2 SAMUEL 9 - Khasi CL Bible (BSI)

U Dabid bad u Mephibosheth

¹ Ha kawei ka sngi, u Dabid u kylli, “Don mano mano ba dang sah na ka longïing jong u Saul? Lada don, nga kwah ban pyn-i ka jingbhasbun ïa u na ka bynta u Jonathan.”

² Don uwei u shakri uba kyrteng u Siba ha ka longïing jong u Saul, bad la bthah ïa u ban leit sha u Dabid. “Me dei u Siba?” u syiem u la kylli. “Nga hangne, ko Kynrad,” u jubab.

³ U syiem u kylli ïa u, “Don mano mano ba dang sah na ka longïing u Saul ïa uba nga lah ban pyn-i ka jingïaineh bad ka jingbhasbun ïa u, kumba nga la kular ha U Blei ba ngan leh?” U Siba u jubab, “Don sa tang uwei na ki khun shynrang jong u Jonathan. U dei uba dkoh.”

⁴ “Ha-ei u don?” u syiem u kylli. “Ha ïing u Makhir, u khun jong u Ammiel, ha Lodebar,” u Siba u jubab.

⁵ Kumta u syiem Dabid u phah shaw ïa u.

⁶ Haba u Mephibosheth, u khun jong u Jonathan bad u ksiew jong u Saul, u wan poi, u la dem ngon ha khmat u Dabid da ka jingburom. U Dabid u ong, “Mephibosheth!” bad u jubab, “Nga hangne, ko Kynrad.”

⁷ “Wat sheptieng,” u Dabid u jubab. “Ngan lehbha ïa phi na ka bynta u Jonathan, u kpa jong phi. Ngan ai pat ha phi ïa ka khyndew ka shyiap baroh kaba dei ka jong u Saul, u kparad jong phi, bad phin long uba la pdiang sngewbha borabor ha ka miej bam jong nga.”

⁸ U Mephibosheth u dem ngon sa shisien bad u ong, “Ko Kynrad, ngam long uba kham bha ban ïa u ksew uba la ïap! Balei ba phin da long uba bha haduh katne ïa nga?”

⁹ Nangta u syiem u phah khot ïa u Siba, u shakri jong u Saul, bad u ong, “Nga ai ha u Mephibosheth, u ksiew jong u kynrad jong me, ïa baroh kaba dei ka jong u Saul bad ka longïing jong u.

¹⁰ Ma me, ki khun shynrang jong me, bad ki shakri jong me, phin ïarep ha ka khyndew na ka bynta ka longïing jong u Saul, u kynrad jong phi, bad wallam ïa ka jingmih nangta ban pynbiang bam ïa ki. Hynrei u Mephibosheth hi un ïailong uba shah khot sngewbha sha ka miej bam jong nga.” (U Siba u don khatsan ngut ki khun shynrang bad arphew ngut ki shakri.)

¹¹ U Siba u jubab, “Ngan leh ïa kaei kaei baroh kaba ma phi Syiem Kynrad phi hukum.” Kumta u Mephibosheth u ïabam lang ha ka miej bam jong u syiem, kum uwei na ki khun shynrang jong u syiem.

¹² U Mephibosheth u don uwei u khun samla uba kyrteng u Mika. Baroh ki dkhot ka longïing jong u Siba ki kylla long ki shakri jong u Mephibosheth.

¹³ Kumta u Mephibosheth, uba la dkoh ki kjat baroh ar tylli, u la shong la sah ha Jerusalem, u da bam ïa baroh ki jingbam jong u ha ka miej bam jong u syiem.