2 SAMUEL 1 - Khasi CL Bible (BSI)

U Dabid u ïoh jingtip ïa ka jingïap jong u Saul

¹ Hadien ka jingïap u Saul, u Dabid u wan phai na ka jingjop jong u ïa ki Amalek bad u sah ar sngi ha Siklag.

² Ha ka sngi kaba bud, uwei u samla u la wan poi na ka jaka sher dara jong u Saul. Ban pynpaw ïa la ka jingsngewsih, u la kad ïa la ki jaiñ bad sleh ïa la ka khlieh da ka khyndew. U leit sha u Dabid bad u dem ngon da kaba burom haduh khyndew.

³ U Dabid u kylli ïa u, “Nangno me wan?” “Nga la lait phet na ka jaka sher dara ki Israel,” u la jubab.

⁴ “Ïathuh ha nga ïa kaba la jia,” u Dabid u la ong. “Ka kynhun shipai jong ngi ka la phet krad na ka madan thma,” u la jubab, “bad bun na ki rangïapom jong ngi ki la shah pynïap. U Saul bad u Jonathan u khun jong u ruh ki la shah pynïap.”

⁵ “Kumno me tip ba u Saul bad u Jonathan ki la ïap?” u Dabid u la kylli ïa u.

⁶ U la jubab, “Ka leit jia ryngkhat ba nga don ha u Lum Gilboa, bad nga la ïohi ïa u Saul ba u dang shaniah ha la u sum katba ki kali ïapom bad ki shipai shong kulai jong ki nongshun ki la hajan jong u.

⁷ Nangta u phai sawdong, u la ïohi ïa nga, bad u la khot ïa nga. Nga jubab, ‘Ho-oid, Kynrad!’

⁸ U kylli nga dei uei, bad nga la ïathuh ïa u ba nga dei u Amalek.

⁹ Nangta u ong, ‘Ale hangne bad pynïap ïa nga. Nga la mynsaw palat bad nga la jan ïap.’

¹⁰ Kumta nga leit sha u bad nga pynïap ïa u, namar nga tip ba un sa ïap hi la kumno kumno un tang shu kyllon. Nangta nga shim ïa ka pansngiat na ka khlieh jong u bad ïa ka jingdeng na ka ksang'ti jong u, bad nga la wallam ïa ki sha phi, ko kynrad.”

¹¹ U Dabid u kad ïa la ki jaiñkup ha ka jingsngewsih, bad ki briew jong u baroh ki leh kumjuh.

¹² Ki la sngewsih kthang, ki ïambriew, bad ki la shahjingit haduh janmiet na ka bynta u Saul bad u Jonathan bad na ka bynta ki Israel, ki briew jong U Trai, namar bun bah ki la shah pynïap ha ka thma.

¹³ U Dabid u kylli ïa u samla uba la wanrah ha u ïa ka khubor, “Me dei uba na-ei?” U jubab, “Nga dei u nong Amalek, hynrei nga shong ha ka ri jong phi.”

¹⁴ U Dabid u kylli ïa u, “Kumno keiñ me nud ban pynïap ïa u syiem ba la jied da U Trai?”

¹⁵ Nangta u Dabid u khot ïa uwei na ki briew jong u, bad u ong, “Pynïap ïa u!” U briew u la shoh ïa u nong Amalek bad u la pynmynsaw ïa u,

¹⁶ bad u Dabid u ong ha uta u nong Amalek, “Me la wallam ïa kane halor lade. Me la pynrem ïa lade haba me phla ba me la pynïap ïa uta uba U Trai u la jied ban long syiem.”

Ka jingrwai sngewsynei u Dabid ïa u Saul bad u Jonathan

¹⁷ U Dabid u rwai ïa kane ka jingrwai sngewsynei ïa u Saul bad u Jonathan u khun jong u,

¹⁸ bad u hukum ba yn hikai ïa ka ha ki briew ka Judah. (La buh jingkynmaw ha Ka Kitab U Jashar.)

¹⁹ “Halor ki lum ka Israel ki nongïalam jong ngi ki ïap! Kiba shlur tam na ki shipai jong ngi, ki la kyllon!

²⁰ Wat pynbna ïa ka ha Gath lane ha ki surok ka Ashkelon. Wat pynlong ïa ki kynthei Philistia ban kmen, wat ai ba ki khun kynthei jong ki bymngeit blei kin risa.

²¹ “Wat ai ban hap u slap ne ka umjer halor ki lum Gilboa; Ai ba ki lyngkha jong ka kin ïailong shrah! Naba ki stieh jong kiba shlur ki don hangta ha ka jingjahburom; ïa ka stieh u Saul ym shym la shut phyrnai shuh da ka umphniang.

²² Ka ryntieh u Jonathan ka long kaba shyrkhei Ka waitlam u Saul ka long ka bym don jingisynei, Ka pynkhyllem ïa kiba khlaiñbor, ka da pynïap ïa ki nongshun.

²³ “U Saul bad u Jonathan, ki long kiba phylla bad ba sngewieit; Ryngkat ryngkat ha ka jingim, bad ryngkat ryngkat ha ka jingïap; ki kham stet ban ïa ki pukni, ki kham khlaiñ ban ïa ki sing.

²⁴ “Ko kynthei Israel, to ïam namar u Saul! Uba la pynkup ïa phi da ki jaiñ saw syn-iang, Bad u la pyndeng ïa phi da ki mawlynnai bad ka ksiar.

²⁵ “Ki shipai bashlur ki la kyllon, Ki la shah pynïap ha ka thma. U Jonathan u kyllon ïap halor ki lum.

²⁶ “Nga pangnud namar jong me, ko Jonathan u para jong nga; Katno me long uba nga la sngewieit! Katno phylla long ka jingieit jong me ïa nga, Kham palat ban ïa ka jingieit ki kynthei.

²⁷ “Ki shipai bashlur ki la kyllon, Ki tiar ïapom jong ki la shu iehnoh khlem pyndonkam shuh.”