2 TIMOTHI 2 - Khasi CL Bible (BSI)

U shipai baïaineh U Jisu Khrist

¹ Na ka bynta jong me, ko khun jong nga, to long khlaiñ da ka jingaiei kaba dei ka jong ngi ha U Khrist Jisu.

² Shim ïa ki jinghikai kiba me la ïohsngew ba nga pynbna ha khmat ki sakhi babun, bad aiti ïa ki ha ki briew kiba lah ban shaniah, kiba lah ban hikai ïa kiwei ruh.

³ To shim bynta lem ha ka jingshah shitom, kum u shipai baïaineh jong U Khrist Jisu.

⁴ U shipai ha ka jingtrei minot u kwah ban pynsngewbha ïa la u rangbah shipai bad kumta um ïakhleh bad ki kam ha ka jingim kaba ïadei lang.

⁵ U nongmareh thong uba mareh ïa ka thong un ym lah ban ïoh ïa ka prais lymda u kohnguh ïa ki rukom pynïaid.

⁶ U nongrep uba la trei shitom u dei ban ïoh ïa ka bynta kaba nyngkong na ka jingot.

⁷ To pyrkhat shaphang kaei kaba nga ong, namar U Trai un pynlah ïa me ban shemphang ïa ka baroh.

⁸ To kynmaw ïa U Jisu Khrist, uba la mihpat na ka jingïap, uba la hiarpateng na u Dabid, kumba la hikai ha ka Khubor Babha kaba nga ïalap.

⁹ Namar ba nga ïalap ïa ka Khubor Babha, nga shahshitom bad nga shah teh kynjri ruh kum u riewrunar.

¹⁰ Hynrei ka ktien jong U Blei kam shah teh ha ki kynjri, bad kumta nga ïaishah ha kiei kiei baroh na ka bynta ki briew ba la jied jong U Blei, khnang ba ma ki ruh kin ïohpdiang ïa ka jingpynim kaba wan lyngba U Khrist Jisu bad kaba wallam ïa ka burom bymjukut.

¹¹ Kane ka long ka jingong kaba shisha: “Lada ngi la ïap bad u, ngin sa ïoh im ruh lem bad u.

¹² Lada ngi ïai bteng ban ïaishah, ngin sa synshar ruh lem bad u. Lada ngin len ïa u, u ruh un len ïa ngi.

¹³ Lada ngim long kiba ïaineh, u ïaisah hi uba ïaineh, namar um lah ban shukor ïa lade.”

U nongtrei ba la pdiang hun

¹⁴ To pynkynmaw ïa ki briew jong me ïa kane, bad to ai ha ki ïa ka jingkyntu bajai jai ha khmat U Blei ba kin ym ïa-wohnia halor ki kyntien ba ki ïakren. Kam long kaba pynmyntoi, hynrei tang ban pynjot ïa ki briew kiba sngap.

¹⁵ To leh ïa kaba bha tam ban ïoh ïa ka jingpynksan ba-pura ha khmat U Blei, kum u nongtrei u bymlehraiñ ïa la ka kam, uta uba hikai beit ïa ka khubor jong ka jingshisha U Blei.

¹⁶ To kiar noh na ki jingïakren ba-thala bad ba-bieit, tang ban ïalam ïa ki briew kham jngai na U Blei.

¹⁷ Kaba kum kata ka jinghikai ka long kum ka prum kaba bam noh ïa ka doh. Ar ngut ki rangbah kiba la hikai kum ïa kita kiei kiei ki dei u Hymenaïos bad u Philetos.

¹⁸ Ki la iehnoh ïa ka lynti ka jingshisha bad pynkylla khongpong ïa ka jingngeit jong ki katto katne ki bangeit da kaba ong ba ka jingpynmihpat ïa ngi ka la dep jia.

¹⁹ Hynrei ïa ka nongrim baskhem kaba U Blei u la buh ym lah ban pynkhih; bad halor jong ka la thoh ïa kine ki ktien: “U Trai u ithuh ïa kito kiba dei ki jong u” bad “Baroh kiba ong ba ki dei ki jong U Trai ki dei ban phai noh na kaba leh bymdei.”

²⁰ Ha ka ïing kaba heh don ki khiew kiba bun jait: Don na ki ïa kiba la thaw da ka rupa bad ka ksiar, kiwei pat da ka dieng bad ka dewbyrtha; don na ki na ka bynta ka jingpyndonkam kyrpang, kiwei pat ban pyndonkam man ka por.

²¹ Lada uno uno u pynkhuid ïa lade na kiei kiei baroh kiba sniew, yn pyndonkam ïa ki na ka bynta ki jingthmu kiba kyrpang, namar la pynkyntang ïa ki bad ki long kiba myntoi ïa u Kynrad jong ki, kin long kiba bit ïa ka ban pyndonkam na ka bynta ka kam babha baroh.

²² To kiar noh na ki jingkwah brai ka jinglong samla, bad ïaleh tyngeh na ka bynta ka hok, ka jingngeit, ka jingieit, bad ka jingsuk, lem bad kito kiba da ka dohnud basngur ki khot kyrpad ïa U Trai na ka bynta ka jingïarap.

²³ Hynrei to kiar noh na ki jingïatainia ba-bieit bad ba khlem jingmut; me tip ba ki kut ha ka jingïakajia.

²⁴ Kum u shakri jong U Trai, mem dei ban ïakajia.

²⁵ Me dei ban long uba lehsbun ïa baroh, u nonghikai uba bha bad ba-ïaishah, uba jemnud ha kaba pynbeit ïa ki nongïaleh pyrshah jong me, naba ka lah ban long ba U Blei un ai ha ki ïa ka lad ba kin kylla-kaba-mut bad wan sha ka jingtip ïa ka jingshisha.

²⁶ Bad nangta kin wan sha ka jingsngewthuh bad kin lait na ka jingriam u Ksuid, uba la pynngat ïa ki bad la pynlong ïa ki ban kohnguh ïa ka mon jong u.