2 SAMUEL 12 - Khasi CL Bible (BSI)

Ka khubor U Nathan bad ka jingkylla-kaba-mut u Dabid

¹ U Trai u phah ïa u Nathan, u nongïathuhlypa sha u Dabid. U Nathan u la leit sha u bad u ong, “Don ar ngut ki rangbah kiba shong ha kajuh ka shnong; uwei u long uba riewspah, bad uwei pat uba duk.

² Uba riewspah u don shibun ki masi bad ki langbrot,

³ katba uba duk pat u don tang iwei i khunlangbrot, iba u la thied. U sumar ïa i, bad i heh i san ha ïing jong u lem bad ki khun ki kti jong u. U ju bsa ïa i na ka jingbam jong u hi, bad shah ïa i ban dih na ka khuri jong u, bad u thum ïa i ha ka pneh jong u. Ita i khunlangbrot i la long kum ka khun kynthei ïa u.

⁴ Ha kawei ka sngi, la wan poi u nongwankai ha ïing jong uba riewspah. Uta u riewspah um kwah ban pynïap ïa uwei na ki jingri jong u ban khreh bam ïa uta u nongwan; pynban, u la shim ïa i khunlangbrot jong uba duk, bad u la khreh jingbam ïa u nongwankai.”

⁵ U Dabid u bitar lep ïa u riewspah bad u ong, “Nga smai ha U Trai uba im ba u briew uba la leh ïa kane u dei ban ïap!

⁶ Namar ka jingleh ïa kaba kum kane ka jingleh barunar, u dei ban buria saw shah ïa kaba u la shim.”

⁷ “Phi long uta u briew,” u Nathan u ong ha u Dabid. “Bad kane ka dei kaei kaba U Trai U Blei ki Israel u ong: ‘Nga la pynlong ïa me u syiem Israel bad pyllait im ïa me na u Saul.

⁸ Nga la ai ha me ïa ka hima jong u bad ïa ki tnga jong u; nga la pynlong ïa me u syiem halor ki Israel bad ki Judah. Lada kane kam pat biang, ngan jin da la ai shuh sa ar shah ïa me.

⁹ Balei te ba mem kohnguh ïa ki hukum jong nga? Balei ba me la leh ïa kane ka kam bymman? Me la pynlong ïa u Uriah ban shah pynïap ha ka thma; me la shah ïa ki Ammon ban pynïap ïa u, bad nangta me shim ïa ka tnga jong u!

¹⁰ Mynta, ha man la ka pateng, katto katne na ki khun ki ksiew jong me kin ïap ka jingïap kaba sngewma namar ba mem shym kohnguh ïa nga bad ba me la shim ïa ka tnga jong u Uriah.

¹¹ Nga smai ha me ba ngan pynlong ïa uwei na ka longïing jong me hi ban wallam jingjynjar halor jong me. Men ïohi ïa ka haba nga shim na me ïa ki tnga jong me bad ai ïa ki ha uwei pat u briew; bad un ïathiah shongkha bad ki haba dang shai ka sngi.

¹² Me la leh pop ha kaba rieh, hynrei ngan pynjia ïa kane haba shai ka sngi ba ki Israel baroh kin ïohi.’ ”

¹³ “Nga la leh pop pyrshah ïa U Trai,” U Dabid u la ong. U Nathan u jubab, “U Trai u map ïa phi; phin ym ïap.

¹⁴ Hynrei namar ba phi la pyn-i ïa kum kane ka jingñiewbeiñ ïa U Trai ha kaba leh ïa kane, u khun jong phi un ïap.”

¹⁵ Nangta u Nathan u leit phai noh sha ïing. U Trai u la pynngat ka jingshitom bajur ha u khunlung ba ka tnga u Uriah ka la ïoh na u Dabid.

U khun jong u Dabid u ïap

¹⁶ U Dabid u la duwai ïa U Blei ba uta u khunlung un koit. Um treh bam ei ei, bad man ka miet u rung sha la ka kamra, bad u thiah ha madan baroh shi miet.

¹⁷ Ki rangbah synshar na ka ïingbishar jong u ki leit bad pyrshang ban pynkhie ïa u, hynrei um treh, bad um bam ei ei lem bad ki.

