2 SAMUEL 4 - Khasi CL Bible (BSI)

U Ishbosheth u shah pynïap

¹ Haba u Ishbosheth, u khun jong u Saul u ïohsngew ba u Abner u la shah pynïap ha Hebron, u la sheptieng, bad baroh ki paid Israel ki la sngewsheptieng.

² U Ishbosheth u don ar ngut ki rangbah synshar kiba long ki nongïalam ïa ki kynhun lute, u Baanah bad u Rekhab, ki khun shynrang jong u Rimmon, uba na Beeroth, hapoh ka jait Benjamin. (Ïa ka Beeroth la ñiew kum ka bynta jong ki Benjamin.

³ Ki traishnong jong ka ki la phet sha Gittaim, ha kaba ki la shong la sah naduh kata ka por.)

⁴ Uwei pat u nonghiarpateng jong u Saul, u dei u Mephibosheth, u khun jong u Jonathan, uba la dap san snem ka rta mynba u Saul bad u Jonathan ki la shah pynïap. Haba ka khubor shaphang ka jingïap jong ki ka la wan poi na ka nongbah Jesreel, ka nongsumar jong u ka la rah ïa u bad ka phet krad; hynrei namar ka jingkyrkieh palat ka la pynhap ïa u, bad u la kylla long uba dkoh.

⁵ U Rekhab bad u Baanah ki leit sha ka ïing u Ishbosheth bad ki poi hangta ha ka por shiteng sngi, katba u dang pynjahthait ïa lade ha ka por shiteng sngi.

⁶ Ka kynthei ha ka jingkhang ka la shoh samthiah ngai katba ka dang tai kew bad ka ïohthiah, kumta u Rekhab bad u Baanah ki ïohrung shapoh.

⁷ Mar ïarung shapoh, ki leit sha ka kamra thiah u Ishbosheth, ha kaba u dang ïohthiah lyngngai, bad ki la pynïap ïa u. Nangta ki la ot ïa ka khlieh jong u, ki rah ïa ka bad ki, bad ki ïaid baroh shi miet lyngba ka Them Jordan.

⁸ Ki ai ïa kata ka khlieh ha u Syiem Dabid ha Hebron, bad ki ong ha u, “Kane hangne ka dei ka khlieh u Ishbosheth, u khun jong u Saul, u nongshun jong phi, uba la pyrshang ban pynïap ïa phi. Ha kane ka sngi U Trai u la shah ïa u Syiem Kynrad ban pynhiarkput ïa u Saul bad ki khun ki ksiew jong u.”

⁹ U Dabid u jubab ïa ki, “Nga la shim jingsmai ha U Trai uba im, uba la pyllait ïa nga na ki jingma baroh!

¹⁰ U nonglamktien uba la wan sha nga ha Siklag bad ïathuh ha nga ïa ka jingïap u Saul, u la pyrkhat ba u la wallam ka khubor babha. Nga la kem ïa u, bad phah pynïap ïa u. Kata ka dei ka bainong ba nga la ai ha u na ka bynta kata ka khubor babha jong u!

¹¹ Katno kaba kham sniew kan long ïa ki riewbymman kiba pynïap ïa u briew uba lui lui uba dang ïohthiah ha la ka jong ka ïing! Mynta ngan pynhiarkput ïa phi namar ka jingpynïap ïa u bad ngan pyndam ïa phi na sla khyndew!”

¹² U Dabid u ai hukum, bad ki shipai jong u ki la pynïap ïa u Rekhab bad ïa u Baanah bad ki la ot ïa ki kti bad ki kjat jong ki, ïa kiba ki la sdien hajan ka pung ha Hebron. Ki la shim ïa ka khlieh jong u Ishbosheth bad ki la tep ïa ka ha ka jingtep jong u Abner hangta ha Hebron.