2 SAMUEL 2 - Khasi CL Bible (BSI)

La thung ïa u Dabid kum u syiem ka Judah

¹ Hadien kane, u Dabid u kylli na U Trai, “Hato ngan leit bad shimti noh ïa kawei na ki nongrit jong ka Judah?” “Ho-oid,” U Trai u jubab. “Ïa kano?” U Dabid u kylli. “Ka Hebron” U Trai u ong.

² Kumta u Dabid u la leit sha Hebron, u da ïalam bad u ïa ki ar ngut ki tnga jong u: Ka Ahinoam kaba na Jesreel, bad ka Abigail, ka tnga u Nabal uba la ïap, kaba na Karmel.

³ U la ïalam ruh ïa la ki briew bad ki ba-ha-ïing ha-sem jong ki, bad ki la shongduh ha ki nongrit sawdong ïa ka Hebron.

⁴ Nangta ki rangbah ka Judah ki la wan sha Hebron bad ki la pynsleh ïa u Dabid kum u syiem ka Judah. Haba u Dabid u ïohsngew ba ki briew ka Jabesh ha Gilead ki la tep ïa u Saul,

⁵ u la phah shata katto katne ngut ki rangbah lem bad kane ka khubor: “To U Trai un kyrkhu ïa phi namar ka jingpyn-i ïa ka jingieit ïa la u syiem da kaba tep ïa u.

⁶ Bad mynta pat, to U Trai un lehsbun bad ïaineh skhem bad phi. Nga ruh ngan lehbha ïa phi namar kaei kaba phi la leh.

⁷ To long kiba khlaiñ bad kiba shlur! U Saul, u syiem jong phi u la ïap, bad ki paid Judah ki la pynsleh ïa nga kum u syiem jong ki.”

La thung ïa u Ishbosheth kum u syiem Israel

⁸ U rangbah ai hukum jong ka kynhun shipai jong u Saul, u Abner u khun jong u Ner, u la phet bad u Ishbosheth, u khun jong u Saul sha Mahanaim.

⁹ Hangta u Abner u thung ïa u Ishbosheth kum u syiem jong ki ri ha Gilead, Asher, Jesreel, Ephraim, bad Benjamin, bad shisha halor ka Israel baroh kawei.

¹⁰ U la don sawphew snem ka rta mynba la thung ïa u kum u syiem Israel, bad u la synshar ar snem. Hynrei ka jait Judah ka ïaineh skhem ha u Dabid,

¹¹ bad u la synshar ha Hebron halor ka Judah hynñiew snem shiteng.

Ka thma hapdeng ka Israel bad ka Judah

¹² U Abner bad ki rangbah synshar jong u Ishbosheth ki la leit na Mahanaim sha ka nongbah Gibeon.

¹³ U Joab, u khun jong ka Seruïah, bad kiwei pat ki rangbah synshar jong u Dabid ki la ïakynduh ïa ki ha ka pung, ha kaba baroh ki la ïashong, kawei ka kynhun ha kawei ka liang jong ka pung bad kawei pat ka kynhun ha kawei ka liang.

¹⁴ U Abner u ong ha u Joab, “To ngin shah katto katne na ki samla shynrang na kawei kawei ka liang ban ïakhun ïa ka jingïakob da kaba pyndonkam ïa ki atiar.” “Ka biang,” u Joab u jubab.

¹⁵ Kumta khat-ar ngut ki rangbah, ki mihkhmat ïa u Ishbosheth, bad ïa ka jait Benjamin, ki ïakhun ïa ki khat-ar ngut ki rangbah jong u Dabid.

¹⁶ Uwei pa uwei u briew u kynrup na ka khlieh ïa uba ïaleh pyrshah ïa u bad u pynngam ïa la ka waitlam ha ka krung jong u nongïaleh pyrshah, ba kumta baroh arphew saw ngut ki la kyllon ïap lang. Bad kumta, ïa kata ka jaka ha Gibeon la khot “Ka Lyngkha jong ki Waitlam.”