¹⁸ Hadien shi taïew u khunlung u la ïap bad ki rangbah synshar jong u Dabid ki la sheptieng ban ïathuh ha u ïa ka khubor. Ki ong, “Mynba i khunlung i dang im, u Dabid um ju jubab ïa ngi haba ngi kren ïa u. Kumno ngin lah ban ïathuh ïa u ba i khun jong u i la ïap? U lah ban pynmynsaw ïa lade!”

¹⁹ Haba u Dabid u la ïohi ba ki ïakren pasiaw para ma ki, u la sngewthuh ba u khunlung u la ïap. Kumta u kylli ïa ki, “Hato u khunlung u la ïap?” “Ho-oid, u la ïap,” ki la jubab.

²⁰ Kumta u Dabid u khie joit na madan, u sum u sleh, u sad ïa la u shñiuh, bad u pli ïa la ki jaiñ. Nangta u la leit bad mane ha ka ïing U Trai. Haba u la wan phai sha ka ïingsyiem; u pan jingbam, bad u la bam ïa ka mar ïadep sam.

²¹ “Ngim shemphang satia ïa kane,” ki rangbah synshar ki ong ha u. “Katba i khunlung i dang im, phi la ïam na ka bynta jong i bad phim treh ban bam; hynrei mar ïa-ïap ma i, phi la khie joit bad phi la bam!”

²² “Ho-oid,” u Dabid u jubab, “Nga la shahjingit bad ïam katba i dang im. Nga la pyrkhat ba U Trai lehse un sngewsynei ïa nga bad un ym shah ba i khunlung in ïap.

²³ Hynrei mynta ba i la ïap, balei ngan shahjingit? Nga lah mo ban pynim biang ïa i khunlung? Ngan sa leit ha kawei ka sngi sha kaba i don, hynrei im lah da lei lei ban wan phai pat sha nga.”

La kha ïa u Solomon

²⁴ Te u Dabid u la pyntngen ïa ka Bathsheba ka tnga jong u. U la ïathiah shongkha bad ka; bad ka la kha khun shynrang, ïa uba u Dabid u la ai kyrteng u Solomon. U Trai u la ieit ïa u khynnah,

²⁵ bad u la hukum ïa u Nathan, u nongïathuhlypa ban jer kyrteng ïa u khynnah, u Jedidaïah, namar ba U Trai u la ieit ïa u.

U Dabid u ïohknieh ïa ka Rabbah

²⁶ Ha kajuh ka por u Joab u nang bteng ïa ka jingïaleh pyrshah ïa ka Rabbah, ka nongbah jong ki Ammon, bad u la jan ïohknieh ïa ka.

²⁷ U phah ïa ki nonglamktien sha u Dabid ban ïathuh: “Nga la tur ïaleh ïa ka Rabbah bad nga la ïohknieh ïa ka jaka pynbiang umdih jong ka.

²⁸ Mynta, lumlang ïa kiba sah jong ki shipai jong phi, tur ïaleh ïa ka nongbah, bad knieh ïa ka da lade hi. Ngam kwah ban ïoh ka burom ïa ka jingïohknieh ïa ka.”

²⁹ Kumta u Dabid u la lumlang ïa ki shipai jong u, u leit sha Rabbah, u tur ïaleh ïa ka, bad u la jop ïa ka.

³⁰ U Dabid u la shim ïa ka pansngiat ksiar na ka khlieh u blei Molekh, u bleithaw ki Ammon kaba khia kumba laiphew san kilo bad kaba don u mawkordor ha ka. U Dabid u la shim ïa u mawkordor bad u buh ïa u ha la ka pansngiat. U rah ruh shibun ki mar lute na ka nongbah

³¹ bad u la pyntrei ïa ki briew jong ka ha ki kurat, ki mohkhiew, bad ki sdie nar, bad u la pynbor ïa ki ban trei ha kaba shna maw-it. U la leh kumjuh ïa ki briew jong kiwei pat ki nongrit jong ka Ammon baroh. Nangta ma u lem bad ki rangbah jong u ki la leit phai sha Jerusalem.