2 SAMUEL 19 - Khasi CL Bible (BSI)

U Joab u sneng tyngeh ïa u Dabid

¹ La ïathuh ha u Joab ba u Syiem Dabid u jaw ummat bad u ïambriew na ka bynta u Absalom.

² Bad kumta ha kata ka sngi, kata ka jingkmen ïa ka jingjop ka la kylla sha ka jingsngewsih ïa baroh ki shipai jong u Dabid, namar ki la ïohsngew ba u syiem u ïambriew na ka bynta la u khun.

³ Ki leit phai noh jar jar shapoh ka nongbah, kum ki shipai kiba lehrain haba ki phet noh na ka thma.

⁴ U syiem u tap ïa la ka durkhmat bad u kyang jam, “A, ko khun jong nga! Ko khun jong nga, ko Absalom! ko Absalom, ko khun jong nga!”

⁵ U Joab u leit sha ïing jong u syiem bad u ong ha u, “Ha kane ka sngi phi la pynlehrain ïa ki rangbah jong phi — ki rangbah kiba la pyllait im ïa phi, ïa ki khun shynrang bad ki khun kynthei jong phi, bad ïa ki tnga bad ki tnga kliar jong phi.

⁶ Phi pyrshah ïa kito kiba ieit ïa phi bad kyrshan ïa kito kiba isih ïa phi! Phi la pynpaw shai ba ki nongpynïaidkam bad ki rangbah jong phi kim long ei ei ïa phi. Nga lah ban ïohi ba phin jin da la sngewhun lada u Absalom u dang im mynta bad ba ngi baroh ngin ïap.

⁷ Mynta, to leit ban pynskhem biang ïa ki rangbah jong phi. Nga smai ha ka kyrteng U Trai ba lada phim leh kumta, yn ym don shuh uwei ruh na ki u ban don bad phi lashai mynstep. Kata kan long ka jingjynjar kaba sniew tam kaba phin shah ha ka jingim jong phi baroh.”

⁸ Nangta u syiem u ïeng joit, bad u leit shong hajan ka khyrdop shnong. Ki rangbah jong u ki ïohsngew ba u don hangta, bad baroh ki la ïalumlang sawdong jong u. Ha kajuh ka por, ki Israel baroh ki la phet krad sha la ki jong ki ïing.

U Dabid u leit phai pat sha Jerusalem

⁹ Ha kylleng ka ri ki la sdang ban ïakajia para ma ki. “U syiem Dabid u la pyllait im ïa ngi na ki nongshun jong ngi,” ki ïa-ong uwei ïa uwei pat. “U la pyllait im ïa ngi na ki Philistia; hynrei mynta pat u la phet krad na u Absalom bad u la iehnoh ïa ka ri.

¹⁰ Ngi la pynsleh ïa u Absalom kum u syiem jong ngi, hynrei u la shah pynïap ha ka thma. Kumta, balei ym don mano mano ba pyrshang ban wallam biang ïa u syiem Dabid?”

¹¹ Ka khubor shaphang kata kaba ki Israel ki la ïakren ka poi ha u Dabid. Kumta u la phah ïa u Sadok bad u Abiathar, ki lyngdoh, ban kylli ïa ki nongïalam Judah, “Balei phin dei kiba khatduh ban ïarap ban wallam biang ïa u syiem sha ka ïingsyiem jong u?

¹² Phi dei ki ba-ha-ïing ha-sem jong nga, ki para doh ki para snam jong nga; balei phin dei kiba khatduh ban ïalam pat ïa nga?”

¹³ U Dabid u la bthah ruh ïa ki ban ong ha u Amasa, “Phi dei u ba-ha-ïing jong nga. Naduh mynta nga buh ïa phi ban ïalam ïa ka kynhun shipai ha ka jaka jong u Joab. To U Blei un shoh ïap ïa nga lada ngam leh kumta!”

¹⁴ Ki kyntien jong u Dabid ki la pynïoh ïa ka jingshaniah tylli jong baroh ki rangbah ka Judah, bad ki la phah ktien sha u ban wan phai bad ki rangbah synshar jong u baroh.

