2 SAMUEL 3 - Khasi CL Bible (BSI)

¹ Ka jingïaleh hapdeng ki kynhun ïaleh kiba ïashah ïa ka longïing jong u Saul bad kito kiba ïashah ïa u Dabid ka la neh slem bha. Katba u Dabid u nang khlaiñ nang khlaiñ, ki nongïaleh pyrshah jong u ki la nang tlot nang tlot.

Ki khun shynrang jong u Dabid

² Kine harum ki hynriew ngut ki khun shynrang, ha ka jingbuh ryntih kat kum ka jingkha ïa ki; la kha na ka bynta u Dabid ha Hebron: u Amnon, uba ka kmie jong u ka dei ka Ahinoam, kaba na Jesreel;

³ u Khileab, uba ka kmie jong u ka dei ka Abigail, ka tnga jong u Nabal uba la ïap, kaba na Karmel; u Absalom, uba ka kmie jong u ka dei ka Maakah, ka khun jong u Talmai u syiem ka Geshur;

⁴ u Adonijah, uba ka kmie jong u ka dei ka Haggith; u Shephataïah, uba ka kmie jong u ka dei ka Abital;

⁵ u Ithream, uba ka kmie jong u ka dei ka Eglah. Ïa kine ki khun shynrang baroh la kha ha Hebron.

U Abner u ïasoh bad u Dabid

⁶ Katba ka jingïaleh ka dang bteng hapdeng ki kynhun jong u Dabid bad ki kynhun kiba ïashah ïa ka longïing jong u Saul, u Abner u la nang kham khrawbor napdeng ki nongbud jong u Saul.

⁷ Ha kawei ka sngi u Ishbosheth u khun jong u Saul u kynnoh sniew ïa u Abner ba u ïathiah bad ka Rispah, ka tnga kliar jong u Saul, ka khun jong u Aïah.

⁸ Kane ka la pynbitar lep ïa u Abner, “Me tharai ba ngan shetkylla ïa u Saul? Me tharai shisha ba nga shakri ïa ki Judah?” u ong. “Naduh mynnyngkong, nga la ïaineh skhem na ka bynta u Saul u kpa jong me, ki hynmen ki para shynrang jong u, bad ki paralok jong u, bad nga da ïa me na kaba shahjop ha u Dabid; pynban ha kane ka sngi me wad dong ïa nga shaphang ka kynthei!

^9-10 U Trai u la kular ha u Dabid ba un shim noh ïa ka hima na u Saul bad ki khun ki ksiew jong u, bad un thung ïa u Dabid kum u syiem jong ki Israel bad ki Judah, naduh na kawei ka tduh sha kawei pat ka tduh jong ka ri. Mynta to U Blei un shoh ïap ïa nga lada ngam pynurlong shisha ïa kane!”

¹¹ U Ishbosheth u la sheptieng eh ïa u Abner kat haduh ba um nang ang wat tang shikyntien ruh.

¹² U Abner u phah ïa ki nonglamktien sha u Dabid uba don ha Hebron ha kata ka por, ban ong, “Uei u ban synshar ïa kane ka ri? Ïateh kular bad nga, bad ngan ïarap ïa phi ban pynwan ïa ki Israel baroh sha ka liang jong phi.”

¹³ “Ka biang!” u Dabid u jubab. “Ngan ïateh kular bad phi tang ha kawei ka kyndon: phi dei ban wallam ïa ka Mikhal ka khun jong u Saul sha nga haba phi wan ïakynduh ïa nga.”

¹⁴ Bad u Dabid ruh u phah ïa ki nonglamktien sha u Ishbosheth ban ong, “Ai noh ha nga ïa ka Mikhal ka tnga jong nga. Nga la siew shispah tylli ki doh otsher jong ki Philistia ban shongkurim ïa ka.”

¹⁵ Kumta u Ishbosheth u phah shim noh ïa ka na u tnga jong ka, u Paltiel u khun jong u Laish.

¹⁶ U Paltiel u leit bud ïa ka haduh ka nongrit Bahurim, u da ïam katba u dang leit. Hynrei u Abner u ong, “Khie leit noh sha ïing,” bad u leh kumta.

¹⁷ U Abner u leit sha ki nongïalam jong ki Israel, bad u ong ha ki, “La slem bah phi la kwah ïa u Dabid ban long u syiem jong phi.

¹⁸ Mynta, kane ka dei ka kabu jong phi. Kynmaw ba U Trai u la ong, ‘Ngan pyndonkam ïa u Dabid u shakri jong nga ban pyllait im ïa ki briew jong nga ki Israel na ki Philistia bad na kiwei pat ki nongshun jong ki baroh.’ ”

¹⁹ U Abner u la kren ruh ha ki briew jong ka jait Benjamin, bad nangta u leit sha Hebron ban ïathuh ha u Dabid aïu ki paid Benjamin bad Israel ki la mynjur ban leh.

²⁰ Haba u Abner u wan sha u Dabid ha Hebron ryngkat bad arphew ngut ki rangbah, u Dabid u pynlong ka jingkhawai na ka bynta jong ki.

