2 SAMUEL 24 - Khasi CL Bible (BSI)

U Dabid u shim ka jingkheiñbriew

¹ U Trai u la bitar ïa ki Israel sa shisien, bad kumta u la pynlong ïa u Dabid ban wanrah jingjynjar halor jong ki. U Trai u ong ha u, “Khie leit bad ñiew ïa ki paid Israel bad ki paid Judah.”

² Kumta u Dabid u la ai hukum ïa u Joab, u rangbah ai hukum jong ka kynhun shipai jong u: “Khie leit bad ki rangbah pynïaidkam jong phi ha kylleng ki jait Israel na kawei ka tduh jong ka ri sha kawei pat, bad ñiew ïa ki briew. Nga kwah ban tip ki don haduh katno.”

³ Hynrei u Joab u jubab ïa u syiem, “Syiem Kynrad, to U Trai U Blei jong phi un pynroi ïa ki Israel shispah shah ban ïa kaba ki don mynta, bad to phin dang im ban ïohi ïa u ba u leh ïa kata. Hynrei balei keiñ u Syiem Kynrad u kwah ban leh ïa kane?”

⁴ Hynrei u syiem u pynlong ïa u Joab bad ïa ki rangbah pynïaidkam jong u ba kin kohnguh ïa ka hukum jong u; ki la mihnoh na khmat jong u bad ki la leit ban ñiew ïa ki paid Israel.

⁵ Ki la jam ïa ka Jordan bad ki la sher dara ha ka phang bashathie jong ka Aroer, ka nongbah kaba don hapdeng jong ka them, ha ka ri ki Gad. Na kata ka jaka ki la leit shaphang shatei sha Jaser;

⁶ bad beit beit sha Gilead bad sha Kadesh ha ka ri ki Hit. Nangta ki leit sha Dan, bad na Dan ki leit shaphang sepngi sha Sidon.

⁷ Nangta ki leit shaphang shathie sha Tyros ka nongbah ba la ker kynroh, nangta sha baroh ki nongbah jong ki Hib bad ki Kanaan, bad khatduh eh sha Beersheba, ha ka bynta bashathie jong ka Judah.

⁸ Kumta hadien khyndai bnai bad arphew sngi ki la leit phai sha Jerusalem, da kaba ïaid lyngba ïa ka ri baroh kawei.

⁹ Ki la ai jingtip ha u syiem ïa ka jingdon baroh jong ki rangbah kiba bit ban long shipai: phra lakh ha Israel bad san lakh ha Judah.

¹⁰ Hynrei hadien ba u Dabid u la dep shim ïa ka jingkheiñbriew, ka jingïatiplem jong u ka la sdang ban pynshitom ïa u, bad u ong ha U Trai, “Nga la leh ïa ka pop kaba shyrkhei ha kaba leh ïa kane! Sngewbha map ïa nga. Nga la leh bieit.”

^11-12 U Trai u la ong ha u Gad, u nongïathuhlypa jong u Dabid, “Khie leit bad ong ha u Dabid ba nga ai ha u lai tylli ki jingjied. Ngan leh ïa kano kano kaba u jied.” Ha ka step kaba bud, hadien ba u Dabid u la khie thiah,

¹³ u Gad u la leit sha u, ban ïathuh ïa u ïa kaei ba U Trai u la ong, bad u kylli, “Kano kata ka ban long? Lai snem ka 'nemsniew ha ka ri jong phi, lane lai bnai kaba phet ïap na ki nongshun jong phi, ne lai sngi ka jingïapthem ha ka ri jong phi? Mynta to pyrkhat, bad ïathuh ha nga kaei ka jubab ba ngan leit rah sha U Trai.”

¹⁴ U Dabid u jubab, “Nga don ha ka khim khait! Hynrei ngam kwah ba ngan shah pynshitom ha ki briew. Ai ba U Trai da lade hi un dei uta u ban pynshitom ïa ngi, namar u long uba dap da ka jingisynei.”

¹⁵ Kumta U Trai u phah ïa ka jingïapthem ha Israel, kaba neh naduh kata ka step haduh ka por kaba u la jied. Na kawei ka tduh jong ka ri sha kawei pat ka tduh ki la ïap haduh hynñiewphew hajar ngut ki Israel.

¹⁶ Haba u angel U Trai u la jan pynjot ïa ka Jerusalem, U Trai u la kylla ka jingmut ban pynshitom ïa ki briew bad u ong ha u angel uba pynïap ïa ki, “Sangeh! Ka la biang katto!” U angel u la don hajan ka jaka shoh kew jong u Araunah, u nong Jebus.

¹⁷ U Dabid u la ïohi ïa u angel uba u pynïap ïa ki briew, bad u ong ha U Trai, “Dei ma nga uba la leh pop. Nga dei uta uba la leh bakla. Kine ki briew bapli ki la leh aïu? Me dei ban pynshitom ïa nga bad ïa ka longïing jong nga.”

¹⁸ Ha kata kajuh ka sngi u Gad u la leit sha u Dabid, bad u ong ha u, “Khie leit shatei sha ka jaka shoh kew jong u Araunah bad tei ka duwan ïa U Trai.”

¹⁹ U Dabid u la kohnguh ïa ka hukum U Trai bad u la leit kumba u Gad u la ïathuh ïa u.

²⁰ Haba u Araunah u la khmih sharum bad u ïohi ïa u syiem bad ïa ki rangbah synshar jong u ba ki ïawan kiew sha u. U rynsied ïa lade ha madan ha khmat jong u Dabid

²¹ bad u kylli, “Ko Syiem Kynrad, balei phi wan shane?” U Dabid u jubab, “Ban thied ïa ka jaka shoh kew jong phi bad ban tei ka duwan ïa U Trai, khnang ban pynsangeh ïa ka jingïapthem.”

²² “Syiem Kynrad, to shim ïa ka,” u Araunah u ong, “bad to kñia ha U Trai ïa kano kano kaba phi mon. Kine hangne ki masi dab ban thang kum ka jingainguh halor ka duwan; kine hangne ki dei ki lyngkor jong ki bad ka lyntang shoh kew ban pyndonkam kum ka diengthang.”

²³ U Araunah u la ai lut ha u syiem bad u ong ha u, “To U Trai U Blei jong phi un pdiang ïa ka jingainguh jong phi.”

²⁴ Hynrei u syiem u jubab, “Em, ngan da siewdor ïa ka. Ngan ym ai ha U Trai U Blei jong nga ïa ki jingkñia kiba nga khlem da siewdor ei ei.” Bad u la thied ïa ka jaka shoh kew bad ïa ki masi dab ha ka dor sanphew tylli ki sbai rupa.

²⁵ Nangta u la thaw ka duwan ïa U Trai bad u la ai ki jingainguh thang bad ki jingainguh jingïasyllok. U Trai u la jubab ïa ka jingduwai jong u, bad ka jingïapthem ha Israel ka la sangeh.