2 SAMUEL 18 - Khasi CL Bible (BSI)

U Absalom u la shahjop bad shah pynïap

¹ U Syiem Dabid u la lumlang ïa ki rangbah jong u baroh, u pynbynta ïa ki ha ki kynhun kiba shihajar ngut bad kiba shispah ngut, bad u buh ki rangbah pynïaidkam ban ai hukum ïa ki.

² Nangta u phah ïa ki ha ki lai kynhun, ryngkat bad u Joab lem bad u Abishai, u para jong u Joab bad u Ittai uba na Gath, kiba long ki nongai hukum ha la ka kynhun kynhun. Bad u syiem u ong ha la ki rangbah, “Nga ruh da lade ngan leit lang bad phi.”

³ “Phim dei ban leit lang bad ngi,” ki la ong. “Kam don jingktah ei ei ïa u nongshun lada kiba sah na ngi ki phai dien bad phet lane lada shiteng na ngi ki la shah pynïap; hynrei phi ïaryngkat dor bad shiphew hajar ngut na ngi. Kan kham bha lada phi shong hangne ha ka nongbah bad phah jingïarap ïa ngi.”

⁴ “Ngan leh ïa kaei kaba phi pyrkhat kaba bha tam,” u syiem u jubab. Nangta u ïeng harud jong ka khyrdop katba ki rangbah jong u ki dang ïaid sha khmat ha ki kynhun kiba shihajar ngut bad kiba shispah ngut.

⁵ U la ai hukum ïa u Joab, u Abishai, bad u Ittai: “Na ka bynta jong nga wat pynmynsaw ïa u samla Absalom.” Bad ki kynhun shipai baroh ki ïohsngew ba u Dabid u ai ïa kane ka hukum ha ki rangbah pynïaidkam jong u.

⁶ Ka kynhun shipai jong u Dabid ka la leit sha rudnong bad ïaleh ïa ki Israel ha ka khlaw Ephraim.

⁷ Ki Israel ki la shahjop ha ki rangbah jong u Dabid; ka long ka jingshahjop kaba sngewshyrkhei, ha kaba la pynïap arphew hajar ngut ki rangbah ha kata ka sngi.

⁸ Ka jingïaleh ka pur kylleng ki rudnong, bad kham bun ki rangbah ki la ïap ha khlaw ban ïa kiba shah pynïap ha ka thma.

⁹ Kynsan u Absalom u ïakynduh katto katne ki rangbah jong u Dabid. U Absalom u dang shong ha u khashor, bad katba u khashor u dang ïaid napoh u dieng Sning uba heh, ka khlieh u Absalom ka sahkut ha ki tnat dieng. U khashor u la mareh bad u Absalom u la shah iehnoh da kaba sdien ha shiteng suiñ.

¹⁰ Uwei na ki rangbah jong u Dabid u la ïohi ïa u bad u la ïathuh ha u Joab, “Kynrad, nga la ïohi ïa u Absalom ba u sdien ha u dieng Sning!”

¹¹ U Joab u jubab, “Lada me la ïohi ïa u, balei men shym pynïap ïa u ha shen? Nga da lade hi ngan jin da la ai ha me shiphew tylli ki sbai rupa bad uwei u panpoh.”

¹² Hynrei uta u briew u jubab, “Wat la phi ai ïa nga shihajar tylli ki sbai rupa, ngan ym rah iwei i shynriah'ti pyrshah ïa u khun jong u syiem. Baroh ngi la ïohsngew ba u syiem u hukum ïa phi, ïa u Abishai bad ïa u Ittai, ‘Na ka bynta jong nga wat pynmynsaw ïa u samla Absalom.’

¹³ Hynrei lada ngam shym la kohnguh ïa u syiem bad pynïap ïa u Absalom, u syiem un ïohsngew shaphang kata — namar u ïohsngew shaphang kaei kaei baroh — bad phin ym ïada satia ïa nga.”

¹⁴ “Ngan ym pynsyrwa ei ïa ka por bad me,” u Joab u ong. U rah lai tylli ki sum, bad u pynngam ïa ki ha ka shadem jong u Absalom katba u dang im, haba u dang sdien ha u dieng Sning.

¹⁵ Nangta shiphew ngut na ki shipai jong u Joab ki ker sawdong ïa u Absalom bad pyndep ban pynïap ïa u.

¹⁶ U Joab u la hukum ban put ïa ka turoi ban pynsangeh ïa ka jingïaleh, bad ki shipai jong u, ki wan phai na kaba beh kthong ïa ki Israel.

¹⁷ Ki la shim ïa ka met jong u Absalom, ki la bret ïa ka ha ka thliew bajylliew hapoh ka khlaw, bad ki la tep ïa ka da ka kynton maw kaba khraw. Baroh ki Israel ki phet krad sha la shnong.

