2 SAMUEL 11 - Khasi CL Bible (BSI)

U Dabid bad ka Bathsheba

¹ Ha ka pyrem kaba bud, ha ka por jong ka snem haba ki syiem ki ju leit sha ka thma, u Dabid u la phah ïa u Joab lem bad ki rangbah pynïaidkam jong u bad ka kynhun shipai Israel; ki la jop ïa ki Ammon bad ki la kerkut ïa ka nongbah Rabbah. Hynrei u Dabid hi u la sah ha Jerusalem.

² Ha kawei ka sngi, haba la kham janmiet, u Dabid u la khie na kaba thiah shipor bad u la leit shalor ka tnum ïing jong ka ïingsyiem. Katba u dang ïaid sawdong hangta, u la ïohi ïa ka kynthei kaba dang sum. Ka long kaba bhabriew shikatdei.

³ Kumta u la phah ïa u nonglamktien ban lap ka dei mano, bad u la tip ba ka dei ka Bathsheba, ka khun jong u Eliam bad ka tnga jong u Uriah u nong Hit.

⁴ U Dabid u la phah ki nonglamktien sha ka; ki la wallam ïa ka sha u bad u la ïathiah shongkha bad ka. (Ka dang shu lah pyndep ïa la ka jinglehniam pynkhuid kaba man u bnai.) Nangta ka la leit phai sha ïing.

⁵ Hadien kata, ka la shem ba ka la punkhun bad ka phah ktien sha u Dabid ban ïathuh ïa u.

⁶ Nangta u Dabid u la phah ktien sha u Joab: “Phah sha nga ïa u Uriah u nong Hit.” Kumta u Joab u phah ïa u sha u Dabid.

⁷ Haba u Uriah u la wan poi, u Dabid u kylli ïa u la u Joab bad ki kynhun shipai ki bit ki biang, bad kumno ka jingïaleh ka long.

⁸ Nangta u ong ha u Uriah, “Khie leit sha la ïing bad pynjahthait katto katne.” U Uriah u la mih, bad u Dabid u la phah ka jingai sngewbha sha ïing jong u.

⁹ Hynrei u Uriah um shym leit sha ïing; pynban u la thiah ha ka khyrdop ïingsyiem lem bad ki nongap phira jong u syiem.

¹⁰ Haba u Dabid u la ïohsngew ba u Uriah um shym leit sha ïing, u la kylli ïa u, “Phi dang shu wan phai hadien ka jingleit kaba jlan; balei phi khlem leit sha ïing?”

¹¹ U Uriah u jubab, “Ki rangbah Israel bad Judah ki don jngai ha ka thma, bad ka Synduk ka Jutang ka don bad ki; u Joab u rangbah nongai hukum ïa nga bad ki rangbah pynïaidkam jong u ki ïasah ha madan. Kumno nga lah ban shu leit sha ïing, ban bam ban dih, bad ban thiah bad la ka tnga? Ka long kaba kyntang ïa nga, nga smai ba ngan ym leh ïa kaba kum kata ka kam!”

¹² Kumta u Dabid u ong, “Te sah hangne ha kane ka sngi, bad lashai ngan phah pat ïa phi.” Kumta u Uriah u la sah ha Jerusalem ha kata ka sngi bad ha ka sngi kaba bud.

¹³ U Dabid u la khot sngewbha ïa u ban ïabam miet bad u, bad u la pyndih buaid ïa u. Hynrei ha kata ka miet ruh, u Uriah um shym leit sha ïing; pynban, u la thiah ha la ka jaka thiah ha ka kamra ki nongap phira ka ïingsyiem.

¹⁴ Ha ka step kaba bud, u Dabid u thoh shithi sha u Joab bad u phah rah ïa ka ha u Uriah.

¹⁵ U thoh: “Buh ïa u Uriah ha khmat duh, ha ka jaka kaba jur tam ka jingïaleh, nangta kynran dien noh bad ai ba un shah pynïap.”

¹⁶ Kumta katba u Joab u dang kerkut ïa kata ka nongbah, u la phah ïa u Uriah sha ka jaka ha kaba u tip ba u nongshun u khlaiñ bha.

¹⁷ Ki kynhun nongshun ki la wan mih na ka nongbah bad ki la ïaleh ïa ki kynhun jong u Joab; katto katne na ki rangbah pynïaidkam jong u Dabid ki la shah pynïap, bad kumta ruh ka la long ïa u Uriah.

¹⁸ Nangta u Joab u la phah khubor sha u Dabid da kaba ïathuh ïa u shaphang ka thma,

¹⁹ bad u bthah ïa u nonglamktien, “Hadien ba phi la ïathuh ha u syiem ïa baroh shaphang ka thma,

²⁰ u lah ban bitar bad kylli ïa phi, ‘Balei ba phi da leit tur shaduh sha jan eh jong ka nongbah ban ïaleh ïa ki? Phim sngewthuh ba kin siat da ki khnam na ki kynroh?

²¹ Phim kynmaw kumno u Abimelekh, u khun jong u Gideon u la shah pynïap? Ka dei ha Thebes ba ka kynthei ka la pynhap shapoh ïa u mawtylliat na ka kynroh bad la pynïap ïa u. Balei, keiñ, phi leit tur sha jan eh jong ka kynroh?’ Lada u syiem u kylli ïa kane na phi, ïathuh ïa u, ‘U Uriah ruh, u rangbah pynïaidkam jong phi u la shah pynïap.’ ”

²² Kumta uta u nonglamktien u la leit sha u Dabid bad u la ïathuh ha u ïa kaei kaba u Joab u la hukum ïa u ban ong.

²³ U ong, “Ki nongshun jong ngi ki kham khlaiñ ban ïa ngi, bad ki la wan mih shabar na kata ka nongbah ban ïaleh ïa ngi ha madan, hynrei ngi beh krad biang ïa ki sha ka khyrdop shnong.

²⁴ Nangta ki siat ïa ngi da ki khnam na ka kynroh, bad katto katne na ki rangbah pynïaidkam jong u syiem kynrad ki la shah pynïap; u Uriah ruh, u rangbah pynïaidkam jong phi u la shah pynïap.”

²⁵ U Dabid u ong ha uta u nonglamktien, “Pynshlur ïa u Joab bad ong ïa u ba un ym khuslai, namar phim lah ban ong mano ban ïap ha ka thma. Ïathuh ïa u ban pynlong ka jingtur ïaleh kaba kham khlaiñ ïa ka nongbah bad kurup ïa ka.”

²⁶ Haba ka Bathsheba ka la ïohsngew ba u tnga jong ka u la shah pynïap, ka ïambriew na ka bynta jong u.

²⁷ Haba ka por ïambriew ka la kut, u Dabid u phah wan ïalam ïa ka sha ka ïingsyiem; ka la long noh ka tnga jong u, bad ka kha u khun shynrang na u. Hynrei U Trai um sngewbha ïa kaei kaba u Dabid u la leh.