2 PETROS 3 - Khasi CL Bible (BSI)

Ka jingkular ïa ka jingwan U Trai

¹ Ko ki paralok ba-ieit jong nga, kane mynta ka long ka shithi kaba ar ba nga thoh sha phi. Ha baroh ar tylli ki shithi nga la pyrshang ban pynkhih ïa ki jingpyrkhat bakhuid ha ki jingmut jong phi da kaba pynkynmaw ïa phi ïa kine kiei kiei.

² Nga kwah ïa phi ban kynmaw ïa ki ktien ïa kiba la kren lah slem bah da ki nongïathuhlypa bakhuid, bad ïa ka hukum na U Trai bad U Nongpynim ïa kaba la ai ha phi da ki apostol.

³ Nyngkong eh, phi dei ban sngewthuh ba ha kine ki sngi kiba khatduh yn don ki briew kaba ïa ka jingim jong ki la tyllep da ki jingkwah brai jong ki hi.

⁴ Kin ibeiñ ïa phi bad kin kylli, “U la kular ban wan, hato um shym la kular kumta? Hangno u don? Ki kpa tymmen ki la lah ïap, hynrei kiei kiei baroh ki dang ïaisah kumjuh kum mynba la pynlong ïa ka pyrthei!”

⁵ Ki da thmu khnang ban leh klet ïa ka jingshisha ba U Blei u la ai ïa ka hukum la slem bah, bad ïa ki bneng bad ka khyndew la pynlong.

⁶ Ïa ka pyrthei la pynlong na ka um bad da ka um, bad ka la long ruh da ka um; ka um jong ka jingshlei um, ba ïa ka pyrthei barim la pynjot.

⁷ Hynrei ïa ki bneng bad ka pyrthei kiba long mynta la pynsah da kajuh ka hukum jong U Blei, khnang ban ïoh pynjot da ka ding. Ïa ki la pynsah na ka bynta ka sngi haba ïa ki briew ki bymtip Blei yn bishar bad pynjot noh.

⁸ Hynrei to wat klet ïa kane kawei, ko paralok ba-ieit jong nga! Kam don ka jingïapher ha khmat U Trai hapdeng ka shi sngi bad ka shihajar snem; ha u, baroh ar ki long kumjuh.

⁹ U Trai um pyntud ban leh ïa kaei kaba u la kular, kumba don kiba pyrkhat. Pynban, u long uba ïaishah slem bad phi, namar um kwah ïano ïano ban jot noh, hynrei u kwah ba baroh kin phai noh na ki pop jong ki.

¹⁰ Hynrei ka Sngi jong U Trai kan wan kum u nongtuh. Ha kata ka Sngi, ki bneng kin jah noh lem bad ka jingsawa kaba jam, ki metbneng kin ing duh bad yn pynjot, bad ka pyrthei lem bad kiei kiei baroh kiba don ha ka kin jah rngai.

¹¹ Namar ba ïa kine kiei kiei baroh yn pynjot ha kane ka rukom, ki briew kiba kumno phi dei ban long?

¹² Ka jingim jong phi ka dei ban long kaba khuid bad ba la pynkyntang sha U Blei, katba phi dang ap khmih ïa ka Sngi jong U Blei bad phi leh ïa kaba bha tam ban pynlong ïa ka ba kan wan kloi — ka Sngi ha kaba ïa ki bneng yn thang duh noh bad yn pynjot, bad ïa ki metbneng yn sa pynum ha ka jingkhluit.

¹³ Hynrei ngi ap ïa kaei kaba U Blei u la kular: Ïa ki bneng kiba thymmai bad ïa ka khyndew kaba thymmai, ha kaba ka hok kan don.

¹⁴ Bad kumta, ko ki paralok jong nga, katba phi dang ap ïa kata ka Sngi, to leh ïa kaba bha tam ka jong phi ban long kiba khlem thohbria bad kiba khlem shah kynnoh pop ha khmat U Blei bad ban don ka jingïasuk bad u.

¹⁵ To khmih ïa ka jingïaishah slem U Trai jong ngi kum ka lad ba u ai ha phi ban ïoh im, kumba u Paul u para ba-ieit jong ngi u la thoh ha phi, da kaba pyndonkam ïa ka jingstad kaba U Blei u la ai ha u.

¹⁶ Kane ka long kaei kaba u ong ha ki shithi jong u baroh haba u thoh halor kane ka phang. Don katto katne kiei kiei kiba eh ha ki shithi jong u ha kiba ki bym da shemphang bad ki briew ki bymneh jingmut ki batai bakla, kumba ki leh ïa kiwei pat ki bynta ha ki Jingthoh Bakhuid. Kumta ki wanrah hi ïa la ka jingjot.

¹⁷ Hynrei ma phi, ko ki paralok jong nga, phi la tip lypa ïa kane. To sumar ïa lade, namarkata, ba phin ym shah ïalam bakla da ki jingpynbakla ki briew ki bym bat aiñ bad phi hap noh na ka jaka ba la shongshngain kaba phi don.

¹⁸ Hynrei to phin nang roi ha ka jingaiei bad ka jingtip ïa U Jisu Khrist uba U Trai bad U Nongpynim jong ngi. Ha u, to long ka burom, mynta bad shaduh bymjukut! Amen.