2 TIMOTHI 3 - Khasi CL Bible (BSI)

Ki sngi Kiba khatduh

¹ To kynmaw ba kin sa wan ki por kiba jynjar ha ki sngi kiba khatduh.

² Ki briew kin long kiba khwan myntoi, kiba lalot, kiba leh sarong, bad kiba kyr-eit; kin krenbeiñ, kin ym kohnguh ïa la ki kmie ki kpa, ki bymsngewnguh, bad ki bymriewblei;

³ kin long ki bym lehsbun, ki bym ïamap, kiba kren sniew, kiba thala, bad kiba runar; kin isih ïa kaba bha,

⁴ kin long kiba shetkylla, kiba leh thurmur, bad kiba hangamei; kin ieit ïa ka jingsngewbha ban ïa U Blei;

⁵ ki bat ïa kaba paw shabar jong ka niam jong ki, hynrei kin kyntait ïa ka bor bashisha jong ka. To kiar noh na kiba kum kita ki briew.

^6-7 Katto katne na ki leit rung sha ki ïingbriew bad pynshohbieit ïa ki kynthei kiba tlot ba la bankhia da ka jingpynrem jong ki pop jong ki bad kiba la shah ringmraw ha ki jingkwah ba har rukom, ki kynthei kiba pyrshang borabor ban shah hikai hynrei ki bym lah ban tip da lei lei ïa ka jingshisha.

⁸ Kumba u Jannes bad u Jambres ki la ïeng ïaleh pyrshah ïa u Moses, kumta ruh kine ki briew ki ïaleh pyrshah ïa ka jingshisha — ki briew kiba ki jingmut jong ki kim treikam bad kiba la shahjop ha ka jingngeit.

⁹ Hynrei kin ym lah ban leit kham jngai, namar baroh kin ïohi ba katno ki long kiba mutlop. Kata ka long kaei kaba dang dep jia ïa u Jannes bad u Jambres.

Ki jingkyntu khatduh

¹⁰ Hynrei ma me, me la bud ïa ka jinghikai jong nga, ka jinglong jingim jong nga, bad ka jingthmu jong nga ha ka jingim; me la khmih ïa ka jingngeit jong nga, ka jingïaishah jong nga, ka jingieit jong nga, ka jingïaineh jong nga, ka jingshah pynshitom jong nga, bad ki jingshah shitom jong nga.

¹¹ Me tip lut ïa baroh kaba la jia ha nga ha Antiokh, Ikoniom, bad Lystra, ki jingpynshitom bashyrkhei kiba nga la ïaishah! Hynrei u Trai u la pyllait ïa nga na ki baroh.

¹² Baroh kiba kwah ban im ïa ka jingim bariewblei ha U Khrist Jisu kin shah pynshitom;

¹³ bad ki briew kiba sniew bad kiba shukor kin nang ïaid na kaba sniew sha kaba kham sniew, da kaba shukor ïa kiwei bad shah shukor ïa lade.

¹⁴ Hynrei ma me, to ïaineh ha ki jingshisha kiba me la ïoh jinghikai bad kiba me ngeit skhem.

¹⁵ Me tip mano ba la hikai ïa me, bad me kynmaw ba naduh me dang long u khynnah, me la tip ïa ki Jingthoh Bakhuid, kiba lah ban ai ha me ïa ka jingstad kaba ïalam sha ka jingpynim da ka jingngeit ha U Khrist Jisu.

¹⁶ Ka Jingthoh Bakhuid baroh ka long kaba la pyrsad mynsiem da U Blei bad ka long kaba myntoi ban hikai ïa ka jingshisha, ban sneng ïa kaba bakla, ban pynbeit ïa ki jingduna, bad ban ai jingkyntu ïa ka jingim kaba bha,

¹⁷ khnang ba u briew uba shakri ïa U Blei un lah ban long uba bit pura bad uba la biang bha ban leh ïa baroh ki jait kam kiba bha baroh.