2 SAMUEL 22 - Khasi CL Bible (BSI)

Ka jingrwai jingjop ka jong u Dabid

¹ Haba U Trai u la pyllait im ïa u Dabid na u Saul bad na kiwei pat ki nongshun, u Dabid u la rwai ïa kane ka jingrwai ha U Trai.

² U Trai u long u nongïada jong nga, u long ka kut baskhem jong nga.

³ U Blei jong nga u long ka jingïada jong nga; bad nga shngain bad u, U ïada ïa nga kum ka stieh; u da ïa nga bad ri pynim ïa nga. U long u nongpynim jong nga. U ïada ïa nga bad u pyllait im ïa nga na ka jingumsnam.

⁴ Nga khot kyrpad ïa U Trai, bad u pyllait im ïa nga na ki nongshun jong nga. To ïaroh ïa U Trai!

⁵ Ki jingat phyllung ka jingïap ki don sawdong jong nga, ki jingat phyllung ka jingpynjot ki tyllun halor jong nga;

⁶ Ka jingma jong ka jingïap ka don sawdong jong nga, bad ka jingtep ka pynap la ka jingriam ïa nga.

⁷ Ha ka jingjynjar nga la khot kyrpad ïa U Trai, nga la khot kyrpad ïa U Blei jong nga ban ïoh jingïarap. Ha ka templ jong u, u ïohsngew ïa ka sur jong nga, u shahshkor ïa ka jingkyang jong nga ban ïoh jingïarap.

⁸ Nangta ka khyndew ka kyiuh bad khynñiuh; ki nongrim jong ka suiñbneng ki khih bad ki kyiuh, namar ba U Blei u la bitar!

⁹ Ka tdem ka mih na ki thliew khmut jong u, bad ka ding ba bam duh bad ki rnga kiba rhem na ka shyntur jong u.

¹⁰ U tar ïa ka suiñbneng bad u wan hiar; bad u lyoh uba dum hapoh ki kjat jong u.

¹¹ U her stet halor ki Kherub u ïaid halor ki thapniang jong ka lyer.

¹² U kah ïa lade da ka jingdum; ki lyoh barben, kiba dap da ka um, ki ker sawdong ïa u;

¹³ ki rnga barhem ki sei ding na ka leilieh ha shuwa jong u.

¹⁴ Nangta U Trai u la kyrhuh na suiñbneng, bad ïa ka sur jong U Blei Badonbor Baroh la ïohsngew.

¹⁵ U siat ïa ki khnam bad u pynsaphriang ïa ki nongshun jong u; da ka jingthaba ka leilieh u pynher ïa ki.

¹⁶ Ka trai duriaw ka paw tyngkreiñ bad ïa ki nongrim jong ka pyrthei ruh la pynpaw, haba U Trai u kynteit ïa ki nongshun jong u, bad u kyrhuh ïa ki ha ka jingbitar.

¹⁷ U Trai u kner najrong bad u shim ïa nga, bad u sei ïa nga na ki um bajylliew.

¹⁸ U la pyllait im ïa nga na ki nongshun bakhlaiñbor jong nga bad na kito baroh kiba shun ïa nga — Ki long kiba khlaiñbor eh ban ïa nga.

¹⁹ Haba nga don ha ka jynjar, ki la tur ïaleh ïa nga, hynrei U Trai u la ïada ïa nga.

²⁰ U la ïarap ïa nga ban lait na ka jingma; u la pyllait im ïa nga namar u la sngewbha eh ïa nga.

²¹ U Trai u ainong ïa nga namar ba nga leh ïa kaba dei; u la kyrkhu ïa nga namar ba nga long uba shida.

²² Nga la kohnguh ïa ka aiñ jong U Trai; Ngam shym la phai noh na U Blei jong nga.

²³ Nga la leh ïa ki aiñ jong u baroh; Ngam shym la lyndet ïa ki hukum jong u.

²⁴ U tip ba ngam don jingpalat, ba nga la sumar ïa lade na kaba leh bakla.

²⁵ Bad kumta u ainong ïa nga namar ba nga leh ïa kaba dei, namar u tip ba nga long uba shida.

