2 SAMUEL 17 - Khasi CL Bible (BSI)

U Hushai u ïalam bakla ïa u Absalom

¹ Ym slem hadien kata, u Ahithophel u ong ha u Absalom, “Shah ngan jied khat-ar hajar ngut ki rangbah, bad ha kane ka miet ngan mih ban leit thwet ïa u Dabid.

² Ngan tur ïaleh ïa u katba u dang thait bad noh mynsiem. Un sa sheptieng; bad ki rangbah jong u baroh kin phet krad. Ngan pynïap tang ïa u syiem,

³ bad nangta ngan wan ïalam pat ïa ki rangbah jong u baroh sha phi, kum ka nongleitkurim kaba wan phai sha la u jong u tnga. Phi kwah ban pynïap tang ïa uwei u briew; kiba sah na ki paidbah kin lait im.”

⁴ Kane ka la i kum ka jingai jingmut kaba bha ïa u Absalom bad ïa ki nongïalam baroh jong ki Israel.

⁵ U Absalom u ong, “Mynta khot ïa u Hushai, bad to ngin sngap aïu u don ban ong.”

⁶ Haba u Hushai u la wan poi, u Absalom u ong ha u, “Kane ka dei ka jingai jingmut jong u Ahithophel kaba u la ai ïa ngi; Hato ngin bud ïa ka? Lada em, to ïathuh ma phi ïa ngi kaei ba ngin leh.”

⁷ U Hushai u jubab, “Ka jingai jingmut kaba u Ahithophel u la ai ha phi ha kane ka por kam long kaba bha.

⁸ Phi tip ba u Dabid, u kpa jong phi bad ki rangbah jong u ki long ki nongïaleh kiba satar, bad ba ki long kiba shyrkhei kum ka dngiem kmie kaba la shah knieh ïa ki khun jong ka. U kpa jong phi u dei u shipai uba la mlien bha bad um ju sah bad la ki rangbah mynmiet.

⁹ Wat mynta hi u dang rieh ha kawei na ki krem lane ha kawei pat ka jaka. Hamar ba u Dabid u tur ïaleh ïa ki rangbah jong phi, kat uba ïohsngew ïa kata un ong ba ki rangbah jong phi ki la shahjop.

¹⁰ Nangta wat ki rangbah kiba shlur tam, ki bym ju tieng kum ki sing, kin sheptieng namar uwei pa uwei ha Israel u tip ba u kpa jong phi u dei u shipai bakhraw bad ba ki rangbah jong u ki dei ki nongïaleh kiba satar.

¹¹ Ka jingai jingmut jong nga ka long ba phin lumlang ïa ki Israel baroh na kawei ka tduh jong ka ri sha kawei pat, ki ban bun kat u shyiap ka rud duriaw, bad ba ma phi da lade hi phin ïalam ïa ki ha ka thma.

¹² Ngin shem ïa u Dabid hangno hangno ha kaba u don, bad ngin tur ïaleh ïa u ha shuwa ba un tip kaei kaba jia. Ma u lane uno uno na ki rangbah jong u kin ym lait im.

¹³ Lada u kynran dien sha ka nongbah, ki briew jong ngi baroh kin wallam ïa ki tyllai bad kin shu tan ïa ka nongbah shapoh ka them. Yn ym don uwei ruh u maw ïa uba yn iehnoh ha kliar lum.”

¹⁴ U Absalom bad ki Israel baroh ki ong, “Ka jingai jingmut jong u Hushai ka kham bha ban ïa ka jong u Ahithophel.” U Trai u la rai ban pynpulom ïa ka jingai jingmut babha ka jong u Ahithophel, khnang ba ka jingjot kan wan ha u Absalom.

La maham ïa u Dabid bad u lait phet

¹⁵ Nangta u Hushai u ïathuh ha u Sadok bad u Abiathar, ki lyngdoh, ïa ka jingai jingmut kaba u la ai ha u Absalom bad ha ki nongïalam jong ki Israel, bad ïa ka jingai jingmut kaba u Ahithophel u la ai.

