2 SAMUEL 15 - Khasi CL Bible (BSI)

U Absalom u pynkhreh ban ïaleh pyrshah ïa u Dabid

¹ Hadien kane, u Absalom u la pynbiang ïa lade kawei ka kali ïapom bad ki kulai lem bad sanphew ngut ki rangbah kiba synran ïa u.

² U ju khie dang step phyrngab bad u ju leit ïeng harud lynti ha ka khyrdop shnong. Haba uno uno u briew u wan hangta bad ka jingïakajia kaba u kwah ïa u syiem ban pynbeit, u Absalom u ju khot ïa u, bad kylli ïa u, u dei uba nangno. Bad hadien ba u briew u la ïathuh ïa u na kano ka jait u dei,

³ u Absalom u ju ong, “Khmih, ka aiñ ka ha ka liang jong me, hynrei ym don mano mano u ban mihkhmat ïa u syiem ban sngap ïa ka kam jong me.”

⁴ Bad u ju bynrap, “Ba ngan jin da la long u nongbishar! Te uno uno uba don ka jingïakajia lane ka jingkam ïa kano kano u lah ban wan sha nga, bad ngan ai ha u ka jingbishar hok.”

⁵ Haba u briew u wan hajan u Absalom ban nguh ha khmat jong u, u Absalom u ju kner la ki kti, u bat ïa u, bad u doh ïa u.

⁶ U Absalom u leh kumne ïa uwei pa uwei u Israel uba wan sha u syiem ban ïoh ïa ka jingbishar; bad da kumta u ïoh ïa ka jingshaniah jong ki.

⁷ Hadien saw snem, u Absalom u ong ha u syiem Dabid, “Kynrad, shah ngan leit sha Hebron ban pyndep ïa la ka kular ba nga la ai ha U Trai.

⁸ Mynba nga dang sah ha Geshur kaba ha Syria, nga la kular ïa U Trai ba lada un ïalam biang ïa nga sha Jerusalem, ngan mane ïa u ha Hebron.”

⁹ “Khie leit suk,” u syiem u ong. Kumta u Absalom u la leit noh sha Hebron.

¹⁰ Hynrei u la phah ïa ki nonglamktien sha ki jait Israel baroh ban ong, “Haba phi ïohsngew ïa ka jingsawa ki turoi, pyrta jam, ‘U Absalom u la long syiem ha Hebron!’ ”

¹¹ La don arspah ngut ki rangbah kiba ha ka jingkhot sngewbha u Absalom ki la leit na Jerusalem bad u; kim tip ei ei shaphang ka jingthmu barieh bad ki la leit da kaba sngur mynsiem.

¹² Bad katba u dang ai jingkñia, u Absalom u phah khot ruh na ka shnong Gilo ïa u Ahithophel, uba long uwei na ki nongaibuit jong u Syiem Dabid. Ka jingthmu barieh pyrshah ïa u syiem ka nang jur, bad ki nongbud jong u Absalom ki nang bun.

U Dabid u phet krad na Jerusalem

¹³ U nonglamktien u la ïathuh ha u Dabid, “Ki Israel ki la ïakular ban ai jingkyrshan noh ïa u Absalom.”

¹⁴ Kumta u Dabid u ong ha ki rangbah synshar jong u baroh kiba don bad u ha Jerusalem, “Ngi dei ban ïaphet noh shisyndon lada ngi kwah ban lait na u Absalom! Pynkloi! Ïoh ba un poi shen hangne bad jop ïa ngi bad pynïap ïa uwei pa uwei ha ka nongbah!”

¹⁵ “Ho-oid, Syiem Kynrad,” ki la jubab. “Ngi la kloi ban leh kat ïa kaba phi ong.”

¹⁶ Kumta u syiem u phet noh, da ka jingsynran lem ka longïing jong u bad ki rangbah synshar jong u baroh, lait noh ki shiphew ngut ki tnga kliar, ïa kiba u la iehnoh shadien ban sumar ïa ka ïingsyiem.

¹⁷ Katba u syiem bad ki briew jong u baroh ki la iehnoh ïa ka nongbah, ki la sangeh ha ka ïing kaba khatduh.

¹⁸ Baroh ki rangbah synshar jong u ki la ïeng hajan jong u, katba ka kynhun ki shipai ïada syiem ki dang ïaid na khmat jong u. Ki hynriewspah ngut ki shipai kiba la bud ïa u na Gath ki la ïaid,

¹⁹ bad u syiem u ong ha u Ittai, u nongïalam jong ki, “Balei phi ïaleit bad ngi? Khie leit phai noh bad sah bad u syiem thymmai. Phi dei u nongwei, u nongphetwir na la ka jong ka ri.

