2 SAMUEL 16 - Khasi CL Bible (BSI)

U Dabid bad u Siba

¹ Haba u Dabid u la jam kham sha khmat na ka kliar lum, u la ïakynduh kynsan ïa u Siba, u shakri jong u Mephibosheth, uba la don bad u shi jur ki kada kiba kit arspah tylli ki kpu, shispah tylli ki rynjup soh kismis, shispah tylli ki rynjup soh ba dang shu kheit, bad kawei ka pla snieh ba-dap da ka waiñ.

² U Syiem Dabid u kylli ïa u, “Men leh aïu ïa kine katne katne?” U Siba u jubab, “Ki kada ki dei na ka bynta ki ba-ha-ïing jong u Syiem Kynrad ban shong, u kpu bad u soh ki dei na ka bynta ki rangbah jong phi ban bam, bad ka waiñ ka dei na ka bynta jong ki ban dih haba ki la thait ha ka ri khlaw.”

³ “Shaei u Mephibosheth u ksiew jong u Saul, u kynrad jong me?” u syiem u kylli ïa u. “U sah ha Jerusalem,” u Siba u la jubab, “namar ba u la sngewthikna ba ki Israel mynta kin pynïoh pat ha u ïa ka hima jong u Saul, u kparad jong u.”

⁴ U syiem u ong ha u Siba, “Baroh kaba dei ka jong u Mephibosheth ka long ka jong me.” “Nga long u shakri jong phi,” u Siba u jubab. “Ai ba ngan ïai pynsngewbha ïa U Syiem Kynrad.”

U Dabid bad u Shimei

⁵ Haba u Syiem Dabid u la wan poi ha Bahurim, uwei na ki ba-ha-ïing jong u Saul, u Shimei, u khun jong u Gera, u la wan ïakynduh ïa u, u da tim ïa u katba u dang wan.

⁶ U Shimei u la sdang ban kawang maw ïa u Dabid bad ïa ki rangbah synshar jong u, wat haba la ker tawiar ïa u Dabid da ki rangbah jong u bad ki nongïada jong u.

⁷ U Shimei u la tim ïa u bad u ong, “Phet noh! Phet noh! Me u nongpynïap briew! Me u nongkamsniew!

⁸ Me la knieh ïa ka hima jong u Saul, bad mynta U Trai u la pynshitom ïa me namar ka jingpynïap ïa kiba bun na ka longïing jong u Saul. U Trai u la ai ïa ka hima ha u Absalom, u khun jong me, bad me la jot, ma me u nongpynïap briew!”

⁹ U Abishai, uba ka kmie jong u, ka Seruïah, u ong ha u syiem, “Ko Syiem Kynrad, balei phi shah ïa une u ksew ban tim ïa phi? Shah ngan leit hangtai bad khrai ïa ka khlieh jong u!”

¹⁰ “Kane kam dei ka kam jong me,” u syiem u ong ïa u Abishai bad ïa u Joab, u para jong u. “Lada u tim ïa nga namar ba U Trai u la ong ïa u, mano ba don hok ban kylli balei u leh ïa ka?”

¹¹ Bad u Dabid u ong ha u Abishai bad ha ki rangbah synshar jong u baroh, “U khun jong nga hi u pyrshang ban pynïap ïa nga, te balei phin lyngngoh ïa une u nong Benjamin? U Trai u la ong ïa u ban tim; kumta wat pynwit ïa u, ai un leh ïa ka.

¹² Lehse U Trai un ïohi ïa ka jinglanot jong nga bad un ai ha nga katto katne ki jingkyrkhu ban shim bujli ïa ka jingtim jong u.”

¹³ Kumta u Dabid bad ki rangbah jong u ki bteng la ka jingïaid lynti. U Shimei u bud ïa ki, u da ïaid na ka sharing lum; u da tim bad kawang maw bad khyndew ha ki katba u dang ïaid.

¹⁴ U syiem bad ki briew jong u baroh ki la thait hi ïan haba ki la poi ha Jordan, bad ki la shong pynjahthait hangta.

U Absalom ha Jerusalem

¹⁵ U Absalom bad baroh ki Israel baroh lem bad u ki rung sha Jerusalem, bad u Ahithophel u la don ryngkat bad ki.

¹⁶ Haba u Hushai, u paralok bajan jong u Dabid, u la ïakynduh ïa u Absalom, u la pyrta, “To u syiem un im slem! To u syiem un im slem!”

¹⁷ “La jia aïu ïa ka jingkyrshan jong me ïa u Dabid, u paralok jong me?” u Absalom u la kylli ïa u. “Balei mem leit ryngkat bad u?”

¹⁸ U Hushai u jubab, “Balei ngan leh kumta? Nga dei ha ka liang jong uta uba la jied da U Trai, da kine ki briew, bad da ki Israel baroh. Ngan sah bad phi.

¹⁹ Nalor kata baroh, ïano pat ngan shakri, lada ym dei ïa u khun jong u kynrad jong nga? Kumba nga la shakri ïa i pa jong phi, kumta mynta ngan shakri ïa phi.”

²⁰ Nangta u Absalom u phai sha u Ahithophel bad u ong, “Mynta ba ngi don hangne, kaei ka jingai jingmut jong phi ïa ngi ban leh?”

²¹ U Ahithophel u jubab, “Khie leit ïathiah shongkha bad ki tnga kliar u kpa jong phi, ïa kiba u la iehnoh shadien ban sumar ïa ka ïingsyiem. Te uwei pa uwei ha Israel un tip ba u kpa jong phi u kheiñ ïa phi kum u nongshun jong u, bad ïa ki nongbud jong phi yn pynshlur shibun eh.”

²² Kumta ki pynïeng kawei ka ïingjaiñ ïa u Absalom ha tnum ka ïingsyiem; bad ha ka jingïohi jong uwei pa uwei baroh, u Absalom u leit rung shapoh bad u la ïathiah shongkha bad ki tnga kliar jong u kpa jong u.

²³ Ïa kano kano ka jingai jingmut ba u Ahithophel u la ai ha kito ki sngi, la pdiang kumba ka long hi ka ktien jong U Blei; u Dabid bad u Absalom baroh ar ngut ki bud ïa ka.