2 SAMUEL 10 - Khasi CL Bible (BSI)

U Dabid u jop ïa ki Ammon bad ki Syria

¹ Katto katne por hadien, u Nahash u syiem Ammon u la ïap, bad u Hanun, u khun jong u, u la long syiem.

² U Syiem Dabid u ong, “Nga dei ban pyn-i ïa ka jingneh ka jingïalong paralok ïa u Hanun, kumba u Nahash, u kpa jong u, u la leh ïa nga.” Kumta u Dabid u phah ki nonglamktien ban pynpaw ïa ka jingsngewlem jong u. Haba ki la poi ha Ammon,

³ ki nongïalam jong ki Ammon ki ong ha u syiem, “Hato phi pyrkhat ba ka dei na ka bynta ka burom jong u kpa jong phi ba u Dabid u la phah ïa kine ki rangbah ban pynpaw ka jingsngewlem ha phi? Ym kumta da shisha! U la phah ïa ki hangne kum ki nongsyntiat ban swar ïa ka nongbah, ba kumta u lah ban jop ïa ngi!”

⁴ U Hanun u la kem ïa ki nonglamktien jong u Dabid, u la khi shiliang ïa u 'ñiuhtmoh jong ki, u khap ïa ki jaiñ jong ki na mar skhep, bad u la phah noh ïa ki.

⁵ Ki la sngewlehrain shaba palat ban leit phai ïing. Haba u Dabid u la tip ïa kaei kaba la jia, u la phah ktien sha ki ban sah ha Jerikho bad ban ym wan phai tad ynda ki 'ñiuhtmoh jong ki, ki la san biang.

⁶ Ki Ammon ki la sngewthuh ba ki la pynlong nongshun ïa u Dabid, kumta ki la phah wai arphew hajar ngut ki shipai Syria na Bethrehob bad na Sobah, khat-ar hajar ngut ki rangbah na Tob, bad ïa u syiem Maakah lem bad shihajar ngut ki rangbah.

⁷ U Dabid u la tip ïa kata bad u phah ïa u Joab pyrshah ïa ki lem bad ka kynhun shipai baroh kawei.

⁸ Ki Ammon ki la wan mih bad ki ïeng pynkhreh ïaleh ha ka jaka rung sha Rabbah, ka nongbah jong ki, katba kiwei pat, ki Syria bad ki rangbah na Tob bad Maakah, ki la ïeng pynkhreh ïaleh ha rudnong bym don jingkah ei ei.

⁹ U Joab u la ïohi ba ka kynhun u nongshun kan tur ïaleh ïa u na sha khmat bad na shadien, kumta u la jied ïa kiba kynsai tam na ki shipai Israel, bad u la buh ïa ki ha ka jaka kaba phai pyrshah ïa ki Syria.

¹⁰ U la buh ïa kiba sah na ki kynhun jong u hapoh ka hukum jong u Abishai, u para jong u, uba la buh ïa ki ha ka jaka kaba phai pyrshah ïa ki Ammon.

¹¹ U Joab u ong ha u, “Lada phi ïohi ba ki Syria ki jop ïa nga, wan bad ïarap ïa nga; bad lada ki Ammon ki jop ïa phi, ngan leit bad ïarap ïa phi.

¹² To long kiba khlaiñ bad kiba shlur! To ngin ïaleh tyngeh na ka bynta ki briew jong ngi bad na ka bynta ki nongbah jong U Blei jong ngi. Bad ai ba yn leh ïa ka mon U Trai!”

¹³ U Joab bad ki briew jong u ki ïaid shaphrang ban tur ïaleh, bad ki Syria ki phet krad.

¹⁴ Haba ki Ammon ki ïohi ba ki Syria ki la her ïap, ki ruh ki la phet krad na u Abishai bad ki leit rung noh shapoh ka nongbah. Nangta u Joab u wan phai noh na ka jingïaleh ïa ki Ammon, bad u leit noh sha Jerusalem.

¹⁵ Ki Syria ki sngewthuh ba ki la shahjop ha ki Israel, bad kumta ki lumlang ïa ki kynhun shipai jong ki baroh.

¹⁶ U Syiem Hadadeser u la phah khot ïa ki Syria kiba don ha ka phang mihngi jong ka wah Ïuphratis, bad ki la wan sha Helam ha ka jingïalam u Shobakh, u rangbah ai hukum jong ka kynhun shipai jong u Hadadeser u syiem Sobah.

¹⁷ Haba u Dabid u tip ïa kata, u lumlang ïa ki kynhun shipai Israel baroh, u jam sha shiliang ka wah Jordan, bad u ïaid sha Helam ha kaba ki Syria ki ïeng ha ka jaka kaba phai pyrshah ïa u. Ka jingïaleh ka la sdang,

¹⁸ bad ki Israel ki la pynher krad ïa ka kynhun shipai Syria. U Dabid lem bad ki rangbah jong u ki la pynïap hynñiewspah ngut ki nongñiah kali ïapom bad sawphew hajar ngut ki shipai shong kulai, bad ki la pynmynsaw ïa u Shobakh, u rangbah ai hukum jong u nongshun, uba la ïap ha ka madan thma.

¹⁹ Haba ki syiem kiba shah synshar ha u Hadadeser ki sngewthuh ba ki la shahjop ha ki Israel, ki la pynlong ka jingïasuk bad ki bad ki kylla long ki raïot jong ki. Bad ki Syria ki la sheptieng ban ïarap biang ïa ki Ammon.