2 TIMOTHI 4 - Khasi CL Bible (BSI)

^1-2 Ha khmat jong U Blei bad jong U Khrist Jisu, u ban sa bishar ïa kiba im bad ïa kiba ïap, bad namar ba un sa wan ban synshar kum u Syiem, nga kyrpad da kaba jai jai ïa me ba men ïalap ïa ka khubor, ban ïai kyntu ha kaba pynbna ïa ka (haba dei por ne ha bym dei por), ban pynkynduh, ban pynbeit bad ban pynshlur, da ka jingïaishah baroh haba me hikai.

³ Ka por kan sa poi haba ki briew kin ym shahshkor ïa ka jinghikai shongtynrai badei, hynrei kin kohnguh ïa la ki jingkwah bad kin nang pynbun ïa ki nonghikai ki ban ïathuh ha ki ïa kaei kaba ki shkor ba-dait jong ki, ki kwah ban ïohsngew.

⁴ Kin phai noh na kaba shahshkor ïa ka jingshisha bad kin pynleit jingmut ha ki puriskam kai.

⁵ Hynrei ma me to da sumar adkar ïa lade ha ki jingjia baroh; to ïaishah shitom, trei ïa ka kam u nongïalap jong ka Khubor Babha, bad to pyndep ïa la ka kam baroh kum u shakri jong U Blei.

⁶ Na ka bynta jong nga, ka por ka la poi ïa nga ban shah kñia; ka por ka long mynta ïa nga ban iehnoh ïa kane ka jingim.

⁷ Nga la ïaleh tyngeh ïa ka jingïamareh, nga la pyndep ïa ka jingïaphet, nga la ri ïa ka jingngeit.

⁸ Bad mynta kaba ap ïa nga ka long ka bainong jong ka jingjop ïa kaba la buh beit da U Blei uba U Trai, u nongbishar bahok, u ban ai ha nga ha kata ka Sngi — ym tang ïa nga, hynrei ïa kito baroh kiba ap ïa u da ka jingieit ba un wanpaw.

Ki kyntien bashimet

⁹ To pynkloi ban wan noh sha nga.

¹⁰ U Demas u la kham noh ha ki kam pyrthei bad u la iehnoh ïa nga, bad u la leit noh sha Thessaloni. U Kreskens u la leit sha Galatia; u Titos sha Dalmatia.

¹¹ Tang u Loukas u don bad nga. Leit wad ïa u Markos bad wan ïalam ïa u ryngkat bad me, namar u lah ban ïarap ïa nga.

¹² Ïa u Tukhikos nga la phah sha Ephesos.

¹³ Haba me wan, to wanrah ïa ka jaiñkup ba nga la iehnoh ha Troas bad u Karpos; wanrah ruh ïa ki kot, bad khamtam ïa ki kot ba la sop snieh.

¹⁴ U Aleksandar, u kamar-tama u la pyndik eh ïa nga; U Trai un sa ainong ïa u kat kum ki kam jong u.

¹⁵ Na u ruh men kiar, namar u la kren pyrshah ïa ka jingïalap jong ngi.

¹⁶ Ym don ba kyrshan ïa nga haba nga ïasaid da ïa lade nyngkong eh ha khmat ki bor synshar; baroh ki la iehnoh ïa nga. Nga duwai ba U Blei un ym thew pyrshah ïa ki!

¹⁷ Hynrei U Trai u la pynim ïa nga bad u la ai bor ïa nga, ba nga la lah ban ïalap ïa ka gospel, bad ba ki Jentil baroh kin ïohsngew; U Blei u la pyllait ïa nga na ka jingïap.

¹⁸ Bad U Trai un pyllait im ïa nga na ka jingmynsaw baroh bad un ri pynim bad ïalam ïa nga sha ka hima jong u ha bneng.

Ka jingai khublei khatduh

¹⁹ Nga phah ïa ki jingai khublei ïa ka Priskila bad u Akwila bad ïa ka ïing u Onesiphoros.

²⁰ U Erastos u la sah ha Korinth, bad nga la iehnoh ïa u Trophimos ha Miletos, namar ba u pang.

²¹ To pynkloi ban wan shuwa ka tlang. U Ïubulos bad u Pudens bad u Linos bad ka Klaudia bad kumjuh ruh kiwei pat ki parabangeit baroh ki phah ïa ki jingai khublei jong ki.

²² U Trai un long lem bad ka mynsiem jong phi. Ka jingaiei jong U Blei kan long bad phi baroh. Amen.