²⁰ Phi la sah hangne tang khyndiat por, kumta balei ngan pynlong ïa phi ban ïaid sakma kylleng bad nga? Ngam tip shano ngan leit. Khie leit phai noh bad ïalam bad phi ïa la ki jong ki briew — bad to U Trai un lehsbun bad ïaineh bad phi.”

²¹ Hynrei u Ittai u jubab, “Ko Syiem kynrad, nga smai ha phi ha ka kyrteng U Trai ba ngan ïai leit bad phi kat shaba phi leit, wat la ka dei ban ïap.”

²² “Ka biang!” u Dabid u la jubab. “Dang ïaid sha khmat!” Kumta u Ittai u la ïaid sha khmat bad la ki rangbah jong u lem bad ki ba-ha-ïing ha-sem jong ki baroh.

²³ Ki briew ki la kyang jam katba ki nongbud jong u Dabid ki la mihnoh. U syiem u la jam ïa ka wahduid Kidron, ki rangbah jong u ki la bud nadien, bad ryngkat ki la ïaleit lang sha ka phang ka ri khlaw.

²⁴ U Sadok u lyngdoh u la don hangta, bad ryngkat bad u la don ki Lebi kiba bah ïa ka Synduk ka Jutang kaba kyntang. Ki la pynhiar ïa ka bad kim shym la rah shuh tad haduh ba ki briew baroh kin da mihnoh na ka nongbah. U Abiathar, u lyngdoh u la don lang hangta.

²⁵ Nangta u syiem u ong ha u Sadok, “Khie leit rah biang ïa ka Synduk ka Jutang sha ka nongbah. Lada U Trai u sngewbha ïa nga, shisien ka sngi un shah ba ngan wan biang ban ïohi ïa ka bad ïa ka jaka ha kaba ka don.

²⁶ Hynrei lada um sngewbha ïa nga — te, ai un leh ïa nga katba u ibit.”

²⁷ Bad u la bteng da kaba ong shuh shuh ha u Sadok, “Peit shane, khie ïalam noh ïa u Ahimaas, u khun jong me bad ïa u Jonathan u khun jong u Abiathar sha ka nongbah ha ka jingsuk.

²⁸ Ha kajuh ka por, ngan ap ha ka jaka jam ïa ka wah ha ka ri khlaw tad haduh ba ngan da ïoh khubor na phi.”

²⁹ Kumta u Sadok bad u Abiathar ki bah biang ïa ka Synduk ka Jutang sha Jerusalem bad ki sah hangta.

³⁰ Haba u Dabid u leit shalor u Lum ki Olib da kaba ïam; u ïaid da ka kjat suda bad u tap ïa la ka khlieh kum ka dak ka jingsngewsih. Baroh kiba bud ïa u ki la tap ïa la ki khlieh bad ki la ïam ruh.

³¹ Haba la ïathuh ha u Dabid ba u Ahithophel u la ïasoh lang bad ka jingïaleh pyrshah jong u Absalom, u la duwai, “Ko Trai, sngewbha pynpulom ïa ka jingaibuit u Ahithophel.”

³² Haba u Dabid u la poi ha ka kliar jong u lum, ha kaba don ka jaka mane Blei, u Hushai, u nong Arkhit uba dei u paralok bajan jong u, u la ïakynduh ïa u da kaba phong ki jaiñ kiba la kad bad ka khyndew ha ka khlieh jong u.

³³ U Dabid u ong ha u, “Lada phi wan bad nga, kan ym ïarap ei ei ïa nga;

³⁴ hynrei phi lah ban ïarap ïa nga da kaba leit phai sha ka nongbah bad ong ïa u Absalom ba mynta phin shakri hok ïa u kumba phi la shakri ïa u kpa jong u. Bad leh ïa baroh kaba phi lah ban leh pyrshah ïa kano kano ka jingai jingmut kaba u Ahithophel u ai.

³⁵ U Sadok bad u Abiathar, ki lyngdoh kin don hangta; ïathuh ha ki ïa kaei kaei baroh kaba phi ïohsngew ha ka ïingsyiem.

³⁶ Ki don bad ki ïa ki khun shynrang jong ki, u Ahimaas bad u Jonathan, bad phi lah ban phah ïa ki sha nga lem bad ki jingtip baroh kiba phi la ïohlum.”

³⁷ Kumta u Hushai, u paralok jong u Dabid, u la leit phai sha ka nongbah hamar ba u Absalom u dang wan poi.