¹⁷ Nangta la khie ka thma kaba shyrkhei, bad u Abner bad ki Israel ki la shahjop ha ki rangbah jong u Dabid.

¹⁸ Ki lai ngut ki khun shynrang jong ka Seruïah ki la don hangta: u Joab, u Abishai, bad u Asahel. U Asahel, uba lah ban mareh stet kum ka skei khlaw,

¹⁹ u la sdang ban beh kthong ïa u Abner, u da mareh beit beit sha u.

²⁰ U Abner u kyrtiang dien bad u ong, “Dei ma me, u Asahel?” “Ho-oid,” u jubab.

²¹ “Sangeh na kaba beh kthong ïa nga!” ong u Abner. “Khie leit beh ïa uwei na ki shipai bad shim kat ïa kaba u don.” Hynrei u Asahel u ïai beh kthong hi sia ïa u.

²² Sa shisien u Abner u ong ha u, “Sangeh na kaba beh kthong ïa nga! Balei men pynbor ïa nga ba ngan pynïap ïa me? Kumno shuh ngan dang nud ban peit ïa ka khmat u Joab u hynmen jong me?”

²³ Hynrei u Asahel um shym sangeh; kumta u Abner, da ka jingtynrah shadien ïa la u sum, u la dung ïa u na ka kpoh ba kumta u sum u da pei bla ha ka ingdong jong u. U Asahel u kyllon ïap ha madan, bad uwei pa uwei uba wan poi ha ka jaka ha kaba u kyllon u la sangeh bad ïeng hangta.

²⁴ Hynrei u Joab bad u Abishai ki la mih ban buddien ïa u Abner, bad ha ka por sep sngi ki la wan poi ha u lum Ammah, uba don ha ka phang mihngi jong ka Giah ha ka lynti sha ka ri khlaw jong ka Gibeon.

²⁵ Ki rangbah na ka jait Benjamin ki la ïalumlang sa shisien sawdong ïa u Abner bad ki la ïeng ha kliar uwei u lum.

²⁶ U Abner u pyrta ïa u Joab, “Hato ngin hap ban ïaleh shi junom? Hato mem ïohi ba ha kaba kut ym don ei ei hynrei tang ka jingkthang? Ngi long ki ba-ha-ïing ha-sem jong phi. Slem sa katno ha shuwa ba men hukum ïa ki rangbah jong me ban sangeh na kaba beh kthong ïa ngi?”

²⁷ “Nga smai da U Blei uba im,” u Joab u jubab, “ba lada mem shym la kren, ki rangbah jong nga kin jin da la ïai beh kthong ïa me haduh lashai mynstep.”

²⁸ Nangta u Joab u put ïa ka turoi, kum ka dak ïa ki rangbah jong u ban sangeh noh na kaba beh kthong ïa ki Israel, bad kumta ka jingïaleh ka la sangeh.

²⁹ U Abner bad ki briew jong u ki ïaid lyngba ïa ka Them Jordan baroh shi miet; ki jam ïa ka wah Jordan, bad hadien ba ki la ïaid baroh shi step ha ka step kaba bud, ki la wan poi biang ha Mahanaim.

³⁰ Haba u Joab u la keiñ noh ïa ka jingbeh kthong, u la lumlang ïa ki rangbah jong u baroh, bad u la shem ba khatkhyndai ngut na ki, ki la jah, nalor u Asahel.

³¹ Ki rangbah jong u Dabid ki la pynïap laispah hynriewphew ngut ki rangbah jong u Abner kiba na ka jait Benjamin.

³² U Joab bad ki rangbah jong u ki la shim ïa ka met jong u Asahel bad ki la tep ïa ka ha ka jingtep ka longïing jong u ha Bethlehem. Nangta ki la ïaid baroh shi miet, bad ha ka por kynjat shai ki la wan poi biang ha Hebron.