¹⁵ Ha ka jingleit phai jong u, ki rangbah ka Judah kiba la wan sha Gilgal ban synran ïa u sha shiliang ka wah, ki la ïakynduh ïa u ha ka wah Jordan.

¹⁶ Ha kajuh ka por u Shimei u khun jong u Gera, na ka jait Benjamin kaba na Bahurim, u la pynkloi ban leit sha ka Jordan ban ïakynduh ïa u syiem Dabid.

¹⁷ U la don bad u shihajar ngut ki rangbah na ka jait Benjamin. Bad u Siba ruh, u shakri jong ka longïing jong u Saul, u la wan lem bad ki khatsan ngut ki khun shynrang jong u bad arphew ngut ki shakri, bad ki la wan poi ha Jordan ha shuwa jong u syiem.

¹⁸ Ki la jam sha shiliang jong ka wah ban synran ïa ka kynhun ba kynja syiem bad ban leh ïa kano kano kaba u syiem u kwah. Katba u syiem u khreh ban jam sha shiliang, u Shimei u rynsied ïa lade ha khmat jong u,

U Dabid u pyn-i ka jinglehsbun ïa u Shimei

¹⁹ bad u ong, “Ko Syiem kynrad, to klet noh ïa ka jingbakla kaba nga la leh ha kato ka sngi kaba phi la iehnoh ïa ka Jerusalem. Wat buhnud ei ei pyrshah ïa nga lane pyrkhat shuh shaphang jong ka.

²⁰ Nga tip, kynrad, ba nga la leh pop, bad dei kane keiñ balei ba nga long uba nyngkong na ki jait bashaphang shatei ban wan bad ïakynduh ïa U Syiem Kynrad ha kane ka sngi.”

²¹ U Abishai, u khun jong ka Seruïah u la kren, “Ïa u Shimei dei ban pynïap namar ba u la tim ïa uta uba U Trai u la jied kum u syiem.”

²² Hynrei u Dabid u ong ïa u Abishai bad ïa u Joab, u para jong u, “Mano ba pan ïa ka jingmut na phi? Hato phi thmu ban pynwit ïa nga? Mynta, nga dei ma nga u Syiem jong ka Israel bad ha kane ka sngi yn ym pynïap ïa uno uno ruh u Israel.”

²³ Bad u ong ha u Shimei, “Nga khlei la ka jubanlak ha phi ba phin ym shah pynïap.”

U Dabid u pyn-i ka jinglehsbun ïa u Mephibosheth

²⁴ Nangta u Mephibosheth, u ksiew jong u Saul, u wan hiar ban ïakynduh ïa u syiem. Um shym la sait ïa la ki kjat, lane khi ïa la u 'ñiuhtmoh, lane sait ïa la ki jaiñ, naduh ka por ba u syiem u la iehnoh ïa ka Jerusalem haduh ba un da wan phai pat ha ka jingjop.

²⁵ Haba u Mephibosheth u wan poi na Jerusalem ban ïakynduh ïa u syiem, u syiem u ong ha u, “Ko Mephibosheth, mem shym la leit bad nga, balei?”

²⁶ U jubab, “Kumba phi tip, ko Syiem Kynrad, nga dei uba dkoh. Nga la ong ïa la u shakri ban teh jin ïa ka kada jong nga ba kumta nga lah ban shong lem bad phi, hynrei u la shet shukor ïa nga.

²⁷ U la lamler shaphang jong nga ha phi ko Syiem kynrad; hynrei phi, phi long kum u angel U Blei, kumta leh ïa kaei kaba idei ïa phi.

²⁸ Baroh kiba na ka longïing jong i pa jong nga ki dei hok ban shah pynïap ha phi ko Syiem Kynrad, hynrei phi ai ha nga ka hok ban bam ha ka miej bam jong phi. Ngam don hok ban pan shuh shuh ïa ki jinglehbha na u Syiem Kynrad.”

