2 SAMUEL 23 - Khasi CL Bible (BSI)

Ki kyntien khatduh jong u Dabid

¹ U Dabid, u khun jong u Jesse, u la long u briew uba U Blei u la pynlong khraw, uba U Blei u Jakob u la jied ban long syiem bad u la long u nongthaw ïa ki jingrwai ba-bang na ka bynta ki Israel. Kine ki long ki kyntien khatduh jong u Dabid:

² U Mynsiem jong U Trai u kren lyngba jong nga; ka khubor jong u ka don ha ki rmiang shyntur jong nga.

³ U Blei ki Israel u la kren; u nongïada jong ki Israel u ong ha nga: “U syiem uba synshar da ka jinglehhok, uba synshar da kaba kohnguh ïa U Blei,

⁴ u long kum ka sngi kaba shat ha ka step bym don lyoh, ka sngi kaba pynshat phyrnai ïa u phlang hadien u slap.”

⁵ Bad kata ka long kumno ba U Blei un kyrkhu ïa ki khun ki ksiew jong nga namar u la pynlong bad nga ka jutang ka ban neh junom, ka jingïateh kular ka ban ym lah pynkheiñ ka jingkular ka ban ym kylla. Kata baroh ka dei kaba nga angnud; kata kan long ka jingjop jong nga, bad U Blei da kaba thikna un pynurlong ïa ka.

⁶ Hynrei ki briew ki bymriewblei ki long kum ki shiah ba la bret sharud; ym don ba lah ban ktah ïa ki da ki kti suda.

⁷ Phi hap ban pyndonkam da ka tiar nar lane da u sum; yn thang lut khoit ïa ki.

Ki shipai bapawnam jong u Dabid

⁸ Kine ki long ki kyrteng jong ki shipai bapawnam jong u Dabid: uba nyngkong u dei u Josheb Basshebeth na Takhemon; uba long u nongïalam jong “Ki Lai Ngut”; u la ïaleh da la u sum pyrshah ïa ki phraspah ngut ki rangbah bad u la pynïap ïa ki baroh ha kawei ka thma.

⁹ Uba ar na ki lai ngut kiba pawnam u dei u Eleasar, u khun jong u Dodo, uba na ka jait Ahoh. Ha kawei ka sngi, ma u bad u Dabid ki la kob ïa ki Philistia kiba la ïalumlang na ka bynta ka thma.

¹⁰ Ki Israel ki la kynran dien, hynrei u la ïeng skhem bad u la ïaleh ïa ki Philistia haduh ba ka kti jong u ka la pyrkhing haduh katta katta ha kaba um lah shuh ban pyllait ïa la ka waitlam. U Trai u la jop ka jingjop kaba khraw ha kata ka sngi. Hadien ba ka la kut, ki Israel ki la wan phai sha ka jaka kaba u Eleasar u don bad ki la sloit ïa ki jingkieng atiar na kiba la ïap.

¹¹ Uba lai na ki lai ngut kiba pawnam u dei u Shammah, u khun jong u Agee, uba na Harar. Ki Philistia ki la ïalumlang ha Lehi, ha kaba don ka lyngkha rymbai. Ki Israel ki la phet krad na ki Philistia,

¹² hynrei u Shammah u la ïeng skhem ha ka lyngkha, u la ïada ïa ka, bad u la pynïap ïa ki Philistia. U Trai u la jop ka jingjop kaba khraw ha kata ka sngi.

¹³ Haba la jan sdang ka aïom ot, lai ngut na ki “Laiphew Ngut” ki la leit hiar sha ka krem Adullam, ha kaba u Dabid u don, katba shi kynhun ki Philistia ki dang shong dara ha ka Them Rephaim.

¹⁴ Ha kata ka por, u Dabid u don hapoh u lum ba la ker kynroh, bad shi kynhun ki Philistia ki la shong shnong ha Bethlehem.

¹⁵ U Dabid u la kynmaw ïing, bad u ong, “A ban da don uno uno uba wanrah umdih ïa nga na ka pukri kaba harud ka khyrdop Bethlehem!”

¹⁶ Ki lai ngut ki shipai bapawnam ki tur lyngba ka jaka shong dara jong ki Philistia, ki tong um na ka pukri, bad ki wanrah ïa ka sha u Dabid. Hynrei um treh dih ïa ka; hynrei u la theh ïa ka kum ka jingainguh ha U Trai,

¹⁷ bad u ong, “A Trai, ngam lah da lei lei ban dih ïa kane! Kan long kum ka jingdih ïa ka snam jong kine ki rangbah kiba la kheiñduh ïa la ka jingim!” Kumta um treh ban dih ïa ka. Kito ki long ki kam shlur jong ki lai ngut ki shipai bapawnam.

¹⁸ U Abishai, u para jong u Joab (ka kmie jong ki ka dei ka Seruïah) u long u nongïalam jong ki “Laiphew Ngut kiba pawnam”. U la ïaleh da la u sum pyrshah ïa ki laispah ngut ki rangbah bad u la pynïap ïa ki, bad u la long uba pawnam napdeng “Laiphew Ngut”.

¹⁹ U long uba pawnam tam na ki “Laiphew Ngut”, bad u la kylla long u nongïalam jong ki, hynrei um shym da pawnam kat ki “Lai Ngut.”

²⁰ U Benaïah, u khun jong u Jehoïada, uba na Kabseel, u dei uwei pat u shipai uba pawnam; u la leh shibun ki kam shlur; kynthup ka jingpynïap ïa ki ar ngut ki khla-ka-wait jong ki Moab. Shisien u la leit hiar sha ka thliew ha ka sngi ba hap ïor bad u pynïap ïa u sing.

²¹ U la pynïap ruh ïa u nong Ijipt, u briew uba heh uba kieng atiar da u sum. U Benaïah u la tur ïaleh ïa u da u dieng tangon, u knieh ïa u sum na ka kti jong u nong Ijipt, bad u la pynïap ïa u da uta.

²² Kito ki dei ki kam shlur jong u Benaïah, uba long uwei na ki “Laiphew Ngut.”

²³ U la long uba la paw napdeng jong ki, hynrei um da pawnam eh kat ki “Lai Ngut.” U Dabid u buh ïa u ban khmih ïa ki nongap phira jong u.

^24-39 Kiwei pat ki dkhot jong ki “Laiphew Ngut” ki kynthup ïa: U Asahel, u para jong u Joab U Elhanan, u khun jong u Dodo na Bethlehem U Shammah bad u Elika na Harod U Heles na Pelet U Ira, u khun jong u Ikkesh na Tekoa U Abieser na Anathoth U Mebunnai na Hushah U Salmon na Ahoh U Maharai na Netophah U Heleb, u khun jong u Baanah na Netophah U Ittai, u khun jong U Ribai na Gibeah kaba ha Benjamin U Benaïah na Pirathon U Hiddai na ki them kiba hajan Gaash U Abialbon na Arabah U Asmabeth na Bahurim U Elaïahba na Shaalbon Ki khun shynrang jong u Jashen U Jonathan U Shammah na Harar U Ahiam, u khun jong u Sharar na Harar U Eliphelet, u khun jong u Ahasbai na Maakah U Eliam, u khun jong u Ahithophel na Gilo U Hesro na Karmel U Paarai na Arab U Igal, u khun jong u Nathan na Sobah U Bani na Gad U Selek na Ammon U Naharai na Beeroth, u nongrah atiar jong u Joab U Ira bad u Gareb na Jattir U Uriah u jait Hit. Baroh ki long laiphew hynñiew ngut ki shipai bapawnam.