²⁶ A Trai, me long uba ïaineh ha kito kiba ïaineh ha me; bad uba bha nadong shadong ha kito kiba janai.

²⁷ Me long uba khuid ha kito kiba khuid, hynrei uba pyrshah ha kito kiba sniew.

²⁸ Me pyllait im ïa kito kiba sngewrit, hynrei me pynhiar ïa kito kiba sarong.

²⁹ Ma me, ko Trai, me long ka jingshai jong nga, me beh noh ïa ka jingdum jong nga.

³⁰ Me ai ha nga ka jingkhlaiñ ban tur ïaleh ïa ki nongshun jong nga bad ka bor ba ngan jop ïa ki jingïada jong ki.

³¹ Une U Blei — ki kam jong u ki long kiba janai; ki ktien jong u kiba lah ban shaniah! U long kum ka stieh ïa baroh kiba wad jingïada jong u.

³² U Trai tang ma u hi u long U Blei; U Blei tang ma u hi uba long ka jingïada jong ngi.

³³ Une U Blei u long ka jakarieh baskhem jong nga, bad u pynshngain ïa ka lynti ïaid jong nga.

³⁴ U pynstet ïa ki kjat jong nga kum ka skei; u sumar ïa nga ha ki lumbah.

³⁵ U hikai ïa nga ban ïaleh thma, ba kumta nga lah ban pyndonkam ïa ka ryntieh kaba khlaiñ.

³⁶ A Trai, Me ïada bad me pynim ïa nga, ka jingïarap jong me ka la pynkhraw ïa nga.

³⁷ Me la da ïa nga na kaba shah kem, bad ngam pat ju kyllon.

³⁸ Nga beh kthong ïa ki nongshun jong nga, bad nga jop ïa ki; ngam shym sangeh tad haduh ba ngan da pynjot ïa ki.

³⁹ Nga shoh pynkyllon ïa ki, bad kim lah khie shuh ki thiah ha ka jingshahjop ha khmat jong nga.

⁴⁰ Me ai ha nga ka jingkhlaiñ ban ïaleh thma, bad ka jingjop halor ki nongshun jong nga.

⁴¹ Me la pynlong ïa ki nongshun jong nga ban phet krad na nga; nga pynjot ïa kito kiba shun ïa nga.

⁴² Ki wad jingïarap, hynrei ym don uba pyllait im ïa ki; ki khot kyrpad ïa U Trai, hynrei um jubab.

⁴³ Nga pynlwet ïa ki, bad ki kylla long kum u pui pui, nga ïuh halor jong ki kum ïa ka ktieh ha ki lynti.

⁴⁴ Me la pyllait im ïa nga na ki briew jong nga kiba ïaleh pyrshah bad me la pynneh ïa ka jingsynshar jong nga halor ki jaitbynriew; ki briew kiba ngam ju ithuh ki la long mynta ki raïot jong nga.

⁴⁵ Ki nongwei ki dem ngon ha khmat jong nga; haba ki ïohsngew ïa nga, ki kohnguh.

⁴⁶ Ki la duh ka jingshlur jong ki bad ki wan da kaba kyiuh na la ki jong ki kut.

⁴⁷ U Trai u im! To ïaroh ïa u nongïada jong nga! To pynbna ïa ka jingkhraw jong U Blei uba khlaiñ uba pynim ïa nga!

⁴⁸ U ai ha nga ka jingjop halor ki nongshun jong nga, U pyndem ïa ki jaitbynriew hapoh jong nga,

⁴⁹ bad u pyllait im ïa nga na ki nongshun jong nga. A Trai, me ai ha nga ka jingjop halor ki nongshun jong nga bad me ïada ïa nga na ki riewthombor.

⁵⁰ Bad kumta ngan ïaroh ïa me, ko Trai, hapdeng ki jaitbynriew, nga rwai ki jingïaroh ïa me.

⁵¹ U Blei u ai ki jingjop bakhraw ha u syiem jong u; u pynpaw ka jingieit baïaineh ha uba u la jied, ha u Dabid bad ha ki khun ki ksiew jong u junom.