2 SAMUEL 8 - Khasi CL Bible (BSI)

Ki jingjop thma u Dabid

¹ Katto katne por hadien, u Syiem Dabid u la tur ïaleh biang ïa ki Philistia, u la jop ïa ki bad la pynkut noh ruh ïa ka jingsynshar jong ki halor ka ri.

² Nangta u jop ïa ki Moab. U la phah thiah ïa ki koidi ha madan bad pynïap ar ngut na man ki lai ngut. Kumta ki Moab ki kylla long noh ki raïot jong u, bad ki siew khajna sha u.

³ Nangta u la jop ïa u khun jong u Rehob, u Hadadeser, u syiem ka hima Sobah jong ka Syria, katba u Hadadeser u dang don ha lynti ban pynïoh pat ïa la ka bor synshar halor ka ri harud ka wah Ïuphratis kaba shaneng.

⁴ U Dabid u la ïohkem shihajar hynñiewspah ngut ki shipai shong kulai bad arphew hajar ngut ki shipai ïaid kjat. U la buh bun tylli ki kulai na ka bynta ki shispah tylli ki kali ïapom bad ïa kiba sah u la pyndkoh.

⁵ Haba ki Syria na Damaskos ki la phah ka kynhun shipai ban ïarap ïa u Hadadeser, u Dabid u la tur ïaleh ïa ka bad u la pynïap arphew ar hajar ngut ki rangbah.

⁶ Nangta u la pynïeng ki dara sah shipai ha ki ri jong ki, bad ki la kylla long ki raïot jong u bad ki siew khajna sha u. U Trai u la pynlong ïa u Dabid ban jop kylleng kylleng.

⁷ U Dabid u la kurup ïa ki stieh ksiar ba la rah da ki rangbah synshar jong u Hadadeser bad u la rah ïa ki sha Jerusalem.

⁸ U la shim ruh shibun ka rnong na Betah bad na Berothai, ki nongbah kiba la synshar da u Hadadeser.

⁹ U Toi u syiem Hamath u ïohsngew ba u Dabid u la jop ïa baroh ka kynhun ïapom jong u Hadadeser.

¹⁰ Kumta u la phah ïa u Joram, u khun jong u ban khublei ïa u Syiem Dabid bad ban ai khublei ïa u namar ka jingjop jong u ïa u Hadadeser, ïa uba u Toi u la ïaleh pyrshah la bunsien. U Joram u rah na ka bynta u Dabid ki jingai sngewbha kiba la thaw da ka ksiar, ka rupa, bad ka rnong.

¹¹ U Syiem Dabid u la pynkyntang ïa ki na ka bynta ban pyndonkam ha ka jingmane, lem bad ka rupa bad ka ksiar kaba u la kurup na ki jaitbynriew kiba u la jop —

¹² ki Edom, ki Moab, ki Ammon, ki Philistia, bad ki Amalek — kumjuh ruh shi bynta na ka jinglute kaba u la kurup na u Hadadeser.

¹³ U Dabid u la nang kham pawnam shuh shuh haba u la wan phai na kaba pynïap khatphra hajar ngut ki nong Edom ha ka Them Mluh.

¹⁴ U la pynïeng ki dara sah shipai ha kylleng ka Edom, bad ki briew hangta ki kylla long ki raïot jong u. U Trai u la pynlong ïa u Dabid ban jop kylleng kylleng.

¹⁵ U Dabid u la synshar halor ka ri Israel baroh, bad u da pynthikna ba ki briew jong u kin ïohmad ïa ka jinglehhok bad ka jingbymshah shiliang.

¹⁶ U Joab, u khun ka Seruïah, u long u rangbah ai hukum jong ka kynhun shipai; u Jehoshaphat, u khun jong u Ahilud u long uba khmih sumar ïa ki dulir;

¹⁷ u Sadok, u khun jong u Ahitub bad u Ahimelekh, u khun jong u Abiathar ki long ki lyngdoh; u Seraïah u long u sekretari ka ïingbishar;

¹⁸ u Benaïah, u khun jong u Jehoïada u long uba khmih ïa ki nongïada jong u Dabid; bad ki khun shynrang jong u Dabid ki la long ki lyngdoh.