2 SAMUEL 21 - Khasi CL Bible (BSI)

La pynïap ïa ki khun ki ksiew jong u Saul

¹ Ha ka por ka jingsynshar jong u Dabid, la don ka 'nemsniew kaba jur kaba la neh haduh lai snem lynter. Kumta u Dabid u kylli na U Trai shaphang kata bad U Trai u ong, “U Saul bad ka longïing jong u ki long kiba rem ha ka jingpynïap briew; u la pynïap ïa ki paid Gibeon.”

² (Ki paid Gibeon kim dei ki Israel; ki dei ka kynhun barit ki Amor ïa kaba ki Israel ki la kular ban ïada, hynrei u Saul u la pyrshang ban pynjot ïa ki namar ka jingshitrhem na ka bynta ki paid Israel bad Judah.)

³ Kumta u Dabid u khot hajir ïa ki paid Gibeon bad u ong ha ki, “Kaei ngan leh na ka bynta jong phi? Nga kwah ban pynbeit noh ïa ka jingbakla ïa kaba la leh ïa phi, khnang ba phin kyrkhu ïa ki briew jong U Trai?”

⁴ Ki jubab, “Ïa ka jingïakajia bad u Saul lem bad ka longïing jong u ym lah ban pynbeit da ka rupa lane ka ksiar, lymne ba ngi kwah ban pynïap ïa uno uno u Israel.” “Te, kaei phi pyrkhat ba ngan leh na ka bynta jong phi?” u Dabid u kylli.

⁵ Ki jubab, “U Saul u la kwah ban pynjot ïa ngi bad ban ym pynsah iwei ruh hangno hangno ha Israel.

⁶ Kumta aiti ha ngi hynñiew ngut na ki khun ki ksiew shynrang jong u, bad ngin phasi ïa ki ha khmat U Trai ha Gibeah, ka shnong trai jong u Saul, u syiem ba la jied da U Trai.” “Ngan aiti ïa ki,” u syiem u ong.

⁷ Hynrei namar ka kular kaba kyntang kaba ma u bad u Jonathan ki la pynlong uwei ïa uwei pat, u Dabid u la pyllait ïa u Mephibosheth, u khun jong u Jonathan bad u ksiew jong u Saul.

⁸ Pynban, u la shim ïa u Armoni bad ïa u Mephibosheth, ki ar ngut ki khun shynrang jong ka Rispah, ka khun u Aïah, ba ka la ïoh na u Saul; u shim ruh ïa ki san ngut ki khun shynrang jong ka Merab, ka khun jong u Saul, ba ka la ïoh na u Adriel u khun jong u Barsillai uba na Meholah.

⁹ U Dabid u aiti ïa ki ha ki paid Gibeon, kiba la phasi ïa ki halor u lum ha khmat U Trai — baroh hynñiew ngut ki la ïa-ïap lang. Ka dei haba jan kut artat ka pyrem, ha kaba sdang ka aïom ot barli, haba la pynïap ïa ki.

¹⁰ Nangta ka Rispah, ka khun jong u Aïah, ka tnga kliar jong u Saul, ka la pyndonkam da ka jaiñ khain ban thaw jingda ïa lade halor u mawsiang ha kaba don ki metïap, bad ka la sah hangta naduh kaba sdang ka aïom ot haduh ban da hap u slap synrai. Ha ka por mynsngi ka ju beh ïa ki sim na ki metïap, bad ha ka por mynmiet ka ju ïada ïa ki na ki mradkhlaw.

¹¹ Haba u Dabid u ïohsngew ïa kaei ba ka Rispah ka la leh,

¹² u leit shim ïa ki shyieng jong u Saul bad jong u Jonathan, u khun jong u na ki briew ka Jabesh ha Gilead. (Ki la tuh ïa ki na ka jaka paidbah ha Beth Shan, ha kaba ki Philistia ki la sdien ïa ki met jong ki ha ka sngi ba ki la pynïap ïa u Saul halor u Lum Gilboa.)

¹³ U Dabid u la shim ïa ki shyieng jong u Saul bad u Jonathan, bad u la lumlang ruh ïa ki shyieng jong ki hynñiew ngut ki rangbah kiba la shah phasi.

¹⁴ Nangta ki la tep ïa ki shyieng jong u Saul bad u Jonathan ha ka jingtep jong u Kish, u kpa jong u Saul, ha Sela ha ka ri Benjamin, ki da pyndep ïa kata baroh kaba u syiem u la hukum. Bad hadien kata, U Blei u jubab ïa ki jingduwai jong ki na ka bynta ka ri.

Ki thma pyrshah ïa ki ramhah ka Philistia

¹⁵ Ka la don sa kawei ka thma hapdeng ki Philistia bad ki Israel, bad u Dabid bad ki rangbah jong u ki la leit bad ïaleh ïa ki Philistia. Ha kawei ka thma u Dabid u khie tlot.

¹⁶ U ramhah uba kyrteng u Ishbibenob, uba rah ïa u sum rnong uba khia kumba lai kilo shiteng bad uba kieng ka waitlam bathymmai, u la pyrkhat ba u lah ban pynïap ïa u Dabid.

¹⁷ Hynrei u Abishai u khun jong ka Seruïah u wan ïarap ïa u Dabid, u tur ïaleh ïa u ramhah, bad u pynïap ïa u. Nangta ki rangbah jong u Dabid ki la pynkular ïa u Dabid ba un ym leit shuh da lei lei ruh bad ki sha ka thma. “Phi long ka jingkyrmen jong ka Israel, bad ngim kwah ban duh noh ïa phi,” ki la ong.

¹⁸ Hadien kane, la don ka thma bad ki Philistia ha Gob, ha kaba u Sibbekai uba na Hushah u la pynïap ïa u ramhah uba kyrteng u Saph.

¹⁹ La don sa kawei pat ka thma bad ki Philistia ha Gob, bad u Elhanan, u khun jong u Jair uba na Bethlehem u la pynïap ïa u Goliath na Gath, uba u sum jong u, u don u dieng thung sum uba rben kat u khung jong u nongthain jaiñ.

²⁰ Nangta la don ruh sa kawei pat ka thma ha Gath ha kaba la don uwei u ramhah uba sngewtynnat ban ïaleh. U don hynriew tylli ki shynriah'ti ha kawei kawei ka kti, bad hynriew tylli ki shynriah'jat ha kawei kawei ka kjat.

²¹ U la beiñ ïa ki Israel, bad u Jonathan, u khun jong u Shammah, u hynmen jong u Dabid, u la pynïap ïa u.

²² Kine saw ngut ki long ki khun ki ksiew jong ki ramhah ka Gath, bad ki la shah pynïap ha u Dabid bad ha ki rangbah jong u.