2 SAMUEL 5 - Khasi CL Bible (BSI)

U Dabid u kylla long u syiem ka Israel bad ka Judah

¹ Nangta baroh ki jait Israel ki la leit sha u Dabid ha Hebron bad ki ong ha u, “Ngi dei ki para doh para snam jong phi.

² Ha ka por ba la leit, wat haba u Saul u dang long u syiem jong ngi, phi la ïalam ïa ki rangbah Israel ha ka thma bad U Trai u la kular ïa phi ba phin ïalam ïa ki briew jong u bad ban long u nongsynshar jong ki.”

³ Kumta baroh ki nongïalam jong ki Israel ki la wan sha u Syiem Dabid ha Hebron. U la pynlong ïa jingïateh lok bakyntang bad ki, ki la pynsleh ïa u, bad u la long u syiem ki Israel.

⁴ U Dabid u la dap laiphew snem ka rta mynba u la long syiem, bad u la synshar sawphew snem.

⁵ U la synshar ha Hebron halor ka Judah haduh hynñiew snem shiteng, bad ha Jerusalem halor ki Israel bad Judah baroh haduh laiphew lai snem.

⁶ Ka poi ka por haba u Syiem Dabid bad ki rangbah jong u ki mih ban tur ïaleh ïa ka Jerusalem. Ki Jebus, kiba shong hangta, ki pyrkhat ba u Dabid um lah ban jop ïa ka nongbah, bad kumta ki ong ha u, “Men ym ïohrung hangne da lei lei; wat kiba matlah bad kiba dkoh ki lah ban khang ïa me.”

⁷ (Hynrei u Dabid u la ïohknieh ïa ka kut Seïon jong ki, bad la tip kyrteng ïa ka kum ka “Nongbah u Dabid.”)

⁸ Ha kata ka sngi u Dabid u ong ha ki rangbah jong u, “Hato don uno uno hangne uba isih ïa ki Jebus kumba isih ma nga? Haduh katta kat ban pynïap ïa ki? Te khie leit kiew lyngba ka nur-um bad tur ïaleh ïa kito ki bapli ki matlah bad ki dkoh.” (Dei na kata ka daw ba la ong, “Kiba matlah bad kiba dkoh kim lah ban rung sha ka ïing ka jong U Trai.”)

⁹ Hadien ka jingïohknieh ïa ka kut, u Dabid u la shong hapoh jong ka bad u la khot kyrteng ïa ka “Ka Nongbah u Dabid.” U la tei ïa ka nongbah sawdong jong ka, da kaba sdang na ka jaka ha kaba la pyndap khyndew ha ka phang mihngi jong u lum.

¹⁰ U la nang khlaiñ ha ki por baroh, namar U Trai U Blei Badonbor Tam u la don ryngkat bad u.

¹¹ U syiem Hiram jong ka Tyros u phah ka kynhun ki nongkhaïi sha u Dabid; u pynbiang ïa u ki dieng sawdong Kedar bad ki misteri dieng bad ki misteri maw ban tei ïing ïa ka ïingsyiem.

¹² Bad kumta u Dabid u sngewthuh ba U Trai u la pynskhem ïa u kum u syiem ki Israel bad u la kyntiew ïa ka hima jong u na ka bynta ki briew jong u.

¹³ Hadien ba u la kynriah na Hebron sha Jerusalem, u Dabid u shim shuh shuh ki tnga kliar bad ki tnga trai, bad u ïoh bun ki khun shynrang bad ki khun kynthei.

¹⁴ Kine harum ki long ki khun jong u ïa kiba la kha ha Jerusalem: U Shammua, u Shobab, u Nathan, u Solomon,

¹⁵ U Ibhar, u Elishua, u Nepheg, u Japhia,

¹⁶ u Elishama, u Eliada, bad u Eliphelet.

Ka jingjop ïa ki Philistia

¹⁷ La ïathuh ïa ki Philistia ba la thung ïa u Dabid kum u syiem ki Israel, kumta ka kynhun shipai jong ki ka la mih ban leit kem ïa u. Haba u Dabid u ïohsngew ïa kata, u la leit hiar sha ka jaka ba la ker kynroh.

¹⁸ Ki Philistia ki la poi ha ka Them Rephaim bad ki ïohknieh ïa ka.

¹⁹ U Dabid u kylli na U Trai, “Hato ngan tur ïaleh ïa ki Philistia? Hato men ai ha nga ïa ka jingjop?” “Ho-oid, khie tur ïaleh!” U Trai u la jubab. “Ngan ai ha me ka jingjop!”

²⁰ Kumta u Dabid u leit sha Baal Perasim bad hangta u la jop ïa ki Philistia. U ong, “U Trai u la sar naphang lin ïa ki nongshun jong nga kum ka jingshlei um.” Bad kumta ïa kata ka jaka la khot Baal Perasim.

²¹ Haba ki Philistia ki la phet, ki la iehnoh shadien ïa ki bleithaw jong ki, bad u Dabid bad ki rangbah jong u ki la rah noh ïa ki.

²² Nangta ki Philistia ki leit phai pat sha ka Them Rephaim bad ki knieh biang ïa ka.

²³ Sa shisien u Dabid u kylli na U Trai, uba jubab, “Wat tur ïaleh ïa ki nangne, hynrei leit sawdong bad pynkhreh ban tur ïaleh ïa ki na kawei ka liang, najan ki dieng Balsam.

²⁴ Haba me ïohsngew ïa ka jingsawa ka jingïaid halor ki kliar dieng, te tur ïaleh ïa ki namar ngan ïaid ha shuwa jong me ban jop ïa ka kynhun shipai jong ki Philistia.”

²⁵ U Dabid u la leh kumba U Trai u la hukum, bad u la lah ban beh noh pat ïa ki Philistia naduh Geba shi lynter lynti haduh Geser.