²¹ U Abner u ong ha u Dabid, “Ngan leit noh mynta, bad ngan pynwan ïa ki Israel baroh sha phi ko Syiem Bakhraw. Kin pdiang ïa phi kum u syiem, bad nangta phin ïoh ïa kaei kaba phi la kwah bad phin synshar halor ka ri baroh kawei.” U Dabid u ai ka jingkular jingshngain ïa u Abner bad u phah noh ïa u.

La pynïap ïa u Abner

²² Kham hadien, u Joab bad ki kiwei pat ki rangbah synshar jong u Dabid ki la wan phai na kaba leit lute, ki da wanrah shikatdei ka mar lute bad ki. Hynrei u Abner um don shuh bad u Dabid hangta ha Hebron, namar u Dabid u la lah phah noh ïa u lem bad ka jingkular jingshngain.

²³ Haba u Joab bad ki rangbah jong u ki la poi, la ïathuh ha u ba u Abner u la wan sha u syiem Dabid, bad ba u Dabid u la phah noh ïa u lem bad ka jingkular jingshngain.

²⁴ Kumta u Joab u leit sha u syiem bad u ong ha u, “Kaei kane kaba phi la leh? U Abner u la wan sha phi — balei phi shah ba un shu leit kumto?

²⁵ U la wan shane ban shukor ïa phi bad ban tip ïa kaei kaei baroh kaba phi leh bad ïa ka leit ka wan jong phi. Khlem pep, phi tip ïa kata!”

²⁶ Hadien ba u la mihnoh na u Dabid, u Joab u phah ïa ki nonglamktien ban leit beh ïa u Abner, bad ki la wallam ïa u na ka Pukri Sirah; hynrei u Dabid um tip ei ei shaphang kata.

²⁷ Haba u Abner u la wan poi ha Hebron, u Joab u ïalam ïa u kham sharud ha ka khyrdop, kumba u kwah ban ïakren jar jar bad u, bad hangta u la dung ïa u na ka kpoh. Bad kumta la pynïap ïa u Abner namar ba u la pynïap ïa u Asahel, u para u Joab.

²⁸ Haba u Dabid u tip ïa kata, u ong, “U Trai u tip ba ma nga bad ki khun ki hajar jong nga ngim don jingrem ha ka jingpynïap ïa u Abner.

²⁹ To ka jingpynshitom na ka bynta kane kan hap halor u Joab bad ka longïing jong u baroh! Ha kawei pa kawei ka pateng to yn don u shynrang ha ka longïing jong u, uba don ka jingpang 'ñiangkulia lane ka jingpang 'ñiangthohlieh kaba shyrkhei lane uba hap ban trei tang ïa ka kam ba trei ki kynthei lane uba shah pynïap ha ka thma lane uba kyrduh bam!”

³⁰ Kumta u Joab bad u Abishai u para jong u ki la pynhiarkput ïa u Abner namar ka jingpynïap ïa u Asahel u hynmen u para jong ki ha ka thma ha Gibeon.

La tep ïa u Abner

³¹ Nangta u Dabid u hukum ïa u Joab bad ïa ki rangbah jong u ban kad ïa la ki jaiñ, ban phong ka jaiñ khain, bad ban ïambriew na ka bynta u Abner. Bad ha ka jingleit ontep, u syiem Dabid da lade hi u ïaid hadien ka synduk metïap.

³² La tep ïa u Abner ha Hebron, bad u syiem u ïam da kaba kyang jam ha ka jaka tep, bad ki briew baroh ki leh kumjuh.

³³ U Dabid u rwai ïa kane ka jingrwai ïambriew na ka bynta u Abner: “Balei u Abner u dei ban ïap kum u bieit?

³⁴ Ym shym la teh ïa ki kti jong u, Bad ïa ki kjat jong u ym shym la khum; U la ïap kum uba la shah pynïap ha ki nongkamsniew!” Bad ki briew baroh ki la ïam sa shisien pat na ka bynta jong u.

³⁵ Baroh shi sngi ki briew ki wan kyntu ïa u Dabid ban bam ei ei, hynrei u Dabid u la pynlong ka kular kaba shongkhia, “Ieh U Blei un shoh ïap ïa nga lada nga bam ei ei shuwa ba ka sngi kan sep!”

³⁶ Ki la buh jingmut ïa kane bad ki la sngewbha eh. Da shisha, kaei kaei baroh kaba u syiem u la leh ka la pynsngewbha ïa ki paidbah.

³⁷ Baroh ki paidbah jong u Dabid bad baroh ki paidbah ha Israel ki sngewthuh ba u syiem um don bynta ha ka jingpynïap ïa u Abner.

³⁸ U syiem u ong ha ki rangbah synshar jong u, “Phim ïasngewthuh ba ha kane ka sngi uwei u nongïalam bakhraw ha Israel u la ïap?

³⁹ Wat la nga long u syiem uba la jied da U Blei, nga sngewtlot mynta ka sngi. Kine ki khun shynrang jong ka Seruïah ki long ka jingma ïa nga. To U Trai un pynshitom ïa kine ki nongkamsniew kumba ki dei ban ïoh!”