¹⁸ Mynba u dang im, u Absalom u la tei u mot na ka bynta ïa lade ha ka Them jong u Syiem, naba um don khun shynrang u ban ri pynim ïa ka kyrteng jong u. Kumta u la khot kyrteng ïa u da la ka jong ka kyrteng, bad haduh kane ka sngi la tip ïa u kum u Mot jong u Absalom.

La ïathuh ha u Dabid ïa ka jingïap u Absalom

¹⁹ Nangta u Ahimaas, u khun jong u Sadok u ong ha u Joab, “Shah ngan leit sha u syiem bad ka khubor babha ba U Trai u la pyllait im ïa u na ki nongshun jong u.”

²⁰ “Em,” u Joab u jubab, “mynta ka sngi men ym rah kano kano ka khubor babha. Ha kawei pat ka sngi me lah ban leh kumta, hynrei ym mynta, naba u khun jong u syiem u la ïap.”

²¹ Nangta u ong ïa u mraw jong u na Sudan, “Khie leit ïathuh ha u syiem ïa kaei kaba me la ïohi.” U mraw u la nguh bad u la mareh bran.

²² U Ahimaas u ïai ban, “Ngam salia ïa kaei kaba jia; sngewbha shah ïa nga ruh ban rah ïa ka khubor.” “Balei phi da kwah ban leh ïa kata, ko khun jong nga?” u Joab u kylli. “Phin ym ïoh bainong ei ei na ka bynta kata.”

²³ “Long katba ka long,” u Ahimaas u ong biang, “Nga kwah ban leit.” “Khie leit,” u Joab u ong. Kumta u Ahimaas u mareh bran na ka lynti kaba na ka Them Jordan, bad shen u la tam ïa uta u mraw.

²⁴ U Dabid u dang shong ha ka jaka hapdeng ka khyrdop kaba shabar bad ka khyrdop kaba shapoh jong ka nongbah. U nongap phira u kiew shajrong kynroh bad u ïeng halor ka tnum jong ka khyrdop; u peit sha khmat bad u ïohi ïa u briew uba mareh marwei.

²⁵ U pyrta sha tbian bad u ïathuh ha u syiem bad U syiem u ong, “Lada u don tang marwei, u wanrah ka khubor babha.” Uta uba mareh u nang jan nang jan.

²⁶ Nangta uta u nongap phira u ïohi sa uwei pat u briew uba mareh marwei, bad u pyrta sha tbian sha u nongap khyrdop, “Ha peit! Don sa uwei u briew uba mareh!” U syiem u jubab, “Uta ruh u wanrah khubor babha.”

²⁷ Uta u nongap phira u ong, “Nga ïohi ba u briew uba ha khmat u mareh kum u Ahimaas.” “U dei u briew uba bha,” u syiem u ong, “bad u wanrah ka khubor kaba bha.”

²⁸ U Ahimaas u pyrta khublei ïa u syiem, u rynsied ïa lade ha madan ha khmat jong u, bad ong, “Ïaroh ïa U Trai U Blei jong phi, uba la ai ha phi ka jingjop halor ki rangbah kiba la ïaleh pyrshah ïa u Syiem Kynrad!”

²⁹ “Hato u samla Absalom u dang im?” U syiem u kylli. U Ahimaas u jubab, “Kynrad, haba u Joab u rangbah pynïaidkam jong phi u phah ïa nga, nga ïohi ïa ka jingkhihwin kaba jur, hynrei ngam tip ka dei kaei.”

³⁰ “Ïeng hangto,” u syiem u ong ha u; bad u la leit shajrong bad ïeng hangta.

³¹ Nangta u mraw na Sudan u wan poi bad u ong ha u syiem, “Nga don ka khubor babha ïa u Syiem Kynrad! Ha kane ka sngi U Trai u la ai ha phi ka jingjop halor kito baroh kiba la ïaleh pyrshah ïa phi!”

³² “Hato u samla Absalom u dang im?” u syiem u kylli. U mraw u jubab, “Ko Kynrad, nga sngew ba kaei kaba la jia ha u kan jin da la jia ha baroh ki nongshun jong ngi, bad ha baroh kiba ïaleh pyrshah ïa phi.”

³³ Te u syiem u la shah tyllep da ka sngewsih. U leit kiew sha ka kamra kaba halor kata ka khyrdop, bad u la ïam. Katba u dang leit, u la kyang, “A, ko khun jong nga! Ko khun jong nga, ko Absalom! Ko Absalom, u khun jong nga! Lada ngan da la ïap ha ka jaka jong phi, ko khun jong nga! Ko Absalom, ko khun jong nga!”