2 SAMUEL 13 - Khasi CL Bible (BSI)

U Amnon bad ka Tamar

¹ U Absalom, u khun jong u Dabid u la don kawei ka para kaba bhabriew ka bym pat shongkurim, kaba kyrteng ka Tamar. U Amnon, uwei na ki khun shynrang jong u Dabid, u ibha ïa ka.

² U shoh jingieit ïa ka haduh katta katta, haduh ba u da kem pang, naba um i don lad da kumno kumno ban ïoh ïa ka; kum ka kynthei kaba dang sotti, ym shym shah ïa ka ban ïakynduh ïa ki shynrang.

³ Hynrei u Amnon u don uwei u paralok uba shalak bha, uba kyrteng u Jonadab, u khun jong u Shammah, u hynmen jong u Dabid.

⁴ U Jonadab u ong ha u Amnon, “Phi dei u khun jong u syiem; pynban na kawei ka sngi sha kawei pat nga ïohi ba phi i sngewsih. Jia aïu?” “Nga ibha ïa ka Tamar, ka para jong u Absalom, uba ïalong shi para bad nga na ijuh i pa,” u la jubab.

⁵ U Jonadab u ong ha u, “Khie leit thiah, bad leh mynleh pang. Haba i pa jong phi i wan jngoh ïa phi, ong ha i, ‘Sngewbha ong ïa i para jong nga i Tamar ban wan bad ai bam ïa nga. Nga kwah ïa i ban pynkhreh jingbam hangne ha kaba nga lah ban ïohi ïa i, bad ba in ai bam ïa nga da ma i hi.’ ”

⁶ Kumta u Amnon u leit thiah bad u la leh mynleh kum uba pang. U Syiem Dabid u la leit jngoh ïa u, bad u Amnon u ong ha u, “Sngewbha shah ïa i Tamar ban wan bad shet katto katne ki kpu hangne ha kaba nga lah ban ïohi ïa i, bad nangta in ai bam ïa nga da ma i hi.”

⁷ Kumta u Dabid u phah ktien sha ka Tamar ha ka ïingsyiem: “Khie leit sha ka ïing u Amnon bad khreh katto katne ka jingbam ïa u.”

⁸ Ka la leit shata bad ka lap ba u don ha jingthiah. Ka shim shilynglun u kpu im, ka la pynkhreh ïa u, bad ka shna katto katne tylli ki kpu hangta ha kaba u lah ban ïohi ïa ka. Nangta ka la shet ïa ki kpu

⁹ bad ka la shim ïa ki na u khiew shet na ka bynta jong u ban bam, hynrei um treh. U ong, “Phah noh shabar ïa iwei pa iwei baroh” — bad baroh ki la mihnoh.

¹⁰ Nangta u ong ha ka, “Wallam ïa kito ki kpu hangne ha ka jingthiah jong nga bad pyntian ïa nga da ma phi hi.” Ka la shim ïa ki kpu bad ka la leit sha u.

¹¹ Katba ka dang ai ïa ki ha u, u la bat trait ïa ka bad u ong, “Ale thiah lang bad nga!”

¹² “Em,” ka ong. “Wat pynbor ïa nga ban leh kum kane ka kam pohjait! Kaba da sngewjli!

¹³ Kumno shuh ngan da ïa la ka burom hapdeng ki briew? Bad phi — phin long uba jahburom nadong shadong ha Israel. Sngewbha, kren ha u syiem, bad nga thikna ba un ai ïa nga ha phi.”

¹⁴ Hynrei um sngap ïa ka; bad namar ba u kham khlaiñ ban ïa ka, u la jop, bad u la batbor ïa ka.

¹⁵ Nangta u Amnon u la shlei da ka jingisih bakhraw ïa ka; u la isih ïa ka mynta kham palat ban ïa kaba u la ieit ïa ka mynshuwa. U ong ha ka, “Khie leit noh!”

¹⁶ “Em,” ka la jubab. “Ban phah noh ïa nga kumne ka long ka kam sniew kaba kham khraw ban ïa kaei kaba phi dang shu dep leh!” Hynrei u Amnon um sngap ïa ka;

¹⁷ u la khot ïa la u shakri, bad u ong, “Beh noh ïa kane ka briew na khmat jong nga! Pynmih ïa ka shabar bad khang ïa ka jingkhang!”

¹⁸ U shakri u pynmih ïa ka shabar bad u khang ïa ka jingkhang. Ka Tamar ka kup ïa ka sopti jynsur kaba jrong kti, ka jait jaiñ ba ju phong da ki khun syiem kynthei ki bym pat shongkurim ha kito ki sngi.

¹⁹ Ka la ber dpei ha la ka khlieh, ka la kad ïa la ka sopti jynsur, bad da kaba buhrieh ïa la ka durkhmat da kaba tap da ki kti ka la leit noh da kaba ïam.

