2 SAMUEL 20 - Khasi CL Bible (BSI)

Ka jingïaleh pyrshah u Sheba

¹ Ka leit jia ryngkhat ba don ha Gilgal, uwei u riewkai uba kyrteng u Sheba, u khun jong u Bikri, uba na ka jait Benjamin. U put ïa ka turoi bad u pyrta, “Weng ïa u Dabid! Ngin ym bud ïa u! Ïa noh sha ïing, ko Israel!”

² Kumta ki Israel ki la iehnoh ïa u Dabid bad ki la leit bad u Sheba; hynrei ki rangbah Judah ki la ïaineh bad ki bud ïa u Dabid na Jordan sha Jerusalem.

³ Haba u Dabid u la wan poi ha la ka ïingsyiem ha Jerusalem, u shim ïa ki shiphew ngut ki tnga kliar kiba u la iehnoh ban sumar ïa ka ïingsyiem, bad u buh ïa ki hapoh ka jingap phira. U la pynbiang ïa ki jingdonkam jong ki, hynrei um shym ïathiah shongkha bad ki. La buh ïa ki hangta baroh ki sngi ka jingim jong ki, da kaba im kum ki kynthei ba la ïap lok.

⁴ U syiem u ong ha u Amasa, “Khot lang ïa ki rangbah Judah bad wan biang shane la shi sngi lem bad ki.”

⁵ U Amasa u la leit khot ïa ki, hynrei um shym poi ha ka por ba u syiem u la buh.

⁶ Kumta u syiem u ong ha u Abishai, “U Sheba un kham pynjynjar ïa ngi ban ïa u Absalom. Shim ïa ki rangbah jong nga bad leit thwet ïa u, lym kumta u lah ban leit shong shnong ha ki shnong ba la ker kynroh, bad lait phet na ngi.”

⁷ Kumta ki rangbah jong u Joab, ki nongïada ïa u syiem, bad kiwei pat ki shipai ki la mihnoh na Jerusalem bad u Abishai ban leit thwet ïa u Sheba.

⁸ Haba ki la poi ha u mawsiang bah ha Gibeon, u Amasa u la ïakynduh ïa ki. U Joab u la phong ka jaiñ ïaleh thma, bad ka waitlam hapoh ka jingsop jong ka ïa kaba la teh pynskhem ha u panpoh jong u. Katba u wan sha khmat ka waitlam ka la hap.

⁹ U Joab u ong ha u Amasa, “Phi long kumno, ko paralok jong nga?” bad u bat ïa u Amasa na u 'ñiuhtmoh jong u da la ka kti kamon ban doh ïa u.

¹⁰ U Amasa um shym don jingïada na ka waitlam kaba u Joab u bat ha kawei pat ka kti jong u, bad u Joab u la dung ïa u na ka kpoh, bad ki snier jong u ki mih shaid ha madan. U ïap ha shen, bad u Joab um donkam ban dung biang sa shisien. Nangta u Joab bad u Abishai, u para jong u ki la leit thwet ïa u Sheba.

¹¹ Uwei na ki rangbah jong u Joab u la ïeng harud ka metïap jong u Amasa bad u pyrta, “Uno uno uba ha ka liang jong u Joab bad u Dabid, to un bud ïa u Joab!”

¹² Ka met jong u Amasa, ba la tap da ka snam, ka don hapdeng lynti. U briew jong u Joab u la ïohi ba uwei pa uwei u sangeh, kumta u tan ïa ka metïap na ka surok sha ka lyngkha bad u tap ïa ka da ka jaiñ.

¹³ Hadien ba la pynkynriah ïa ka metïap na lynti, uwei pa uwei u la bud ïa u Joab ban leit thwet ïa u Sheba.

¹⁴ U Sheba u la leit lyngba ïa ka jaka jong ki jait Israel baroh bad u la wan poi ha ka nongbah Abel Beth Maakah, bad baroh ki dkhot jong ka kur Bikri ki la ïalumlang bad bud ïa u sha ka nongbah.

¹⁵ Ki rangbah jong u Joab ki la ïohsngew ba u Sheba u don hangta, bad kumta ki la leit ban kerkut ïa ka nongbah. Ki tei ka kynton stong marpyrshah ïa ka kynroh kaba phai shabar bad ki la sdang ruh ban tih sha trai ka kynroh ban pynkhyllem ïa ka.

¹⁶ La don kawei ka kynthei kaba stad hapoh ka nongbah kaba la pyrta na ka kynroh, “Ha sngap! Ha sngap! Ong ïa u Joab ba un wan hangne; nga kwah ban ïakren bad u.”

¹⁷ U Joab u la leit, bad ka kylli, “Phi dei u Joab?” “Ho-oid, nga dei,” u jubab. “Kynrad, sngap ïa nga,” ka ong. “Nga sngap keiñ,” u jubab.

¹⁸ Ka ong, “Mynhyndai ki ju ong, ‘Khie leit wad jubab na ka nongbah Abel’ — bad kata ka dei kaba ki la leh.

¹⁹ Ka shnong jong ngi ka dei ka nongbah kaba khraw, kawei na ki shnong kiba shongsuk shongsaiñ tam bad kohnguh syiem tam ha Israel. Balei phi pyrshang ban pynjot ïa ka? Balei phi kwah ban pynjot noh ïa kaei kaba dei ka jong U Trai?”

²⁰ “Ym kumta!” u Joab u jubab. “Ngan ym pynsniew lane pynjot ïa ka nongbah jong phi!

²¹ Kata kam dei ka jingthmu jong ngi. U briew uba kyrteng u Sheba, u khun jong u Bikri, uba na ka ri lum Ephraim, u la sdang ka jingïaleh pyrshah ïa u Syiem Dabid. Aiti ïa une u briew, bad ngan kynriah noh na ka nongbah.” “Ngin bret ïa ka khlieh jong u sha phi nalor ka kynroh,” ka ong.

²² Nangta ka leit sha ki briew jong ka nongbah lem bad ka jingthmu jong ka, bad ki la khrai ïa ka khlieh jong u Sheba bad bret ïa ka sha u Joab nalor ka kynroh. U la put ïa ka turoi kum ka dak ïa ki rangbah jong u ban iehnoh ïa ka nongbah, bad ki leit phai noh sha ïing. Bad u Joab u la leit phai noh sha Jerusalem sha u syiem.

Ki rangbah synshar jong u Dabid

²³ U Joab u long u rangbah ai hukum jong ka kynhun shipai Israel; u Benaïah, u khun jong u Jehoïada u khmih ïa ka kynhun ïada ïa u Dabid;

²⁴ u Adoniram u peit ïa kiba shah pyntrei jubor; u Jehoshaphat, u khun jong u Ahilud u dei u nongsumar ïa ki dulir;

²⁵ u Sheba u dei u sekretari ka ïingbishar; u Sadok bad u Abiathar ki dei ki lyngdoh,

²⁶ bad u Ira, uba na ka shnong Jair u long ruh uwei na ki lyngdoh jong u Dabid.