nga ki im ha ka jingshisha.

La ïaroh ïa u Gaïos

⁵ Ko paralok ba-ieit jong nga, me long uba ïaineh bha ha ka kam ba me leh na ka bynta ki parabangeit jong me, wat haba ki long ki nongwei.

⁶ Ki la kren ha ka balang hangne shaphang ka jingieit jong me. Sngewbha ïarap lem ïa ki ban nang bteng ïa ka jingïaid lynti jong ki ha ka rukom ka ban pynsngewbha ïa U Blei.

⁷ Naba ki la mihnoh ha ka jingleit jong ki ha ka jingshakri ïa U Khrist khlem da pdiang jingïarap ei ei na ki bymngeit.

⁸ Ma ngi ki Khristan, namarkata, ngi dei ban ïarap ïa kine ki briew, khnang ba ngi lah ban ïadon bynta ha ka kam jong ki na ka bynta ka jingshisha.

U Diotrephes bad u Demetrios

⁹ Nga la thoh ïa ka shithi kaba lyngkot sha ka balang; hynrei u Diotrephes, uba kwah ban leh kum u nongïalam jong ki, un ym shahshkor ïa kaei kaba nga ong.

¹⁰ Haba ngan wan, ngan sa pynkynmaw ïa kiei kiei baroh kiba u la leh: Ki ktien sniew kiba u kren shaphang jong ngi bad ki ktien lamler kiba u ïathuh! Hynrei kata kam pat biang ha u; un ym pdiang sngewbha ïa ki parabangeit haba ki wan, bad u adong ïa kita kiba kwah ban pdiang ïa ki bad u pyrshang ban beh ïa ki shabar na ka balang!

¹¹ Ko paralok ba-ieit jong nga, to wat pyrthuh bud ïa kaei kaba sniew, hynrei to pyrthuh bud ïa kaei kaba bha. Uno uno uba leh ïa kaba bha u long u jong U Blei; uno uno uba leh ïa kaei kaba sniew um pat shym la ïohi ïa U Blei.

¹² Baroh ki kren bha shaphang u Demetrios; ka jingshisha hi ruh ka kren bha shaphang u. Bad ngi pyndap shuh da ka jingphla jong ngi, bad phi tip ba kaei kaba ngi ong ka long kaba shisha.

Ki jingkhublei khatduh

¹³ Nga don shibun ban ïathuh ïa phi, hynrei ngam kwah ban leh ïa kata da u khulom bad ka sia.

¹⁴ Nga kyrmen ban ïohi shen ïa phi, bad nangta ngin sa ïakren markhmat.

¹⁵ To ka jingsuk kan long bad phi. Ki paralok jong phi baroh ki phah ïa ki jingai khublei. To ai khublei ïa ki paralok jong ngi baroh da lade hi.