¹⁶ U Hushai u bynrap, “Pynkloi, mynta! phah khubor sha u Dabid ban ym sahmiet ha ki jaka jam wah ha ka ri khlaw, hynrei ban jam mar mar ïa ka Jordan, ba kumta ma u bad ki rangbah jong u baroh kin ym shah kem bad shah pynïap.”

¹⁷ U Jonathan, u khun jong u Abiathar, bad u Ahimaas, u khun jong u Sadok, ki dang ap hajan ka umpohliew Enrogel, kaba ha rudnong jong ka Jerusalem, namar kim nud ban rung shapoh ka nongbah ïoh don ba ïohi ïa ki. Kawei ka shakri kynthei ka ju leit ïathuh ha ki ïa kaei kaba jia, bad ki pat ki ju leit ïathuh ha u Syiem Dabid.

¹⁸ Hynrei ha kawei ka sngi, jia ryngkhat uwei u khynnah u ïohi ïa ki, bad u leit ïathuh ha u Absalom; kumta ki la leit bran bran ban rieh ha ka ïing jong uwei u briew ha Bahurim. U don ka pukri hajan ka ïing jong u, bad ki hiar shapoh jong ka.

¹⁹ Ka tnga jong uta u briew ka shim kawei ka jingtap, ka siang ïa ka halor kata ka pukri, bad ka la thad kew halor jong ka, khnang ba mano mano kin ym ïohi ei ei.

²⁰ Haba ki rangbah synshar jong u Absalom ki la wan sha kata ka ïing bad kylli ïa kata ka briew, “Shaei u Ahimaas bad u Jonathan?” “Ki la jam ïa ka wah,” ka la jubab. Ki rangbah ki la wad ïa ki hynrei kim lap ïa ki, bad kumta ki la leit phai noh sha Jerusalem.

²¹ Haba ki la leit noh, u Ahimaas bad u Jonathan ki wan mih na kata ka pukri bad ki la leit ïathuh ha u Syiem Dabid. Ki la ïathuh ha u ïa kaei kaba u Ahithophel u la pynkhreh pyrshah ïa u bad ong, “To pynkloi bad jam ïa ka wah.”

²² Kumta u Dabid bad ki rangbah jong u ki la sdang ban jam ïa ka Jordan, bad kat ban da kynjat shai mynstep, baroh ki la poi lut sha shiliang.

²³ Haba u Ahithophel u la ïohi ba ïa ka jingai jingmut jong u ym shym la pdiang, u la teh jin ïa la ka kada bad u leit phai noh sha la shnong. Ynda u la dep pynbeit ïa la ki kam ïing kam sem, u la sdien phasi ïa lade. La tep ïa u ha ka jingtep ka longïing jong u.

²⁴ U Dabid u lah da poi ha ka shnong Mahanaim ha ka por ba u Absalom bad ki Israel ki la dep jam sha shiliang ka Jordan.

²⁵ (U Absalom u la buh ïa u Amasa ban ai hukum ïa ka kynhun shipai ha ka jaka jong u Joab. U Amasa u dei u khun jong u Jether u nong Ishmael; ka kmie jong u ka dei ka Abigail, ka khun jong u Nahash bad ka para jong ka Seruïah, ka kmie jong u Joab.)

²⁶ U Absalom bad ki rangbah jong u ki la sher dara ha ka ri Gilead.

²⁷ Haba u Dabid u la wan poi ha Mahanaim, u Shobi, u khun jong u Nahash, na ka shnong Rabbah kaba ha Ammon, u Makhir, u khun jong u Ammiel, na Lodebar, bad u Barsillai, na Rogelim kaba ha Gilead, ki la wan ïakynduh ïa u.

^28-29 Ki la wanrah ki pliang, ki khra, bad ki jaiñkup thiah, bad ki jingbam ruh ïa u Dabid bad ki rangbah jong u: u kew, u barli, u 'purew, u kew sdieh, u rymbai, u motor, ka ngap, ka ktung dud, ka malai, bad katto katne ki langbrot. Ki tip ba u Dabid bad ki rangbah jong u ki la thngan, ki la sliang, bad ki la thait ha ka ri khlaw.