2 SAMUEL 7 - Khasi CL Bible (BSI)

Ka khubor u Nathan ha u Dabid

¹ U Syiem Dabid u la sah ha la ka ïingsyiem, bad U Trai u la sumar ïa u na ki nongshun jong u baroh.

² Nangta u syiem u ong ha u Nathan, u nongïathuhlypa, “Nga shong hangne ha ka ïing ba la tei da ki dieng Kedar, hynrei ïa ka Synduk ka Jutang U Blei pat la buh ha ka ïingjaiñ!”

³ U Nathan u jubab, “Leh ïa kano kano kaba phi pyrkhat, namar U Trai u don ryngkat bad phi.”

⁴ Hynrei ha kata ka miet U Trai u ong ha u Nathan,

⁵ “Khie leit ïathuh ha u Dabid u shakri jong nga ba nga ong ha u, ‘Mem dei ma me u ban tei ka templ ïa nga ba ngan shong.

⁶ Naduh ka por ba nga la pyllait ïa ki paid Israel na Ijipt haduh mynta, ngam pat ju shong ha ka templ; nga la leit kylleng kylleng da kaba shong ha ka ïingjaiñ.

⁷ Ha ka jingleit jong nga baroh bad ki paid Israel ngam pat ju ong ha uno uno na ki nongïalam ba nga la thung, balei ba kim shym la tei ïa nga ka templ kaba thaw da ki dieng Kedar.’

⁸ “Kumta ïathuh ha u shakri jong nga u Dabid ba nga U Trai Badonbor Baroh nga ong ha u, ‘Nga la shim ïa me na kaba sharai ïa ki langbrot ha ki pyntha phlang, bad nga la thung ïa me u nongsynshar ïa ki briew jong nga ki Israel.

⁹ Nga la don ryngkat bad me kat shaba me leit, bad nga la jop ïa ki nongshun jong me baroh katba me nang ïaid shaphrang. Ngan pynlong ïa me uba pawnam kat ki nongïalam kiba khraw tam ha ka pyrthei.

^10-11 Nga la jied ka jaka ïa ki briew jong nga ki Israel bad nga la pynsah ïa ki hangta, ha kaba kin im khlem da shah banbeiñ shuh. Naduh ba ki rung sha kane ka ri, ki la shah tur ïaleh ha ki riewrunar, hynrei kane kan ym jia shuh. Nga kular ban sumar ïa me na ki nongshun jong me baroh bad ban ai ha me ki khun ki ksiew.

¹² Ynda me ïap, bad la tep ïa me bad ki kpa tymmen jong me, ngan thung syiem ïa uwei na ki khun shynrang jong me, bad ngan pynkhlaiñ ïa ka hima jong u.

¹³ Un dei ma u, u ban tei ka templ ïa nga, bad ngan pynthikna ba ka longïing syiem jong u kan ïaineh.

¹⁴ Ngan long u kpa jong u, bad u, un long u khun jong nga. Haba u leh bakla, ngan sneng sympat ïa u kumba u kpa u sneng sympat ïa la u khun.

¹⁵ Hynrei ngan ym weng noh na u ïa la ka jingkyrshan kumba nga la weng noh na u Saul, ïa uba nga la pynkynriah noh khnang ba men long syiem ma me.

¹⁶ Men ïai don ki khun ki ksiew, bad ngan pynlong ïa ka hima jong me ban neh junom. Ka longïing syiem jong me kan ym kut.’ ”

¹⁷ U Nathan u ïathuh ha u Dabid ïa baroh kaba U Blei u la pynpaw ha u.

Ka jingduwai ainguh u Dabid

¹⁸ Nangta u Syiem Dabid u leit shapoh ka Ïingjaiñ ka Jingdon Ryngkat U Trai, u shong bad u duwai, “A Trai Nongsynshar, ngam long uba bit ïa kaei kaba me la leh na ka bynta jong nga lymne wat ka longïing jong nga.

¹⁹ Pynban, mynta me la leh kham bun, A Trai Nongsynshar; me la pynlong ki jingkular shaphang ki khun ki ksiew jong nga ha ki snem ki ban wan. Bad me shah ïa u briew ban ïohi ïa kane, A Trai Nongsynshar!

²⁰ Sa kaei shuh nga lah ban ong ha me! Me ithuh ïa nga u shakri jong me.

²¹ Ka la long ka mon jong me bad ka jingthmu jong me, ban leh ïa kane; me la leh ïa kine kiei kiei kiba khraw khnang ban hikai ïa nga.

²² Katno me long uba khraw; A Trai Nongsynshar! Ym don uwei pat uba kum ma me, ngi la ju tip ba dei tang ma me hi uba long U Blei.

²³ Ym don kawei pat ka jaitbynriew ha ka pyrthei kaba kum ki Israel, ïa kiba me la pyllait im na ka jinglongmraw ban pynlong ïa ki, ki briew jong me hi. Kiei kiei kiba khraw bad kiba phylla me la leh na ka bynta jong ki, ki la pynphriang ïa ka nam jong me kylleng satlak ka pyrthei. Me la beh noh ïa kiwei pat ki jaitbynriew bad ïa ki blei jong ki katba ki briew jong me ki nang ïaid shaphrang, ki briew ïa kiba me la pyllaitluid na Ijipt ban long ki jong me hi.

²⁴ Me la pynlong ïa ki Israel, ki briew jong me hi junom, bad me, A Trai, me la long U Blei jong ki.

²⁵ “Bad mynta, A Trai U Blei, to pyndep ha ki por baroh ïa ka kular ba me la pynlong shaphang jong nga bad ki khun ki ksiew jong nga, bad to leh kumba me la kren ba men leh.

²⁶ Ka nam jong me kan long kaba khraw, bad ki briew kin ong junom, ‘U Trai Nongsynshar u long U Blei halor ki Israel.’ Bad men pynneh ïa ka longïing syiem jong nga ha ki por baroh.

²⁷ A Trai Nongsynshar, U Blei ki Israel! nga sngew shlur ban duwai kane ka jingduwai ha me, namar me la pynpaw ïa kane baroh ha nga, u shakri jong me, bad ba me la ong ha nga ba men pynlong syiem ïa ki khun ki ksiew jong nga.

²⁸ “Bad mynta, A Trai Nongsynshar, me long U Blei; me ju ïai bat ïa la ki kular, bad me la ai ha nga ïa kane ka kular kaba phylla.

²⁹ Nga kyrpad ïa me ban kyrkhu ïa ki khun ki ksiew jong nga khnang ba kin ïai ïohpdiang ïa ka jinglehbha jong me. Ma me, A Trai Nongsynshar, me la kular ïa kane, bad ka jingkyrkhu jong me kan ïaisah bad ki khun ki ksiew jong nga junom.”