2 TIMOTHI 1 - Khasi CL Bible (BSI)

Ka Jinglamphrang

¹ Na u Paul, u apostol U Khrist Jisu da ka mon U Blei, ha uba la phah pynbna ïa ka jingim ba la kular kaba ngi don ha U Khrist Jisu —

² Ha u Timothi, u khun ba-ieit jong nga: To ai ba U Blei uba U Kpa bad U Khrist Jisu uba U Trai jong ngi un ai ha me ïa ka jingaiei, ka jingisynei, bad ka jingsuk.

Ka jingainguh bad ka jingpynshlur

³ Nga ainguh ïa U Blei, ïa uba nga shakri da ka jingïatiplem bakhuid, kumba ki kpa tymmen jong nga ki la leh. Nga ainguh ïa u haba nga kynmaw ïa me borabor ha ki jingduwai jong nga mynmiet bad mynsngi.

⁴ Nga kynmaw ïa ki ummat jong me, bad nga kwah eh ban ïohi ïa me, khnang ba yn ïoh pyndap ïa nga da ka jingkmen.

⁵ Nga kynmaw ïa ka jingngeit basngur kaba me don, ka jingngeit kaba kum ka jong ka kmierad jong me ka Lois bad kaba ka kmie jong me ka Ïuniki ruh ka don. Nga sngewthikna ba me ruh me don ïa ka.

⁶ Na kane ka daw nga pynkynmaw ïa me ban ïai pynrhem ïa kata ka jingai kaba U Blei u la ai ha me mynba la buh ïa ki kti jong nga ha me.

⁷ Naba U Mynsiem uba U Blei u la ai ha ngi um pynlong ïa ngi kiba khawpud; pynban, U Mynsiem jong u, u pyndap ïa ngi da ka bor, ka jingieit, bad ka bor halor lade.

⁸ Kumta wat sngewlehrain, ban sakhi na ka bynta U Trai jong ngi, lymne ban sngewlehrain ïa nga, u nongsah byndi na ka bynta U Khrist. Pynban, to shim ïa la ka bynta ha kaba shahshitom na ka bynta ka Khubor Babha, kumba U Blei u ai ïa me ka bor ban leh ïa ka.

⁹ U la pynim ïa ngi bad u la khot ïa ngi ban long ki briew jong u hi, ym namar ïa kaei kaba ngi la leh, hynrei namar ka jingthmu jong u hi bad ka jingaiei.

¹⁰ U la ai ha ngi ïa kane ka jingaiei lyngba U Khrist Jisu ha shuwa ban sdang ka pyrthei, hynrei mynta la pynpaw da ka jingwan U Nongpynim jong ngi, U Khrist Jisu. U la pynkut noh ïa ka bor jong ka jingïap bad lyngba ka Gospel la pynpaw ïa ka jingim bymïap shuh.

¹¹ U Blei u la thung ïa nga kum u apostol bad u nonghikai ban pynbna ïa ka Khubor Babha, bad dei na kane ka daw ba nga shahshitom ïa kine kiei kiei.

¹² Hynrei nga dap da ka jingsngewskhem, namar nga tip hano nga la shaniah, bad nga sngewthikna ba u lah ban sumar skhem haduh kata ka Sngi ïa kaei kaba u la aiti ha nga.

¹³ To batskhem ïa ki ktien bashisha kiba nga la hikai ïa me, kum ka nuksa ïa me ban bud, bad ban ïaisah ha ka jingngeit bad ka jingieit kiba long ki jong ngi ha U Khrist Jisu.

¹⁴ Da ka bor jong U Mynsiem Bakhuid, uba im hapoh jong ngi, to sumar ïa kiei kiei kiba bha ïa kiba la pynkhamti ha me.

¹⁵ Me tip ba uwei pa uwei uba don ha ka probins jong ka Asia, ba kynthup ïa u Phygelos bad u Hermogenes, ki la iehnoh ïa nga.

¹⁶ To U Trai un pyn-i ïa ka jinglehisynei ha ka longïing u Onesiphoros, namar ba u la pyntngen ïa nga bunsien.

¹⁷ Um shym la sngewlehrain ïa nga ba nga don ha ka ïingbyndi, hynrei mar ïapoi ha Rom, u la sdang ban wad ïa nga haduh ba un da shem.

¹⁸ To U Trai un ai ïa ka jinglehisynei ha u ha kata ka Sngi! Bad phi tip shai kdar katno ba u la leh na ka bynta jong nga ha Ephesos.