²⁰ Haba u Absalom u hynmen jong ka u la ïohi ïa ka, u la kylli, “Hato u Amnon u la ktah kti ïa phi? Sngewbha, ko hep, wat shah ba kata kan pynsngewsih shibun ïa phi. U dei u ba ïalong shi para bad phi na ijuh i pa, kumta te wat ïathuh hano hano shaphang kata.” Kumta ka Tamar ka la sah ha ka ïing jong u Absalom, ka da sngewsih bad sngew marwei.

²¹ Haba u syiem Dabid u la ïohsngew ïa kaba la jia, u la bitar lep.

²² Bad u Absalom u la isih ïa u Amnon haduh katta katta namar ka jingbatbor ïa ka Tamar, ka para jong u kat haduh ba um mon shuh ban kren ïa u.

Ka jingpynhiarkput u Absalom

²³ Hadien ar snem, u Absalom u la ai pynkhap shñiuh ïa la ki langbrot ha Baal Hasor, hajan ka shnong Ephraim, bad u la khot sngewbha ïa baroh ki khun shynrang jong u syiem ban ïadon hangta.

²⁴ U la leit sha u syiem Dabid bad u ong, “Syiem Kynrad, nga la ai pynkhap shñiuh ïa la ki langbrot. Hato ma phi bad ki rangbah synshar jong phi phin wan bad shim bynta ha ka jingïaleh-sngewbha?”

²⁵ “Em, ko khun jong nga,” u syiem u jubab. “Kan bankhia shibun eh ïa phi lada ngi baroh ngi ïaleit.” U Absalom u la ïai ban, hynrei u syiem um shym mynjur, bad u la ong ïa u Absalom ban mihnoh.

²⁶ Hynrei u Absalom u ong, “Lada kumta te, phin shah mo la kumno kumno ïa u Amnon, u para jong nga ban wan?” “Balei un leit?” u syiem u kylli.

²⁷ Hynrei u Absalom u ïai ban haduh ba u Dabid ha kaba khatduh u la shah ïa u Amnon bad ïa kiwei pat ki khun shynrang jong u baroh ban leit bad u Absalom. U Absalom u la pynkhreh ka jingkhawai kaba ïabiang ïa u syiem

²⁸ bad u bthah ïa la ki shakri: “Khmih haba u Amnon u la buaid palat, bad nangta haba nga ai hukum, pynïap ïa u. Wat sheptieng. Ngan shim jingkitkhlieh hi da lade. To long shlur bad wat sngewlehrain!”

²⁹ Kumta ki shakri ki la bud ïa ki jingbthah jong u Absalom bad ki la pynïap ïa u Amnon. Baroh kiwei pat ki khun shynrang jong u Dabid ki kiew halor ki khashor jong ki bad ki la phet krad.

³⁰ Katba ki dang don ha lynti sha ïing, la ïathuh ha u Dabid, “U Absalom u la pynïap ïa ki khun shynrang jong phi baroh — ym don uwei ruh uba lait!”

³¹ U syiem u la ïeng joit, u kad ïa la ki jaiñ ha ka jingsngewsih, bad u lympat ïa lade ha khyndew. Ki shakri ruh kiba don hangta bad u ki la kad ïa la ki jaiñ.

³² Hynrei u Jonadab, u khun jong u Shammah, u hynmen jong u Dabid, u ong, “Syiem Kynrad, kim shym la pynïap ïa ki khun shynrang jong phi baroh. Tang u Amnon uba la ïap. Phi lah ban ong da kaba peit ïa u Absalom ba u la kut jingmut skhem ban leh ïa kane naduh ka por ba u Amnon u la batbor ïa ka Tamar, ka para jong u.

³³ Kumta wat ngeit ïa ka khubor ba ki khun shynrang jong me baroh ki la ïap; tang u Amnon uba la shah pynïap.”

³⁴ Ha kajuh ka por u Absalom u la phet krad. Ha kata ka por u shipai ha ka por ap phira u la ïohi ïa ki paidbah babun kiba wan hiar na u lum, ha ka lynti na Horonaim. U la leit sha u syiem bad ïathuh ïa kaei kaba u la ïohi.

³⁵ U Jonadab u ong ha u Dabid, “Kito kiba wan ki dei ki khun shynrang jong phi, kumba nga la ong ba kin sa wan.”

³⁶ Mar ïadep kren ïa kane, ki khun shynrang jong u Dabid ki wan rung; ki la sdang ban ïam, bad u Dabid lem bad ki rangbah synshar jong u ruh ki la ïa-ïam kthang.

^37-38 U Absalom u la phet krad bad u la leit sha u Talmai, u khun jong u Ammihud, u syiem Geshur bad u la sah hangta lai snem. U Dabid u la ïambriew slem na ka bynta u Amnon u khun jong u;

³⁹ hynrei haba u la sangeh ban pyrkhat ïa ka jingïap u Amnon, u la shlei da ka jingkynmaw ieit ïa u Absalom u khun jong u.