²⁹ U syiem u jubab, “Mem donkam ban ong ei ei shuh shuh. Nga la rai ba ma me bad u Siba men ïabynta ïa ka jingdon jingem jong u Saul.”

³⁰ “Ai ba u Siba un ïoh ïa ka baroh,” u Mephibosheth u la jubab. “Ka la biang ïa nga ba U Syiem Kynrad u la wan phai suk sha la ïing.”

U Dabid u pyn-i ka jinglehsbun ïa u Barsillai

³¹ U Barsillai, uba na Gilead, u la wan hiar ruh na Rogelim ban synran ïa u syiem sha shiliang ka Jordan.

³² U Barsillai u long uba la tymmen bha, u la phraphew snem ka rta. U long uba riewspah bha, bad u la pynbiang jingbam ïa u syiem mynba u dang sah ha Mahanaim.

³³ U syiem u ong ha u, “Ale bad nga ha Jerusalem, bad ngan khmih sumar ïa phi.”

³⁴ Hynrei u Barsillai u jubab, “Ngam don bun snem shuh ban im; balei ngan leit bad U Syiem Kynrad sha Jerusalem?

³⁵ Nga la dap phraphew snem ka rta, bad ym don shuh kata kaba pynsngewbha ïa nga. Ngam don jingmad shuh ïa kaei ba nga bam bad dih, bad ngam lah shuh ban ïohsngew ïa ki sur jong ki nongrwai. Ngan long tang ka jingbankhia ïa U Syiem Kynrad.

³⁶ Ngam don hok ïa kaba kum kane ka bainong bakhraw. Kumta ngan shu leit on lynti ïa phi tang katto katne palat ïa ka Jordan.

³⁷ Nangta shah ba ngan leit phai pat sha ïing bad ban ïap hajan ka jingtep jong i mei bad i pa jong nga. Une hangne u Shimham, u khun jong nga, u ban shakri ïa phi; shim ïa u bad phi, ko Syiem Kynrad; bad leh na ka bynta jong u katba phi pyrkhat kaba bha tam.”

³⁸ U syiem u jubab, “Ngan ïalam ïa u bad nga, ngan leh na ka bynta jong u kat kaba phi kwah. Bad ngan leh na ka bynta jong phi ïa kano kano kaba phi ong.”

³⁹ Nangta u Dabid bad baroh ki rangbah jong u ki la jam sha shiliang ka Jordan. U la doh ïa u Barsillai bad u ai ha u ïa la ka jingkyrkhu kyrdoh, bad u Barsillai u leit phai noh sha ïing.

Ki Judah bad ki Israel ki ïatainia halor u syiem

⁴⁰ Haba u syiem u la lah jam sha shiliang, ïa kaba la synran da baroh ki rangbah ka Judah bad shiteng na ki paid Israel, u la leit beit sha Gilgal, bad u Shimham u la leit bad u.

⁴¹ Nangta baroh ki Israel ki la leit sha u syiem bad ki ong ha u, “Ko Syiem Kynrad, balei ki hynmen ki para shynrang jong ngi, ki rangbah ka Judah, ki pyrkhat ba ki don ka hok ban rah noh ïa phi bad synran ïa phi, ïa ka longïing jong phi, bad ïa ki rangbah jong phi sha shiliang ka Jordan?”

⁴² Ki rangbah ka Judah ki jubab, “Ngi leh ïa kata namar ba u syiem u long uwei na ngi. Balei kane kan pynbitar ïa phi? Um shym la siew na ka bynta ka bam jong ngi lane um shym la ai ei ei ïa ngi.”

⁴³ Ki Israel ki jubab, “Ngi don shiphew shah ki jingkam halor u syiem kumba phi, phi don, wat la u dei uwei na phi. Balei phi khmih beiñ ïa ngi? Wat klet ba ngi dei kiba nyngkong ban ïakren shaphang ka jingwallam pat ïa u syiem!” Hynrei ki rangbah ka Judah ki kham pyneh ha kaba pynpaw ïa ki jingkam jong ki ban ïa ki rangbah ka Israel.