2 SAMUEL 6 - Khasi CL Bible (BSI)

La wallam ïa ka Synduk Ka Jutang sha Jerusalem

¹ Sa shisien pat u Dabid u khot lang ïa ki shipai kiba kynsai tam ha Israel, kiba long baroh laiphew hajar ngut,

² bad u ïalam ïa ki sha Baal ha Judah khnang ban wallam nangta ïa ka Synduk ka Jutang U Blei, kaba don ïa ka kyrteng U Trai Badonbor Baroh, uba ka khet jong u ka long halor ki Kherub.

³ Ki la shim ïa ka na ka ïing jong u Abinadab kaba don halor lum, bad ki buh ïa ka ha ka kali thymmai. U Ussah bad u Ahio, ki khun shynrang jong u Abinadab, ki lam lynti ïa ka kali,

⁴ bad u Ahio u ïaid na khmat.

⁵ U Dabid bad ki Israel baroh ki la ïashad kmen bad ïarwai shitrhem da ka bor baroh ban burom ïa U Trai. Ki da tem ïa ki duitara, ki jingtem ksai, ki ksing, ki kanjari, bad ki shakuriaw.

⁶ Haba ki wan poi ha jaka shoh kew jong u Nakon, ki masi dab ki la jynthut, bad u Ussah u kner bad ïohbat ïa ka Synduk ka Jutang.

⁷ Hangta hi U Trai u la bitar lep ïa u Ussah bad u la pynïap ïa u namar ka jingbymburom jong u. U Ussah u la ïap hangta hajan ka Synduk ka Jutang,

⁸ bad kumta ïa kata ka jaka la khot Peres Ussah naduh kata ka por. U Dabid u la dom namar ba U Trai u la pynshitom ïa u Ussah ha ka jingbitar.

⁹ Nangta u Dabid u la sheptieng ïa U Trai bad u ong, “Mynta kumno ngan lah ban shim ïa ka Synduk ka Jutang U Trai?”

¹⁰ Kumta u la rai ban ym leit shim ïa ka bad u sha Jerusalem; pynban, u phai noh na lynti bad u lam ïa ka sha ka ïing jong u Obed Edom, u traishnong jong ka nongbah Gath.

¹¹ Ka la don hangta lai bnai, bad U Trai u kyrkhu ïa u Obed Edom bad ïa ka longïing jong u.

¹² U Syiem Dabid u ïohsngew ba namar ka Synduk ka Jutang, U Trai u la kyrkhu ïa ka longïing jong u Obed Edom bad baroh kat kiba u don; kumta u leit shim noh ïa ka Synduk ka Jutang na ka ïing jong u Obed ban leit rah ïa ka sha Jerusalem ryngkat bad ka jinglehkmen kaba khraw.

¹³ Haba ki rangbah kiba bah ïa ka Synduk ka Jutang ki la ïaid hynriew jam, u Dabid u la phah ïa ki ban sangeh katba u dang ai ka jingkñia ïa U Trai da u masi bad u khun masi ba la pynsngaid.

¹⁴ U Dabid, uba shu pien tang da ka jaiñ linen, u la shadkmen da ka bor jong u baroh ban burom ïa U Trai.

¹⁵ Bad kumta ma u bad ki Israel baroh ki la rah ïa ka Synduk ka Jutang U Trai shatei sha Jerusalem da ka jingrisa kmen bad ka jingpynsawa ïa ki turoi.

¹⁶ Katba dang wallam ïa ka Synduk shapoh ka nongbah, ka Mikhal, ka khun jong u Saul, ka la peit na ka jingkhangïit bad ka la ïohi ïa u Syiem Dabid ba u shad bad kynthih kylleng sawdong ha ka jingshad bakyntang, bad ka la i ngiah ïa u.

¹⁷ Ki la wallam ïa ka Synduk bad buh ïa ka ha ka jaka jong ka hapoh ka Ïingjaiñ kaba u Dabid u la pynïeng na ka bynta jong ka. Nangta u ainguh ki jingkñia bad ki jingainguh jingïasyllok ha U Trai.

¹⁸ Haba u la dep ai ki jingkñia, u la kyrkhu ïa u paidbah ha ka kyrteng U Trai Badonbor Baroh

¹⁹ bad u sam jingbam sha ki baroh. U ai ha uwei pa uwei u shynrang bad ha kawei pa kawei ka kynthei ha Israel mar uwei u kpu, shi lyngkhot ka doh syang, bad katto katne ki soh kismis. Nangta baroh ki la leit phai sha ïing.

²⁰ Hadien kata, haba u Dabid u la leit sha ïing ban khublei ïa la ki ba-ha-ïing, ka Mikhal ka wan mih ban ïakynduh ïa u. “U syiem ki Israel u la pynkhraw nam ïa lade ha kane ka sngi!” ka ong. “U la pynlyngkhuit ïa lade kum u bieit ha khmat ki shakri kynthei jong ki rangbah synshar jong u.”

²¹ U Dabid u jubab, “Nga la shad ban pyndonburom ïa U Trai, uba la jied ïa nga ha ka jaka u kpa jong pha bad ka longïing jong u, ban pynlong ïa nga u nongïalam jong ki briew jong u ki Israel. Bad ngan ïai shad ban pyndonburom ïa U Trai,

²² bad ngan pynjahburom shuh shuh ïa lade. Pha lah pyrkhat ba ngam long ei ei, hynrei kito ki kynthei kin ñiewburom shikatdei ïa nga!”

²³ Ka Mikhal, ka khun jong u Saul, kam shym la ïoh khun.